SEM POLICY

- HC Vanlalruata

Tuna Assembly inkhawm kallai mekah sorkar hmasa programme kalpui MIP sum la bang chu NLUP implementation board kuta hlan a nih hnu-ah vawk vulhna atan Aizawl khawpui huam chhung assembly bial-ah te sem darh a ni tih tarlan a ni a. Chhungkaw 900 hnenah Rs 73,06,000 (cheng nuai 73) sem ral a nih thu Agriculture Minister Pu H. Liansailova chuan a sawi bakah ziaka zawhna a chhannaah hian a dawngtu-te hming leh veng a tarlang bawk.

Heta eptu lamte boruak ti sosangtu ber chu zawhna chhanna-a Unit hming lo lang - entirna’n Tanhril Unit 1 leh II tih te, Mission Veng thlang unit tih ang chi Unit 13 lai hming a lo lang a, hengte hi eng unit dang ni lovin rorellai Congress Unit niin a lang hlawm. A sawi fiahnaah Minister chuan NLUP Board lam chuan a hming leh Veng hming an tarlang mai a, unit lam an tarlang lo niin a sawi a. Pawisa pawh hi VC te’n an la tur a ni a, an hman remchan loh avanga an mi rin zawngte an lo tir a nih chuan sorkarin a hriatpuilo a ti. A sawi awmzia chu Congress unit president emaw unit hruaitu dangte’n emaw an lo la a nih pawhin VC-te’n an tir a ni ang, tih ang deuh a nih chu.

Hemi chungchangah hian Speaker Pu R. Romawia chuan unit sum nilo, sorkar pawisa unit hruaitute’n an lo la chhuak chu thil diklo nia a hriat thu a sawi a. Chief Minister Pu Lal Thanhawla pawh hemi chungchang sawihonaah hian inrawlhin he thil thleng hi pawi a tih thu leh chhui zui a nih tur thu a sawi a. A tenawm a tih thu leh zahthlak a tih thu sawiin sorkar officer thenkhatin hetiang thil hi sorkar tlawnna’n hman theih an inring a nih chuan an tihsual tur thu a sawi a, “Kan haw tak a ni tih hi lo hre rawh se,” a ti a ni.

Sorkar sum, mipui pawisa ni si rorellai party-in an ta neih tak mai ang chi hi Mizoramah hian a awm leh fo thin a, a pawi ngawt mai. Hetiang lo intanna hi kan politics khelh chhoh dan phuinga thil sem policy kan uar lutuk vang ni berin a lang a. A thawha thawh chhuah ni lo, a sema sem lam panga rorellai unit-te tihlungawina leh sawhnghehna atana political party lamin thiltih an lo chin thin vang a ni ber. A thawha thawh chhuah ni lo, politics khelhnaa khelh fuha hlawh chhuah tumna hian Mizoram mipui tam tak hi mi rinawmlo leh mi depde-ah min siam tawh a ni. Hemi kawngah hian sorkar hnathawk, Ministry venpuitu tura ngaihte pawh sorkar sum tih hre reng a dan kalha thiltih pawh hreh lova sorkar thuneitute tlawn ching an awm thin tih hi hai rual a ni lo.

Thil awm dan hetiang hi a nih tawh avang leh kan lo kal fuhloh rei tawh avang hian ‘Corruption a zung nen lama phawka phoro tum’ sorkar hruaitu Chief Minister hian Assembly-a a thusawi hi bawhzui ngei sela chuan kan insiamtha thei ang. Sawi piah lamah hremna hi lek ngei zel ni tawh sela tichuan thilsual tih chingte an tim ngei ang. Hrem an nih leh chuan loh chuan a ngaiin kan kal zui leh mai ang tih hi a hlauhthawnawm reng a ni.

A thuhrimah thil reng reng a thawh chhuah lam ni lova a sem leh dawn, a thlawna thil sem leh dawn hi kan rilru tipiangsualtu a ni. India rama ukil hmingthang leh ram palai hna pawimawh pawh lo thawk tawh N. Palkhivala khan India ram ropuina tur chu a thil dawnah ni lovin a thawhchhuah atanga lo intan tur a ni a ti. Kan fate hnena tute’nemaw chithlum-mum man an pek hian chhungkaw hmasawnna a thlen kan hre ngai lo. Pe fo mahse an hmang ral mai a ni. Mahse, kha chithlum-mum man tur dawng thin khan hna a thawh a thawhchhuah a neih hunah chuan kan chhungkua chuan nasa takin hma a sawn ang. Chutiang chu a ni.

Politician-te hian rei tak chu mipuite hi kan retheihna remchanga la-in an duh angin kan kawnga hrui valhin min hruai tawh thin a. Kan pachhiatna leh harsatna avangin mahni ngaihdan pawh nei thei lovin pa tam tak kan awm mek a ni. Pa intodelh chuan ngaihdan a neih a sawi chhuak ngam thin a, pa rethei erawh chuan mitmei ven tur a ngah chawk thin. A chhan chu a thlawna thil sem dawngtu nih loh a hlauh vang a ni. He ‘sem policy’ hian Mizo hnam hi kutdawh hnamah thuk tak min pawtlut tawh a. Tal chhuak leh tur chuan rahbi tuk a ngai.

Kan ram hi socialist thuthlunga inkaihruai rei tawh kan nih avangin sorkar kalphung a la inthlak thut thei lova, sorkar belh a tul leh thin. Chuvangin zalen taka mipuiin ei zawn bul an tana an din chhuah theihna tur remchang (opportunity) siam theitu sorkar kan mamawh a. A thlawna thil sem hi kan sim thuai loh chuan kutdawhna thinlung kan nei lian telh telh ang a, hnam tlaklailo takah kan chhuak ang a. Din chhuah chu kan hlat ngawt ang. Pialral suangtuahna atana a fai sa rin thupuia neihtu hnam, hreipui khuaitu thei-ah pawh tha ngailo duh thin hnam kan nih zui chuan a pawi ngawt ang le..

Related Posts :