Vanapa Hall bathlarah hlimthla

Hringnun hi thil chi hrang hrang hmangin mithiamte'n an phawrhlang thin a, chutianga mihring nun tarlanna zingah chuan lemziak hi ngaihsan hlawh berte zinga mi a ni. Hnam changkangte chuan an ngaisangin an hlut hle a, Zofate zingah pawh lemziak hian ngaihsan a hlawh ve tial tial niin a lang.


October ni 16-23 chhung khan Vanapa Hall bathlar chung zawka Aizawl Art Gallery te'n Painting Exhibition-2009 an huaihawt a, he Painting Exhibition hian hlut a hlawh hle. Tlawhtu an thahnem a, lemziakmite kutchhuak an hralh tha viau bawk. Tun hnaiah Mizote zingah lemziak hian ngaihhlut leh hriat a hlawh sawt hle ni-a ngaih a ni a, chu chu lemziakmite ngaihdan pawh a ni. Painting Exhibition-2009 pawh hian mipuite'n lemziak an hlut ve sawt zia a lantir tiin a sawi theih ang.

Exhibition chhimtu zingah hmeichhia an tam hle a, nu hmai fai tak tak leh nula hmel keu fe fe hmuh tur an tam hle. Hmeichhe tleirawl leh naupang pawh an tlem lo.

"Hmeichhia, hmel han en pawha mahni tawka kei ka ni inti thei turin an rawn tlawh nasa a, mak ka ti ang reng. Painting-ah hian Mizo zingah mipa aiin hmeichhiate hi an taste a sang zawk emaw'n chu aw, ka tih phah," tiin Aizawl Art Gallery neitu Laltanpuia chuan a sawi. Painting Exhibition-2009 hi Aizawl Art Gallery te huaihawt a ni.

"Kan exhibition tlawhtu zingah hmeichhia an tam a, mipa aiin an tam fe ang. Nu leh nula te'n an rawn tlawh nasa a, sikul naupang hmeichhiate pawh an tam," ti-a sawiin, "Kan painting phochhuah leitu zingah pawh hmeichhia an tam zawk," a ti.

Painting Exhibition-2009-ah hian lemziak hrang hrang cheng nuai 3 man vel zet an hralh a, Mizoram dinhmun ngaihtuah chuan hei hi a tam tham khawp mai. Painting leitute zingah hian hmeichhia an tam zawk a, a tlawhtu hrim hrim bakah a leitu-ah pawh hmeichhia an tam zawk a nih chu.

Amaherawhchu, "Hmeichhiate hi a sum kawltu an ni a, tin, in chhung cheimawi lam ngaihtuahtu an ni bawk a, chuvangin kan exhibition pawh an hlut a ni thei ve tho," a ti thung.

Mizo zinga MFA (Master of Fine Arts) zirchhuak hmasa ber ni-a hriat Isaac-a chuan, "In chhung cheimawina lam hi hmeichhe chan deuh a ni a, painting an ngaihsan em em vang pawh ni lovin in chhunga tar tur an ngaihven vang zawkin painting hi an lei thin ve bawk niin ka hria," tiin a ngaihdan a sawi.

Delhi School of Art-a a zir lai pawhin exhibition neih nikhua velah hmeichhia an tam thin ve reng reng ni-a sawiin, "Hmeichhia hian an lawm a, a lei pawh an lei nasa a, mahse, an taste a san bik vang chu niin ka hre chiah lo," Isaac-a chuan a ti.

Painting Exhibition-2009-ah hian lemziak 180 phochhuah a ni a, hmeichhe kutchhuak chu 17 chauh. A siamchhuaktu chu mipa an ni a, hmeichhia an bazar thin thung tihna te pawh a ni thei ang chu.

Sikul naupangin an tlawh nasa hi thil chhinchhiah tlak tak a ni awm e. Sikul uniform ha hmuh tur an tam hle a, tlai sikul ban paha painting en an thahnem hle. Camera te a lo awlsam tawh a, mobile phone hmangin thla a lak theih bawk nen, sikul naupangte hian an lemziak duhzawng te chu a thla an la a, mahni langin an la mawlh mawlh bawk.

Painting Exhibition tihlawhtlingtu ber pakhat chu Richard L Thanmawia hi a ni awm e. Amah vanga he exhibition tlawhtu pawh an thahnem hle.
Richard L Thanmawia
Richard-a hi tawng thei lo, beng tha lo bawk a ni a, lemziak zirlai, thiam ang reng tak a ni. Thla thum vel kal taah khan Aizawl Art Gallery-ah hian a teilut a, chuta tang chuan chu hmunah chuan a ni tin hun a hmang ve ta a ni.

Aizawl Art Gallery hi Aizawl School of Fine Arts nen a inkawp a, naupang engemaw zatin lemziak an zir mek. Richard-a pawhin Aizawl School of Arts-ah hian a zir ve ta a, zir man chawi lovin ani'n an lo zirtir thin. Zir man a chawi lo mai a ni lo, a thingpui in man thlengin an tumsak a, nuam a tiin a inti neitu chan chang thin hle.

Painting Exhibition-2009-ah hian a kutchhuak pahnih an phochhuak ve a, Richard-a chuan nuam a ti hle. A vei kual vut vut reng a, a kutchhuak midangin an en lai a hmuh chuan hlim em emin a va pan ve thin. A nui vur vur reng a, khek rik uar uar chang pawh a nei.

"Lemziak hi a tui khawp mai a, zirtir pawh a nuam khawp mai. Inbiak a har deuh e tih mai lohah chuan thil hrilh pawh a man hma khawp mai a, tin, tih dik loh han neih chang te pawhin a lo hre vat zel. Tun hma atanga uluk taka lo zir tawh chu ni se a thiam khawpin ka ring," tiin School of Fine Arts hotupa Laltanpuia chuan Richard-a chungchang hi a sawi.

Richard L Thanmawia kutchhuak hi an hralh ve ve a, pakhat Rs 3000-in, pakhat Rs 2000-in an hralh. Amah hmuh chak vanga exhibition-a kal an thahnem a, thenkhat chuan pawisa fai an pe nghe nghe.

Isaac-a chuan Painting Exhibition-2009 hi hlawhtling a ti hle a, a hlawhtlin chhan ber chu media lamin painting chungchang an puanzar that sawt vang leh mipuiin lemziak an ngaihhlut sawt vangah a ngai.

"Painting-ah hian awareness a tha sawt khawp mai a, mipui pawhin media lama an hmuh ngun na na na chu an bengkhawn ve tial tial niin ka hria. Exhibition hlawhtlin leh hlawhtlin loh tehna pawimawh pakhat chu tlawhtu an tam leh tam loh a ni a, tun tum exhibition hi tlawhtu an thahnem hle a, chuvang chuan kei chuan hlawhtling ka ti. Tlawhtu an tam chhan chu awareness a that vangah ka ngai," a ti.

Painting Exhibition-2009-ah hian ramthla te, naupang lem te, chawei dawhkan lem te, Zokhaw lem te, vur ram lem te leh milem chi hrang hrang phochhuah a ni a, abstract painting lam pawhin ngaihven a hlawh sawt khawp mai. Lemziak thiamte'n kawng hrang hrangin hringnun an phawrhchhuak a, chu chuan hlut a hlawh ve ta hle a nih chuan hmasawnna lawmawm tak a ni ngei ang.

Related Posts :