Monday, November 23, 2009

Naupangte Ni Remand Home-ah

Ni 14.11.2009 (Inrinni) kha Naupangte Ni (National Children's Day) a ni a, hemi ni hian Mizoram State Legal Services Authority buatsaihin Observation/Remand Home, Durtlang-ah Juvenile Justice (Care & Protection) Act, 2000 leh a kaihhnawih thil inzirtirna hun hman a ni. He hunah hian Marli Vankung, Additional Secretary (Law & Judicial) leh Member Secretary chuan chu hmuna naupang awmte chu nun kawng dik zawh leh thei an nih thu hrilhin fuihna thu a sawi.

Observation Home (Remand home tih thin) ah hian naupang kum 18 hnuai lam pawi tawk palhte leh dan kalhte an awm a, an nun siamthat leh beiseia dah an ni a, kum tling lo an la nih avangin anmahni hriat theihna tur thil leh an chanchin hi puanzar phal a ni lo nghe nghe. Tihpalh thil a pawi tawk palh an nih avangin nun kawng dik zawh a mi pangngai an nih theihna tura enkawl an ni.

Children's Day ah hian thu sawitu dang V.Vanlalruati, member, the Juvenile Justice Board chuan naupangte chu nun kawng dik zawh leh thei an nih thu hrilhin, eng eng harsatna pawh tawk mahse Pathian rin chhan a insiamthat an tum a nih chuan kawng dik an zawh leh theih thu a sawi a. An hun kal tawhah lo dai sual pawlh tawh pawh nise Pathian an belh a, tumruhna neih a pawimawh zia a hrilh bawk. Boruak tha tak hnuaiah he hun hi an hmang a, naupangte rilru pawh a khawih viau a ni.

Related Posts :



No comments:

Post a Comment