Chanchin Maksak 53

Hmangaihna mak
Khatia bawngchaw leina chungchanga police te'n Lalu Prasad Yadav-a an man khan, jail a luh dawn khan, a nupui, lehkhathiam lo, nu mawlmang ve tak mai chu chief minister atan ruat a ni mauh mai. Mite mak tih a hlawh hle a nih kha.

Hetia a nupui a ruat hi haw fe fe tawk pawh an tam a, a duh duha a kawihher theih tur a dah tia ngai an kat nuk mai. Tan in-a an khalhluh dawn lai chuan chanchinbumite'n an bawr nasa hle. Chanchinbumi pakhat chuan no lo zet hian, "Engati nge i nupui kher i thlan?" tiin a lo zawt a ni awm e. Ani chuan rang fe hian, "Tu nupui nge ka thlan chuang ang? I nupui ka rawn thlan te i ring reng reng em ni?" a lo ti tun tun a!


Hresual ve chiang
US president hlui George Bush-a hi thil hriat pelh phing pheng te pawh a ching hle. 2000-a president inthlan dawn, campaign boruakin a vawrtawp a thlen lai vel khan Canadian TV host pakhat hian a kawm (interview) a, chumi tum chuan Bush-a chuan Canada prime minister hming lamriin, thlan tlin a nih chuan ani nen hian tha taka an thawh dun theih a rin thu a sawi a ni.

A sawi tha viau, mahse, prime minister hming chu 'Jean Poutine' tiin a lam tlat; Jean Chretien a ni reng sia! Poutine te chu French-Canadian (French-ho, Canada rama inbengbel) ho chaw duh ber a ni lehnghal!

Related Posts :