Friday, November 13, 2009

Aizawl-a Lo Kal Tur Shillong - Lajong FC

¢ Hmingsanga

November ni 14 a lo thleng ang a, chutih hunah chuan India ram club leh club-te elna sang ber I-League khel phak club Shillong Lajong Footbll club leh Mizoram XI te chu Lammual-ah an inkhel dawn.

Mizoram hian India ram club tha leh lar lo a lo hmachhawn ve fo tawh. Mahse, chu'ng chu Mizoram pawnah deuh hlir a ni. Kan tualzawl ngeia kan hmachhawn ve thinte lah junior team tih ang deuh vel mai kha an ni thin. Tun tumah erawh I-League khel pha zingah pawh a mawng phah lam ni lo, table laihawl vela awm mek Shillong Lajong an ni. Tun tumah erawh chuan a dan a dang dawn. Shillong Lajong te chu India ram club tha dangte an hmachhawn ang chiah khan Mizoram XI te chuan an hmachhawn dawn a ni.

LAJONG ZAWNG ANG
Shillong Lajong hi kum 1983-a din a ni a, I-League khel zingah chuan Mizo player fuankhawm tamna ber club a ni. Tunah hian Mizo player pasrih an khel mek. Season hmasa khan II Division atangin I Div league-a khel thei turin an inhlangkai a ni.

A tir lamah beiseina sang tak nei chungin beisei an pha lo deuh a, tunah hian beisei nung nei thei turin table lai hawl velah an inham tang mek. Club thar inhlangkaite hi champion tura beisei ngam chi an ni lo tlangpui thin. Season tharah dividion hniam lama tla thla lo tura theihtawp chhuah hi an tih tur ber pakhat pawh a ni reng a ni.

II Division atanga an inhlan kai tan tirh khan sum leh pai lamah pawh chuti takin an intodelh lem lo ang. Mahse he club neitu hian India hmarchhak footballer tha te khawmin I legue khel phak khawp team a din chhuak thei hi a fakawm hle. Hetia an inhlan kai hnu hian, mak tak maiin he club tih larna atan company lian ho an rwn inlar t sup sup a. An thuam thil chu Adidas in kan lo tum nge an ti a, Kingfisher leh McDowell’s ten sponsored lam kan tum nge an ti bawk a. Nokia hoin in jersey hmaah hian Nokia tih kan lo ziak ang a, sum kan lo tum ve ang an ti bawk a, chu chauh a la nilo Kolkata-based newspaper, India rama chanchinbu darhzau ber te zinga chhiar tel ngam tur The Telegraph chuan an rawn sponsor bawk a. Heng bakah hian duhsaktu sum leh pai a tanpui theitu an nei nual bawk.

India hmarchhak atanga I-League khel thei club awm chhun Shillong Lajong chuan sum leh pai pawh season hmasa ai chuan a nei tam ta deuh a, player tha pawh a lei ve ta nual. Player thar chauh ni lo coach thar tawnhriat ngah tak Services, Salgoacar leh East Bengal coach pawh lo ni tawh Stanley Rozario an nei thar bawk. Skill nei tha, thahrui leh tharum ngah tak tlangmi tel tamna a ni. Hei hi an chakna hnar pakhat pawh a ni reng a ni.

India rama football club thate hi a tlangpuiin Bengal leh Goa-a mite deuh vek an ni. India ram hi cricket tuipuiin a chhim mup mup laiin, football ngaihsanna state awmkhawm ti mai ila, North East state atanga India ram club tha te el phak kan neih chhun Meghalaya-in a rawn hring chhuak ta nawlh hi, North East state dangte pawhin an lawmpui a, North State aiawhah kan ngai. Lajong avang hian Indian football ngaih hlutna chang hria, India hmarchhakah hian an pung chho ang a, an la pun belh zel bawk ang.

India hmarchhak aiawhtu Lajong chuan ngaihven an hlawh hle. India ram football hmunpui Kolkata khelh thin IFA Shield khel turin IFA pawhin a sawm a. Eng ang tiat chiah nge season tharah an nih dawn tih fiahna remchang a ni zui bawk. Lajong football club-in fiahna hmasa leh langsar ber chu IFA Shield kha a ni awm e. Mahse beisei an phak lo hle. Chuti chung chuan Durand Cup khel turin sawm an ni leh hlauh. IFA Shield ngawt ai chuan an dinhmun a tha ta deuh a, Durand Cup-ah hian Mahindra United, East Bengal te nen awm tlangin, an match hmasa berah Mahindra United nen an in-draw a, East Bengal phei chu an hneh hial. Mahindra hi goal difference-ah an that zawk avangin an group-ah hmahruaitu an ni ta zawk. Chuti chung chuan I - League khel tur Indian football-a hmel thar Lajong Shillong chuan beiseina an nei thar a. Hma lama eng awm chu umin theihtawp an chhuah chhunzawm chho ta a ni.

II Division League an khelh lai khan, media thenkhatin an tarlan danin, an budget pawh Rs. 2.5 crore vel nia sawi a ni a, season tharah hian Rs 3.5 crore aia tam mah an budget a ni tawh nia sawi a ni bawk. Player pawh an inla thar hnem hle. Meghalaya atanga footballer larchhuak chu an hui deuh vek a, he'ng bakah hian thenawm state Mizoram, Manipur leh Assam atangin tualchher player thate an hui deuh vek bawk. Anni bakah hian foreigner player-te pawh an nei ve ta bawk.

India hmarchhak aiawhtu an nihna chu kawng hrang hranga tarlangin Shiilong Lajong chuan an logo pawh thlak danglamin, India hmarchhak map lang telin logo thar an nei a. Kawng hrang hrangin an inher rem chho zel a. Khelmual chhungah theihtawpin an in thuam tha a, khelmual pawn lamah pawh mumal leh awmze nei zawkin an kal chho zel bawk a.

India ramah footballer-te contract chungchangah sawi leh sel tur a awm ta zauh zauh a. Hlawh leh contract inpek mumal loh vangin player lungawi lote thawm hriat tur pawh a tam reng a. He'ng avang hian Shillong Lajong General Secretary Larsing Ming Sawyan chuan Player te contract an ziah pui danah an fimkhur a, player te thatna turin theihtawp an chhuah tih a sawi. India ram club thenkhatah chuan club official ten an player duhzawng an la khawm a ni. A rem fel leh enkawl hna coach ten an thawk thin a. Hei hi team tha tak ni thinte chhiatpui a ni fo reng a ni. Hemi chungchangah hian Larsing Ming Sawyan chuan, "Player kan lak tharte chu coach-in tha a tih ang zelin lak an ni thin a. A player duhzawng a sawi chu keini'n kan bawhzui thin a, thu tawp siamtu chu Stanley hi a ni," a ti. Professional club ang tak takin Shillong Lajong hi enkawl tum mek a ni. Marketing, Administration, merchandise lam enkawl tur te pawh siam chhoh zel an tum bawk.

Shillong Lajong team coach Stanley Rosario chuan India hmarchhak tlangval tamna football club enkawl chu a tan thil thar ni mah se, Shillong Lajong atang hian thil thar tam tak a chharchhuak niin a sawi.

Stanley Rosario chuan, "Ka player tam zawk hi hmarchhak tlangval te an ni a, Meghalaya, Mizoram, Manipur, Assam a mi te an ni a. An tuar a fei a. Fighting spirit an nei tha a. Hmun danga player te ang lo takin hliam tenau deuh te hi chu an pal 'dai' mai thin a. Hei hi an danglamna pakhat niin ka hria a. Inkhelh an chak," tiin Pune FC nen an inkhelh hmain amah kawmtu media mite hmaah a lo sawi chhuak thawh nghe nghe a ni.

Engtin nge I-League-ah an kai?
II Division league Gurgoan-a khelhah Shillong Lajong te hi Group A-ah awmin vawi 4 khelah vawi hnih chak leh vawi hnih draw neiin point 8 an hmu. An khingpuite lamah goal 7 thunin an lamah goal 5 a lut. Group A ah pahnihna niin final round khel turin an inhlang kai. Final round-ah hian Salgaocar Sports Club, Viva Kerela, Pune FC, ONGC Mumbai, Sesa Football Academy te nen inkhel kualin vawi nga khelhah vawi thum chakin vawi hnih an chak lo a, an khingpuite lamah goal 7 thunin an lamah goal 5 a lutin, point 9 hmuin club paruk zingah pathumna a awm a. Tichuan club paruk zinga point hmu tha pali, Salgaocar Sports Club, Viva Kerela, Shillong Lajong leh Pune FC te chu I div I-League khel turin an tling ta a ni.

Player To Watch
Anil Gurung: I-League khelh mekah Shillong Lajong chuan AFC quota-in Nepal international striker Anil Gurung chu kum thum chhung atan contract an ziahpui a. Kum 21 mi Anil Gurung hi Chelsea FC reserves team leh minor division club Woking FC-ah pawh lo khel tawh thin a ni.

Woking FC hian a ngheta lak an duh viau laiin Nepal hi FIFA ranking-ah no 70 hnuai lamah an awm vangin work permit a nei theih loh vangin Woking FC-ah hian a khel thei ta lo a. Anil Gurung hi England-a a kal hma hian Nepali club tha Sahara Club, New Road Team-ah te lo khel tawh thin a ni. Tunah hian Nepal senior team-a an striker rinrawl ber a ni.

Aibor Khonjee: India tan age group hrang hranga lo fehchhuak tawh a ni a, U-19 team-ah phei chuan captain te pawh lo ni tawh a ni. Kolkata club lar East Bengal leh Mohun Bagan-ah te pawh a lo khel tawh bawk a ni.

Gumpe Rime: Arunachal Pradesh atanga footballer piang tawh zingah ani hi a tawng sang ber a ni hial awm e. India ram club hrang hranah a tei kual nasa ve tawh hle. India hmarchhak atangin Kolkata, Goa, Mumbai-a club hrang hrangah te pawh lo khel kual tawh a ni. Age level hrang hrangah India aiawh a lo lo khel tawh thin a ni.

Daniel Bidemi: Chirag United atanga an lei chhuah a ni.

MIZORAM LAM VE THUNG
India rama football club upa ber pawla chhal ngam, Guwahati Town Club kum 103 tlin lawmna Airtel 2nd GTC Invitation Football Tournament, Guwahati-a khelh zawh takah Mizoram XI chuan final-ah an khingpui Sunrise Athletic Club, Guwahati chu 2-1 hnehin champion an ni a. Khami tuma Mizoram player tam zawk leh midang player thate remkhawm chuan Shillong Lajong hi an hmachhawn dawn a ni. Mizoram team-ah hian tunhnaia khelh zawh tak ONGC Cup final a chak zo ta lo, Mizoram team-a mi Top scorer Ghanian striker Yeboah te, Nigerian strker Peter leh midfielder Abu ten an khel dawn a ni.

Team pahnih player-te hi an awllen lai ni lo, league/tournament an khelh mek lai a nih avangin an fit hlawm hle a, chuvangin he inkhel hi hmuhnawm hle tura ngaih a ni.

Shillong Lajong FC hi India rama football league sang ber I-League-a khel mek an ni a, Table-ah a laihawl an hauh phak. Hmarchhak player deuh vek an ni a, an zingah chuan Mizo tlangval 7 an awm nghe nghe. Mizo tlangvalte hi tun dinhmun, I-League an khelh theihnana thawhhlawk ber an nih avangin Lajong FC neitupa Larsing Ming chuan Mizote hnena lawmthu sawinan, "Vawi khat na na na chu Aizawl a inkhelh hi kan ba a ni," tiin he Football Match hi MFA chuan a lo ruahman ta a ni.

Mizoram XI-ah hian GTC Airtel Trophy, Guwahati-a neih zawh taka Best Player Peter Eriqbe (Nigerian) bakah kar hmasa maia khelh zawh tak, ONGC Cup, Agartala-a top scorer Yeboah Kwabena (Ghanian) leh kumin Independence Day Celebration Football Tournament, Aizawl-a Best Player Abu Bakar Al-Hassan te an tel dawn. Lajong FC ah pawh hian Foreign player tha tak tak pathum an tel dawn nghe nghe. Hei vang hian inkhel hmuhnawm tak kan hmachhawn mek a ni.

MFA hruaitute chuan he inkhel en tur hian mi zawng zawng a sawm. I - League club khel kan tualzawlah man tlawm tein kan en ve thei dawn tihna a ni. Naupang kum 14 hnuai lam tan phei chuan inkhel en man hi a awm lo ang.

I-LEAGUE KHEL ENTU PUNG
Football ah chuan inkhel entu te hian awmze thui tak an nei a. A chang chuan 12th man of the home team tiin sawi an ni thin bawk a.National team coach Bob Houghton pawhin Nehru Cup khelh lai khan Ambedkar stadium khat thlat mipui pungkhawm hmaah hian India chuan Asian powerhouses Australia, Japan leh S.Korea te pawh hneh thei tur khawpin chakna kan nei ang ti hial in a lo sawi tawh a nih kha India ramah Kolkata derby te chuan hlawh leh hlut a hlawh viau laiin India ram hmun dangah chuan club tha te inkhel pawh hlut leh hriat a hlawh tehchiam lo thin a.

Kuminah erawh Indian football-ah thil thar a thleng chho mek. Kum dang zawng aiin I-League khel a hmuna entu nasa takin an pung a. Hei hi a chhan langsar tak pakhat chu Pune FC, Shillong Lajong leh Viva Kerala te vang kan ti lo thei lo ang.

Kai thar zingah Shillong Lajong hian inkhel entu an nei tam lawr lak. Tun hnai khan an home-ah match thum a zawnin an inkhel a. Hengah hian mi 30000 vel zelin inkhel hi an en nia sawi an ni. An home match hmasa ber Air India nen an inkhelh tum phei chuan an chakna thahruai pakhat chu inkhel entu mipuite kha an ni chiang khawp mai. Chumi hnuah Mohun Bagan nen an inkhel leh a hemi tum pawh hian inkhel entu an tam hle.

Pune FC hi professional club ang tak taka kal tum leh kal mek an ni. An club kalphung pawh a mumal viau. Pune FC ho home match hmasa ber East Bengal nen an khelh tum khan Pune home ground Balewadi Sports Complex h khan mi sing chuang an pungkhawm a. Chumi hnuah match dang an thlen ah pawh inkhel entu hi an tam thei hle bawk.

Viva Kerala hi South India aiawhtu an ni ve bawk. Football ngaihsanna state a ni bawk a. Inkhel entu an tam thei hle a. An home-ah chuan inkhel entu ngah ber te zing a mi an ni bawk.

Pune leh Lajong te hian khawvel hmun danga club te tih dan entawnin season ticket an hralh a. Heng bakah hian an club chu theihtawpin an chhehvelah an ti lar thiam bawk. Fan base-in thil tam tak an kalpui hi a fuh chhoh zel phei chuan nakin lawkah chuan awmze nei tham sum leh pai lakluhna tha tak an nei chhunzawm ang. Nakin lawkah chuan India ram club zinga sum leh pai hai lut tam ber pawh an ni lo ang tih sawi theih miah lo a ni.

Churchill, Dempo, JCT te pawhin kum dang ai chuan inkhel entu an hmu tam ta bawk a. Maharastra atangin Mumbai FC leh Mahindra United te pawhin kum dang aiin inkhel entu an nei tam hi thil lawmawm tak a ni.

Kolkata derby chu sawi loh a leng a ni. India ram mai nilo khawvel huap pawhin inkhel entu tamna a ni reng thin a. Tunhnai khan Mohun Bagan leh East Bengal te inkhel kha a hmunah mi sing riat chuangin inkhel an en a. Hei hi chu an kumtin dan a ni. Hetiang zat hi inkhel entu hi khawvel hmun dangah pawh an tam lem lo.

Hun kal tawhah khan Indian football hi TV ah hmuh tur mumal kan nei ngai lo a. Tunhnai kum hnih khat kal ta atang khan Zeesports kaltlangin TV ah inkhel entur mumal kan nei ta a. Hei hian Indian football tih hmasawnna kawngah leh vawrh larna kawngah an pawimawh hle.

Related Posts :



1 comment: