Friday, November 13, 2009

BEAUTY BASICS

¢ Debbie Chawngthu

Q. Ka hmai vun hi a lang upa tawhin a chuar tawh a, hmai chuar tihreh nan engtinnge ka inenkawl ang? Facial hi engnge a thatna leh tangkaina, hmai chuar a ti reh thei em?

= A hmasain hmai vun lang naupang leh mam nei tur chuan inenkawl ngun mai bakah hun a duh rei ve tih hriat a tha a. I zawhna atang hian kum upa lam i nih a rinawm a, chuvangin vun ro tawh tana inenkawl dan kan tarlan tawh te kha lo bihchiang leh ang che. Kum upat chuan kan vuna mawm siamtu a tlem tial tial a, vun a rovin a chuar hma ta thin ani. Hmai chuar laka inveng tur chuan kum a la tam hma atang inenkawl a tul a, anih loh chuan hmai chuar tawh hi tihreh leh mai a har em em a ni. Engpawhnise, kartin vawikhat anti-wrinkle face mask lo hmang ziah la, i hmai fai taka dahin i hmai i phih zawhah moisturiser hnawih ziah ang che. Lotion pangngai hmang lovin vun ro leh chuar tana siam lotion chauh hmang bawk ang che. I hmaia lotion i hnawihin a chhuak zawngin nuai la, i mit bawr phei chu dim hle ang che. Mit bawr a chuar hian kan lang tar ve thei a, chuvangin under-eyecream hman a pawi lo. Hmai chuar tan chuan egg peel-off face mask hi a tha em em a, kartin vawikhat lo hmang thin ang che. I hmaiah hnawihin a ro thleng nghak la, i khabe atanga tanin a chho zawngin khawk ang che. Chumi hnuah tui lum pip pepin i hmai chu phihfai la, moisturiser i hnawih leh dawn nia. Egg peel-off face mask hi lei tur a tam tawh a, lei a remchang mai lo anih chuan artui var lai hi i hmang dawn nia. Olive oil hi a tha em em bawk a, i hmai leh nghawng massage nan lo hmang thin ang che. I hmai i massage reng rengin a chhuak zawng hlirin massage la, i mit bul phei chu dim thei ang berin massage ang che. I nghawng i massage chuan a chho zawng chauha massage tur a ni. Regular taka i hmai leh i ngawng i massage chuan i vun chuar chhe mai tur i veng thei ang. Tin, vun enkawlna kawngah hian hmanhmawh loh tur a ni a, i vun a lo chuar sa tawh anih phei chuan hun a duh rei dawn tih hria la, dawh thei takin i inenkawl reng dawn nia. Hmai chuar tur ven nan leh lan naupan i duh chuan hmai bawl lakah i inven a ngai a, arngeng i neih loh nan nitin tui no 8 tal in ziah la, i ei leh inah fimkhur bawk ang che. Thla 2/1 chhung chu nitin i hmai kha khawizuin darkar chanve chhung lo chiah ziah bawk ang che. Mut kham loh hian kan mit a bui a,vunin a tuar bawk thin. Chuvangin,i taksa mamawh tawk mu ziah la, zing thawh velah minute 20 tal i duh danin i taksa sawizawi bawk ang che. Cigratte hian kan hriselna a ti chhe nasa a, vun a ti chuar nasa thei bawk a, cigratte zu mi i nih pawhin a tlem thei ang ber zu ang che.

Facial hi vun tihfaina atan a tha em em a, hmai bawl leh chuar tan pawh a tangkai bawk. Mahse vun no (sensitive) skin i nei anih chuan tih zin lutuk a tha lem lo. Regular taka i ti anih chuan i vun a mam mai bakah a chuar nep ngei ang. A tirah chuan beautician tih tir la, chumi hnu ah i vun mila hnawih tur hriain nangmahin i ti ve leh thin dawn nia.

Mahnia egg mask i siam duh anih chuan hetiang hian siam ang che ~~ Artui chhung mu la la, chu chu bawnghnute fianhnih leh khawizu fiante chanve nen chawhpawlh la, i hmaiah minute 20 chhung chiah ang che. Chumi hnuah tui lum lep lepin i hmai chu phih la, moisturiser inchulh leh ang che. Khawih danglam ngai miah lova moisturiser ni nghal chu khawizu a ni a, khawizu hlanga hmai chiah pawh hi a tha khawp mai.

Q. Arngeng var chi (whiteheads) ka ngah riau mai a, a tihreh dan min hrilh thei em?
= Heng arngeng lo awm nachhan hi chu mawm lo chhuak tur vuna a chhuah tlang theih loh vang a ni a. A lo chhuah theih loh avang khan a var ta pep thin a ni. A then chu massage leh steam hnuah a reh ve mai thin a, a thente erawh chu hmur awm si lovin a awm reng ve bawk thin. Hetiang hmur awm lo hi chu khei a ngai a, mahnia khei lovin a thiam te chauh khei tir tur a ni. Arngeng var hi chu hmai mawm nei ten an nei tlangpui a, face-wash hmanga hmai phih ngun a ngai a, hmai phih zawhah toner-in hmai hruk leh tur a ni. Tweezer hmanga pawh chhuah hi a tha lo hle a, a darh duh mai bakah ser(scar) a siam thei a ni. Whiteheads nei nasa tan chuan face scrub hman a tha a, nikhat danah i hmai phih rualin i hmang thin dawn nia.

TIPS
1. I vun mam leh no tura i duh chuan lapua bawnghnuteah chiah la, chu chuan i hmai leh nghawng hru chhuak la, darkar chanve hnuah tui lum pep pepin i phihfai leh dawn nia. Nitina hruk pawh a pawi lo.

2. Alu hi rawt sawm la, a tui sawr chhuak rawh. Chu chu i hmai chiah nan hmang la, zankhuaa chiah pawh a pawi lo.

3. Olive oil leh artui chawhpawlh la, i hmai leh nghawngah hnawih rawh. A ro thleng nghak la, chumi hnuah lapua tuiluma chiah hnawmin hru ang che. Hei hian nasa takin vun chuar tur a veng thei a ni.

4 Artui chhungmu pakhat, sertui leh olive oil chawhpawlh la, chu chu i hmaiah hnawih rawh. Hei hi vun thap tan a tha a ni.

Related Posts :



4 comments:


  1. Thanks for sharing information

    Radiant beauty is what emanates from a fit and healthy body. Our programmes not only work towards enhancing your beauty momentarily, but aim to equip you with wellness for life.




    ReplyDelete
  2. VLCC offers personalized, solution oriented beauty, skin and hair therapies with necessary interventions and treatments being administered from time to time by experts. Beauty Basics

    ReplyDelete
  3. VLCC offers personalized, solution oriented beauty, skin and hair therapies with necessary interventions and treatments being administered from time to time by experts. Beauty Basics Services

    ReplyDelete
  4. VLCC offers personalized, solution oriented beauty, skin and hair therapies with necessary interventions and treatments being administered from time to time by experts. Beauty Basics Services

    ReplyDelete