Monday, December 14, 2009

Bangalore-ah Zofate hlimthla

"Ka rin phak bakin ka kutchhuakte an lo hlut a, kan Mizo culture leh incheina chungchangah te zawhna a tam khawp mai," a ti a, Mizote kut hrang hrang te, ngotekherh leh puanchei hmanga Mizo hmeichhiate inchei hun te an zawt nasa hle niin a sawi.

Renaissance Art Gallery chu Bangalore khawpuia mi a ni a, India rama art gallery hmingthang pawl a ni. A hman man pawh ni khatah cheng sing khat daih a ni. Chu hmunah chuan December ni 1-5 chhung khan Mizo artist Laltanpuia chuan 'From the Pallete of a Zopa' tih thupui hmangin solo exhibition a nei a, Mizo zingah ani hi he hmuna exhibition nei a ni nghe nghe.

Mi ramah chuan art gallery-ah hian curator (lemziak phochhuahte viltu leh a entute kaihruaitu) an awm a, exhibition titute tih ngai lovin curator chuan exhibition tlawhtute an lo chiauauvin thil awmzia an lo kawhhmuh thin.

Renaissance Art Gallery curator-in Laltanpuia kutchhuak hrang hrang a'n hmuh chuan tlawm a ti hle a, tito deuh tur te'n a hrilh nghe nghe. Art critic-te pawhin Mizopa kutchhuakte chu tlawm an ti a, "Hetiang te chuan artist tan a ngaihna a awm hlei nem!" tih te chu an sawi dan a ni.

"Ka painting kenthlakte hi Aizawla Rs 5000-6000 man vel tur kha a ni a, hetah chuan Rs 20000 zel ka chhiar a, mahse, tlawm an ti lutuk a, critic-te pawhin an sawi an sawi mai. Aizawla a rate an hriat phei chuan tlawm an ti lutuk a, painting hmasawnna kawng daltu ni hialin an sawi," tiin Tanpuia chuan Zozam Weekly a hrilh.

Critic-te hian thil hrang hrang an zawt a, Aizawlah art college emaw, lemziak zirna mumal emaw a awm lo chu mak an tih thu te, chutianga lemziak zirna pawh nei lo chunga Mizo lemziakmite'n mawi tak taka an ziak thei chu mak an tih thu te an sawi nasa hle.

"Art college pawh nei lovin engtinnge hetiang in thlen theih? In kutchhuak lah a man in chhiar tlawm si. Mahse, sum lama harsatna hi inrahbeh tir hauh suh u," ti tein Tanpuia chu an fuih a, Mizo artist-te kutchhuak tam zawk hmuh an chak thu te pawh an sawi.

Tanpuia hian Mizo artist thenkhat kutchhuak chu a thla lain Bangalore-ah hian a keng a, critic-te a hmuh tir chuan an fak thei hle. "In kutchhuak en hian hlawhtling tur in ni," ti tein an sawi a, Times and Space Art Gallery phei chuan Mizo artist-te kutchhuak phochhuaka exhibition neih an duh thu an hrilh hial. Art gallery lianah hian duh duh-a exhibition neih mai theih a ni lo a, dil phawt a ngai. Chutah an kutchhuakte chu critic-te'n an lo endik ang a, anni'n tha an tih chuan an gallery-a exhibition neih chu an phalsak chauh ang. Renaissance Art Gallery-a exhibition nei tur pawh hian Laltanpuia hian fiahna hrang hrang a paltlang a ni. Mizo artist-te kutchhuak (a sample) an hmuhin art gallery hmingthang pakhat, Times and Space Art Gallery chuan, an dil hauh lo chungin, Mizo artist-te tan an gallery-a exhibition neih an lo phal ringawt mai a nih chu!

"Hetia min lo phalsak hi a lawmawm khawp mai a, mahse, kan harsatna chu sum leh pai chungchang zel hi a ni. Times and Space Art Gallery-a exhibition nei tur pawh hian sum kan nei ang em? Ka lo haw chho phawt ang a, thiante nen kan la ngaihtuah ang chu," Tanpuia chuan a ti.

Tanpuia hian a kutchhuak 20 a phochhuak a, tunlai khawvel harsatna tawh mek, environment chhe mek chungchang tarlanna leh Mizo culture tarlanna lam a ni ber. Mizo culture tarlanna lam hian ngaihven a hlawh hle a, lemziak hmanga a tarlan Mizo incheina te chuan ngaihven a hlawh hle. Mizo hmeichhe incheina te chu mawi an ti a, tin, Mizo khua, lungdawh leh tlang lem lo langte chu an ngaihven hle bawk.

"An lawm ber chu kan Mizo culture chungchang hi niin ka hria. Ka kutchhuak an duhna pawh a 'vai' lo hi a ni ber ang. Indian art-ah hian Indian culture leh an ni tin nun tihlanna lam a tam a, Mizo culture lam hi an lo hmu ngai lo a, chu chuan an mit a la niin ka hria. Tin, environment chhe zel chungchang ka tarlan te hi an vei zawng te a lo ni hlauh a, an fak ve khawp mai," Tanpuia chuan a ti.

He exhibition-a mi mit latu ber pakhat chu '1966- Bombing of Aizawl by the Indian Government' tih hi a ni awm e.

March ni 5, 1966-ah Aizawl khawpui chu India sipai te'n jet-fighter leh bomb hmangin an bei a, Zawlkhawpui chu senmei-ah a chang ta a nih kha. Chumi lem chu Laltanpuia hian a ziak a, Bangalore-ah hian ngaihven a hlawh hle.

"Ngaihven a hlawh khawp mai a, a chanchin pawh min zawt nasa. Mizoram hre lote pawh an awm a, chu'ng mite hmaah chuan ka thiam ang tawk tawkin ka'n sawifiah ve a, an ngaihlu ve khawp mai," tiin Tanpuia chuan a sawi.

"Zalenna kan sual tawh thu ka sawi a, zalenna kan sual laia Aizawl beih a nih dan te, mahni tualchhung buainaah jet fighter hman a nih thu te ka'n sawi chuan an beng a verh hle a, 'national level-a hriat hlawh artist chu ni la Delhi-a National Art Gallery of Modern Art-ah hei hi chu dah tlak a nih hi, thil hriat reng tlak a ni' ti tein an sawi," Aizawl Art Gallery neitu Laltanpuia chuan a ti. Art "Vawi hnih ka hlawhchham hnu-ah a vawi thumnaa ka puitlin a ni a, kan hnam nuna thil pawimawh hi thangtharte tan lemziak hmanga hnutchhiah ve ngei ka duh vanga ka ziah a ni. Realistic zawng chuan a ziah theih mai ang a, mahse, abstract hmanga ziah ka duh si a, har ka ti khawp mai. Hetia hnam dangin an lo ngaihlu hi ka lawm khawp mai," tiin '1966- Bombing of Aizawl by the Indian Government' tih a ziah dan a sawi.

Art gallery lian thama exhibition a nei thei chu a hlawkpui hle tih sawiin, "Mizo lemziakmite hian hetiang hi kan mamawh a, thlirna zau zawk neih a ngai a, chumi atan chuan vahchhuah a tul a ni. Tlin leh tlin lovin risk ka'n la ve a, ka beisei phak bakin ka hlawhtling a, ka lawm tak zet a ni," a ti.

Related Posts :



No comments:

Post a Comment