BODY CARE

¢ Debbie Chawngthu

Vun mai bakah taksa enkawl dan hrang hrang kan tarlang tawh thin a, hmai massage dan i han tarlang ve leh teh ang ~~

1) Biang: I kutzungchal leh kutzunglai hmangin ‘laughter lines’ an tih mai, i nuih zawnga inrin lai atang khan a chho zawngin dimtein zut la, i bekah tawp ang che.

2) Mitko: I kut dinglam kutzungtang hmangin i chal lai takah a chho zawngin zut la, i bek lamah zut phei ang che. A hma ang bawkin i kutzungtang veilamin ti leh ang che.

3) Bek: I kutzungchal leh kutzunglai hmangin nuai kual la, i nuai laiin maimitchhing thin ang che.

4) Mit: I kutzunglai hmangin dim thei ang berin nem la, i mit ko lamah nuai chhuak rawh. I mit vun chunglam leh hnuai lam dimtein massage ang che.

5) Nghawng: I kut pahnih hmangin a chho zawngin nuai la, reilote hnuah a chhuk zawngin nuai leh ang che. I nuaiin dim la, i vun pawt zawngin nuai suh.

6) Khabe: I kutzungchal leh kutzunglai bawk hmangin i khabe ruh tawp thlengin nuai phei rawh.

7) Biang: I kutzunglai leh kutzungu hmangin a chho zawngin nuai ang che.

A chunga kan tarlan tak te khi hmai massage na tur emaw lotion hmanga tih tur a ni a, a tira thiam nghal mai loh pawhin awlsam taka thiam mai theih a ni. Kan hmai kan massage dan a dik loh chuan vun chuar tur ven ai mahin vun kan ti chuar belh thei a, fimkhur hle tur a ni.

Kan inchei hian mitinin kan hmai hi kan uluk ber fo a, hmai hnawih chi reng reng bur lian tak ai chuan bur te leia hman zawh hnuah a thar lei leh mai hi a tha zawk a, vun pawhin a ngeih zawk a ni. I hmai i chei hmain fai takin phih phawt la,hmai balah chuan make-up hmang lo hram ang che. Cosmetic brush hi kan hmang vek lem lova, a hmang thang tan erawh a zawngchhang thlak khawp mai. Brush hman chuan inhnawih a rualin a lang nalh duh a, blusher leh powder hman nan a tha a, lipstick brush pawh a awm ve leh zel hi. Brush hmang thin i nih pawhin a fai thei ang berin dah la, chuti lo chu hmai bawl leh vun thak te a siam thei a ni.

Nalh tur chuan taksa hi enkawl ngun a ngai a, amah ringawta nalh tir kan tum chuan kan ti fuh lem lo ang. Sam cut hi mi tam tak chuan uluk nachang an hre lo a, an lan that tur angin an lang tha lo thin a ni. Taksa dang nalh mahse kan sam put kan inhmeh loh chuan a dik thei lova, chuvangin kan sam hi chu kan taksa nalhna tura kan enkawl that a ngai ani. Ha(teeth) hi kan dam chhung daih tur anih avangin kan enkawl that a ngai a, fai taka dah mai bakah kan hahni thlengin a hrisel nge hrisel lo hriat a tha.
Mit tha lo nei i nih chuan entir rang la, tarmit emaw lense i mamawh anih chuan vuah ang che. Mawi loh hlauh vanga tarmit bun duh loh te hi thil atthlak tak a ni a, kan khaw hmuhna hi a pawimawh em em ani tih hriat reng a tha. Mit hrisel lo chunga tarmit bun loh chuan mit vun te hi a chuar hma bikin a val duh em em a, min ti hmelhemtu pakhat a ni thei. I mit i hmang rim viau anih chuan tuilum 600 ml-ah chi fiante khat pawlh la,chumi hmang chuan lapuain i mit hru thin ang che. I lu chet miah lovin i mitmu ti kual la, chumi zawhah i kutzungtang pakhat 20cm vela hlaah dah la, reilo deuh hnuah hmun hla tak en leh rawh. Hetia i tih peih chuan i mit a hrisel sawt ang. Nisaa i kal dawnin nihliap i khum loh pawhin sunglass vuah hnem ang che.
Hriselna atana kan taksa mamawh chu ei leh in tha mai bakah exercise lak that hi a ni a, exercise lak awl ber kal (walking) hi ti thin ang che. Kal hi pawng kal hlawk hlawk nilovin thui tak kal pawha hah lutuk lova kal tur a ni. Kal lai hian taksa ngil taka dah tur ani a, i kal laia i hah anih chuan chawl mai lovin kal muang zawk ang che. I hahdam hnuah i kal dan pangngaiin i kal leh mai dawn nia.

Sam enkawl dan kawngah i han peng leh hrih ila, shampoo leh conditioner te hi lei tur tha tak tak awm tawh mahse mahni duh dan ngeia siam duh tan a siam dan hrang hrang te han tarlang teh ang...

1. Rum shampoo: Artui chhungmu pahnih,oil leh rum fian lian hnih chawhpawlh la, chu chuan i sam leh lu lei massage ang che. Darkar khat i chiah hnuah tui lum pep pepin tleuh leh ang che. Hei hi sam ro emaw luphut nei tan a tha bik a ni.

2. Egg shampoo: Artui hi protein awm tamna anih avangin sam tan a tha em em a, hmanlai atanga shampoo siam nana an hman ber a ni. Artui chhungmu pahnih la la, chu chu tuisa no khatah chawk phuan ang che. Thingpuife thlitnain thli chhuak leh la, chu chu I lu lei leh samah hnawih ang che. Darkar khat i chiah hnuah tuilumin sufai leh mai tur a ni.

3. Conditioning shampoo: Shampoo pangngai fiante hnih leh artui pakhat chawhpawlh la, conditioner tha tak i nei a ni mai.

4. Quick hair conditioner: Artui pakhat, castor oil fian hnih, vinegar fiante khat leh glycerine finate khat ngun takin chawhpawlh la, i lu lei leh samah hnawih ang che. Towel tuisaah chiah la, sawr fe lehin chu chuan i lu minute 15 vel tuamin sufai leh ang che. He conditioner hian sam a ti lang tamin a ti nem a, a tih tlet mai bakah enkawl a awlsam phah bawk.

5. Honey conditioner: Artui pakhat chawk phuan la, khawizu fiante khat leh oil fiante hnih telh la. I lu lei leh sama i hnawih zawhah tui huin ur ang che. Samah khawizu a bet nghet ve thei a, uluk takin tuilumin sufai leh ang che.

6. Alcohol conditioner: Artui chawk phuan la, chutah chuan zu telh ang che. I lu lei leh samah hnawih minute 10 hnah su ang che. Hei hian sam a tih nalh mai bakah sam a ti thang chak bawk.

Related Posts :