Khawchhak lungpui

Dawrpui pheia Hmingliani Bakery te chhang zawrhna dawrah chuan Korean filmstar-te thlalak an zuar a, kawng atanga hmuh theih mai turin an tar bawk a, kawng kalte mit a la thin hle. A hralh lah an hralh tha.


He dawr hi chhang zawrhna ni mah se Korean serial film - Boys Over Flowers-a a changtute thlalak chu tun hnaia an dawr ti-luntu ber a ni.

"Tu thlalak hi nge hralh kal ber pawh ka hre chuang lo, a kal vek ni maiin ka hria, kal bik pawh a awm lo," tiin dawr nghaktunu chuan Zozam Weekly a hrilh.

"Hmeichhiain an rawn lei nasa; hmeichhiaah pawh tleirawlin an lei ber a, tin, nu pawhin an rawn lei, nula pawhin an lei bawk. Mipa pawhin an lei ve tho a, mahse, hmeichhia ang emin an tam lo," a ti bawk.

Kum 20 vel liam taah khan mi engemaw zat chuan khawchhak atanga lo lo lum tur hlauvin mahni in leh lo an tlanchhiatsan a, khaw pakhatah an pem khawm a nih kha. Engemaw lai atang khan khawchhak lam atangin 'lungpui' a rawn lum a, tunlai hian chu chun thalaite a chiah hneh hle. A bikin hmeichhe lam a chiah hneh niin a lang.

Zozam Weekly chuan DVD zuar mi engemaw zat a kawm a, chu'ng mite chuan tun hnai an film hralh theih ber chu Korean film a ni tih an sawi vek. Sap film ai pawhin an hralh thei a, a bikin Boys Over Flowers tih, F4 ti-a sawi chu an hralh chak hle. A lei an tam tawh bawk a, a DVD ngau ngau hi chu an hralh chur chur tawh lem lo. Mahse, a vanglai a pel tawh a ni mai a, a hralh chu an la hralh tha. A lei an tam avangin a DVD nei an tam tawh ang tih a chiang a, chuvangin, 'market' lamah a vanglai pel tawh mah se a boruak erawh a la vung hle.

Sap film aiin Korean film
Millenium Centre thlanga DVD zuar nu pakhat chuan, "Korean film hi kan hralh thei ber a ni mai lo, engemaw lai phei chuan Korean film chauh kan hralh thei a ni zawk. 'A dang hi chu phochhuah tawh loh law law mai tur emaw'n le' te ka ti hial thin," tiin Zozam Weekly a hrilh.

"Hmeichhiain an lei nasa a, a bikin tleirawlin an lei nasa. Nu leh nula pawhin an lei bawk. Tin, mipa pawhin an rawn lei fo, mahse, hmeichhia chu zat lo tak an ni," chu nu chuan a ti.

"Nikum vel atang khan F4 hi kan hralh tha. A chang phei chuan awihawm loh khawpin kan inhralh tha thin," a ti bawk.

F4 hi tunlai hian Mizoramah a lar hle. Serial film a ni a, Cable TV Operator te'n Mizo tawnga lehsa an chhuah thin. Chu chu mi tam takin an en a, a changtute zunah an uai a ni ber. Local TV lamah en tur awm mah se a DVD chu hralh a nuam em em tho.

"TV-ah a chhuak na a, kan hralh chur chur tho. 'TV-a mi ka nghak hman tawh lo, ka en chak tawh lutuk' an ti a, an nghakhlel lutuk hian an rawn lei thin," tiin Millenium Centre thlanga DVD zuar chuan a sawi a, midang pawhin chuti tho chuan an sawi hlawm.

Millenium Centre thlanga DVD zuar hian F4-a a changtute thlalak pawh a zuar a, a vanglai chuan ni khatah copy 800 te a hralh thin.

"A vanglai chuan pui tak a ni, a awihawm loh zawk, an rawn lei luih luih a ni ber mai. A DVD pawh, a thlalak pawh, kan rin phak bakin mi hian an duh," chu nu chuan a ti.

Zozam Weekly chuan DVD zuar mi 10 vel a kawm a, he'ng mite hi hmun lun laia inzuar vek an ni. Tun hnaiah Korean film an hralh thei hle tih an sawi vek a, Korean film-ah pawh F4 an hralh thei zual tih an sawi vek bawk.

Korean film hi hmeichhiain an lei nasa tih an sawi vek a, hmeichhiaah pawh tleirawl an tam ber tih sawiin, nula pangngai leh nu pawhin an lei nasa tih pawh an sawi. Mipa pawhin an lei ve thin tih an sawi vek a, mahse, mipa chu an tam lo tih an sawi vek.

Naupang, sikul naupangte pawhin Korean film an lei thin tho tih an sawi hlawm a, naupangah pawh hmeichhia bawkin an lei nasa tih an sawi vek.

Dawrpui pheia DVD zuar pakhat chuan, "Hman deuh atang khan Korean film hi kan hralh tha a, eng tik lai pawhin a duh hi chu an awm reng. Korean film hrim hrim- an hmuh apiang lei thin pawh an tam mai. Chutiang a nih loh chuan, a film lar lai hi a awm ve a, a film mala sawi dawn chuan a hralh a inkal chhawk a ni ber. Mahse, tunlaiah chuan F4 hi a kal ber," tiin a sawi.

"Hmeichhiain an duh kan ti na a, mipa pawhin an rawn lei nasa a, tin, mipa hian an en nasa ve tho," tiin a zuar pakhat chuan a sawi.

Zozam Wekly-in DVD zuarte a tlawh kual laia Korean serial film DVD leitute chu hmeichhia an ni tlangpui a, tleirawl an ni tlangpui bawk. Tin, school uniform ha an tam viau. "Hetiang hi hun dangah pawh a dinhmun chu a ni tlangpui," tiin Dawrpui pheia zuar chuan a sawi.

"Ka en nasa a, hmuhnawm ka ti tawp. Ka thiante pawhin an en nasa. Kan inang a, chuvang chuan ka ngaina," tiin F4 DVD leitu tleirawl pakhat chuan Zozam Weekly a hrilh a, "Sap film pawh hmuhnawm ka ti a, mahse, Korean film ka en atang hi chuan sap film ka en vak tawh lo. Sap film ka en hi chuan midang daih hi ka hmuin ka hria a, Korean film ka en hi chuan midang daih en-ah ka inngai ngai lo," a ti bawk.

A thiannu pawhin Korean film a en nasat thu lo sawi vein, "Kan thianho chuan kan en vek a, kan rualpui chuan hmuhnawm an ti vek ang. Kan awmho chang pawh hian kan sawi ber chu a ni hrim hrim," a ti.

"Kan star te kan sawi a, an faizia te leh an thianghlimzia te kan sawi thin. Korean-ho hi an hmeltha kan ti hrim hrim," chu tleirawl chuan a ti bawk.

Korean film en thin nula pakhat chuan, "Heti taka kan en nasat a ni bawk a, hriat loh laiin min lo 'influence' thei khawp mai. An fai em em a, hei hi Mizo thalaite hian an entawn viauvin ka hria. An inchei dan kan entawn a, chutah chuan an fai em avangin an faina lai hi kan entawn lo thei lo niin ka hria," a ti.

Chu nula chuan sawi zawmin, "Kei chu Korean film ka enna a rei tawh a, mahse, ka thiante aiin ka en hnuhnung. Arirang rawn lar tirhah khan ka thiante chuan hmuhnawm an ti hle a, ka thiannu pakhat phei chu Arirang-a an tih danin chhuatah a mu ve thin," a ti.

Korean film-ah hian khuma mu lova chhuata mut an ching hle a ni.

"Kasauti lar lai khan ka thiante chuan Arirang hi an tuipui tawh a, incheina lamah pawh Korean fashion an copy daih tawh. Kei chuan hei hi tha ka ti a, hmelah leh pian-ah te kan lo inang a, tin, mawi tih zawngah pawh sap leh vai ai chuan kan hnaih zawk a, kan entawn theih tur takah ka ngai," a ti bawk.

LPS chuan F4 hi Mizo tawnga letin an tichhuak thin a, hei hi mi tam tak inhnangfakna a ni.

LPS Vision neitu Lalsawmlian Pachuau chuan, “Mipui demand vangin Korean film serial te hi kan chhuah thin a ni” tiin Zozam Weekly a hrilh.

“A hmain kan lo chhuah tawh thin a, mipuiin an duh tlat a, min ngen nasa hlawm em a ni” a ti bawk.

“Keini chu public service kan ni a, a him chin nia kan hriatah chuan mipui duh tihhlawhtlin kha kan hna a ni,” a ti bawk.

Zonet chuan anmahni Station atang chuan an chhuah lo. Zonet hotupa RK Lianzuala chuan, “Keini chuan kan chhuah ve lo, kan neih chhun chu Zawlbuk hi a ni mai a, chutah chuan Korean serial kan chhuah ve lo,” a ti a, “A chhuah an lo awm a nih pawhin kan sub-operator te chhuah chhawn leh a ni ang,” a ti.

LPS leh Zonet chu Mizorama Cable Operator kan neih lian berte an ni a, an pahnih hnuaiah hian sub operator an tam hle a, chung te chuan anmahnia channei hrang lehin an duh ang film an customer te uibehna leh tihlawmna tur an chhuah thin.

Pu Kima'n hetin a ti
Korean pa pakhat Dr Kim chu Jawahar Lal Nehru University-ah Korean Language and Culture zirtirtu a ni. Tun hnai lawk khan Korean movies-in hmarchhak a nghawng dan zirin Mizoram a rawn chuangchhuak a nih kha.

“Kum 10 vel kalta atang khan Mizoram-ah Korean film vel hi a lar tan niin a lang,” tiin Zozam Weekly a hrilh.

Tun hnai lawkah hemi chungchang zirin Mizoramah a rawn kal a, Mizoram mai ni lo, North East state dangah pawh a kal.

Dr Kim chuan, “Korean film hi a bikin thalaiin an lawm hle niin ka hria a, college zirlai thenkhatte ka kawm kualnaah chu chu a chiangin ka hria,” a ti.

“Korean Movie in hmuh ang chi hi Burma atanga lakchhawn niin a lang a, China khi a bul ber a ni phawt a, chumi hnuah Burma atangin a rawn kal leh,” a ti.

“A quality a chhe em em a, hei aia quality tha hi chah dan a awm tur a ni. Thil harsa niin a lang lo a, Korean Embassy kal tlang pawhin awlsam zawkin a tih theih ang,” a ti bawk.

South Korea khian an culture phochhuah tumin, khawvel huapa tihlar a nih theihnan Television channel pakhat Arirang TV tih chu an nei a, an hmang tangkai hle.

Kum 10 vel kal ta atang khan Mizoram pawhin a hmelhriat hle a, kan hmel a lo inang bawk nen, Mizo nula thenkhat phei chu 'Arirangi' ti te pawhin an ko fiam hial.

Arirang TV kaltlangin Korean serial chu nula leh tlangval te'n an en tan a, an lawm hle nghe nghe a nih kha!

Chumi hnuah pirated DVD hmangin Korean film chuan min nuai leh a, tun tum zet chu a sawhkhawk pawh a na nangiang mai! 'Fullhouse'-in hma a hruai a, 'Autumn in my heart' te'n an rawn zui a, Mizoram hmun hrang hrangah Korean film a lar ta hle.

Chumi hnu-ah mi thenkhatin Korean Film chu Mizo tawnga en theih turin an let a, chu ngat phei chuan Korean film a tilar ta hle. He'ng hian Korean film mai ni lovin Korean culture leh nunphung thlengin a tilar a ni.

“Korean film a lar tih chu thalaiah a lang chiang a, mahse, kum upa lam te hian engtiangin nge an ngaih tih hi ka hriat chak em em zawk chu a ni,” tia sawiin, “Kum upa lam te'n engtiangin nge an ngaih a, an thlir dan ka hre chak ber zawk,” tiin Dr Kim chuan Zozam Weekly a hrilh.

Ni thum chamin Dr Kim hian Mioram a rawn tlawh a, lo kal leh a tum a, a lo kal leh hunah chuan Champhai tlawh a duh thu a sawi.

Dr Kim chuan, “Khawvel pumah foreign culture influence hi sawi tur a awm vek a, khawi hmunah pawh a thleng a ni. Mizoram pawh tun hma chuan English culture-in a hneh thin che u,” a ti bawk.

“Tunah pawh Korean culture-in nasa takin a influence che u tih a hriat a, chutah chuan kum upa lam zawk te thlir dan leh an ngaihdan hriat a chakawm a, thalai lam chuan engah vak an ngai lo niin a lang," tiin a sawi zawm a ni.

Mizoramah Korean film lar chu mak a ti lem lo; “Korean film a lar hle tih a hriat a, Aizawl khawpuiah hmun tam takah a zawrhna a awm a ni. Mahse, a quality a chhe em em mai a, engtiang nge in en theih zawk ka ti,” a ti.

Local Channel-a Korean ho Mizo tawnga an tawng zuah zuah chu mak a tih thu sawiin, “Local channel-ah Mizo tawngin in dubbed a, Korean tawng thiam nal tak chutiang ti thei in awm a ni ang ka ti mai,” tiin nui chungin a sawi.

Mizorama Korean movie lar chhan ber chu Mizote leh Korean te inan vangah ngaiin, “Culture inanna tam tak a awm a ni, chu chuan min tihnai ni-ah a ngaih theih ang,” a ti.

“Mizo mipuite hian English-ho ai chuan Korean-ho chu hmel leh pianzia bakah chet dan phung hrim hrimah te in hnaih zawkah in ngai niin a lang bawk. Hetiang culture inanna tak hian thu tam tak a sawi a ni,” a ti bawk.

Dr. Kim hian Mizo te chu India rama hnam dang nen danglam a tih thu sawiin, “Mizo te chuan identity khauh tak in nei niin ka hria, in hnamah in chiang bik emaw tih tur a ni a, in inpawlhsawp lo bik,” a ti.

“India ram hmun dang reng rengah chuan an inpawlh nasa em em a, Mizoram erawh in hlang tha hle niin ka hria,” a ti bawk.

“Manipur angah te chuan hnam hrang hrang an tam hle a, chutiang chu India ram hmun dangah pawh a ni tho, Mizoram erawh a ni ve lo,” tiin a sawi zawm.

Mizoram chu mawi a tih thu sawiin, “A landscape hi a mawi tawp,” a ti.


#################

Boys Over Flowers

Zirlaite thawmhnaw suk a pekna lamah Geum Jan Di chuan South Korea rama sikul lar leh hmingthang ber Shinhwa school naupang pakhat nunna a chhanhim a. A chet dan chu rei lo te chhungin a lar nghal hluai a, chu chuan chu school ropui taka inhmuhsitna nasa tak awm thin chu a tarlan phah ta a ni. Mipui rilru sukthlek thlak danglam nan school thu neitute chuan Jan Di chu swimming scholarship an pe a, mahse, a duh lo. A chhung ten tihluihnain an pawmpui ta tho.

Shinhwa school-a vawi khat kalnaah chuan Jan Di chuan F4 an tih mai, lar em emte chu a hre ve ta. F4 chu school naupang dangte pawhin an ngaihsan em em leh dahsan em em te an ni.

Gu Jun Pyo, Yoon Ji Hoo, So Yi Jung, leh Song Woo Bin te chu Shinwha school chhung mai ni lo Korea ram puma mihausa ber ber fate an ni bawk a, an lar hle.

An thiltihtheihna leh thuneihna chu a chhe zawnga hmangin school naupang chak lo zawk te chu an tirethei hle thin. Midang chuan an hlauvin an zah a, an kalna piangah an thle dual dual zel thin.

Chutih laiin dry cleaner fanu ve mai Jan Di chuan chung mipa palite chu hlauh a hnekin an chezia chu a lo ei lo ve em em ringawt mai thung. A bik takin an houtpa Gu Jun Pyo ngat phei chu hnial a chak ngawih ngawih emaw tih mai tur a ni.

Chutiang hun duhawm chu a tawng ta hlauh mai; naupang pakhatin tih palh thil tak meuh meuhin Gu Jun Pyo pheikhawkah chuan ice-cream a tikai palh a, Gu Jun Pyo chuan a pheikhawka ice-cream chu a liah fai tir a tum a, chu tak chu Jan Di chuan tei thei lovin an inhnial ta a ni.

An inhnial takah chuan Jan Di zawk chuan Jun Pyo chu a nek tlu ta mai a, Jun Pyo thinrim lutuk chuan Jan Di lakah chuan indona a puang ta hial mai a, zirlai naupang dangte chu Jan Di chu hmusit turin a ti a, Jan Di chuan Gun Pyo lakah chuan ngaihdam dil a tum bau lo.

Mak tak maiin, F4 hotupa Gu Jun Pyo, vawi khatmah dodalna la tawng ngai reng reng lo chuan Jan Di chu engemawti takin a vei tan tlat a. Jun Pyo te thianho bula engemawti taka a tal tam chungin a hlawhtling mai thei tlat lo.

Jan Di chuan Jun Pyo chu pawisain engkim a lei theih loh thu hrilhin thian rinawm leh tha tak tak nei tur phei chuan amah ngei chuan a zir a ngai a ni tih a hrilh a, mahse, chuti chung chuan Gu Jun Pyo duh duh nei thei chuan Jan Di te angin a ngaina thei tlat lo chu mak a la ti zawk hle.

Chutiangin a film a kal zel a, Jun Pyo chuan Jan Di chu a hmangaih tial tial a, Jan Di pawhin a hnaih ve tial tial bawk.

Hmangaihna chu hmuh theihin a awm ta, chutih lai chuan Jun Pyo nu chuan an inkar chu a hre ta a, a duh lo hle. A theihna zawng zawng hmangin Gu Jun Pyo leh Jan Di te chu inthen tir tumin hma a la chho ta a, Jun Pyo tan chuan nupui tur thlengin a lo hualsak thul.

Chutihlai vel chuan F4 member dangte chu Jan Di lak luangliam an lo awm veleh bawk nen tichuan a in her kual vel a, Jun Pyo chuan a hriatrengna a hloh ta tlat mai a.....

A tawpah chuan Gu Jun Pyo leh Jan Di chuan hmangaihna chuan engkim a hneh tih chu an pahnihah thleng dikin soul mate an nih zia a langchhuak ta a ni.


Koo Hye Sun: Geum Jan Di angin a chang a, hmeichhe zinga F4 leader Jun Pyo chhang ngam leh hmachhawn ngam hmasa ber a ni a, hmeichhe zinga lar em em mai Red Card hmu hmasa ber a ni bawk. Mahse, chu’ng a huaisenna te vang chuan Ji Hoo nen an inngaihzawn phah a, chumi hnuah Jun Pyo nen chuan inhmangaih lehin F4 ho thian ber a ni zui ta zawk a ni.

Lee Min Ho: Gu Jun Pyo angin a chang a, F4 leader tawrawt leh ropui tak a ni a, Shinhwa Corp Group rochungtu tur mihausa chungchuang a ni bawk. Shinhwa Corp. billionaire naupang ber a ni a, high school a an kal laiin Jan Di nen hian an in tawng chho ta a, a nun tihhrehawm tum khan Jan Di chu a hmangaihta daih zawk a ni.

Kim Hyun-Joong: Yoon Ji Hoo angin a chang a, cool tak, tawng zawi sep mai leh Vialoin, Piano leh Guitar ngaina em em mai a ni a, Orchestra thlengina tui vek. Jun Pyo thian tha ber a ni a, Jan Di thinlung luahtu pakhat ve tho niin Jun Pyo nen an inchuh a ni deuh ber.

Kim Bum: So Yi Jung a ni a, F4 zinga an playboy ve dueh ber a ni. Chhungkaw hung tak artist chhungkua atanga seilian a ni a, amah pawhin pottery thiam hlein kum 16 a nihin hmingthanna khawp a siam tawh a ni. An hhungkua chuan pottery dawr lian leh ropui tak an nei.

Kim Joon : Song Woo Bin angin a chang a, an chungkua chu phalloh sumdawnna buaipuitu Mafia kan tiha ng chi te anni. Yi Yung nen an in bet fova, F4 playboy pakhat a ni ve bawk.

Kim So Eun: Chu Ga Eul angin a chang a, Jan Di thian tha ber a ni a, Kindergarten atanga inkawm chho tawh anni a, Jan Di nen an inkawm ngeih hle bawk.

Related Posts :