August ni 30 zanah khan Durtlang leitan veng tlangval pakhat a inawkhlum a, August thla chhungin Aizawlah inawkhlum pariat an awm ta der mai.
August thla chu Mizo chuan Thitin kan ti a, mitthi thlarauin khawvel chhuahsana pialral a pan hun tihna a ni. Mizo danah chuan thla serh a ni nghe nghe. Thitin thla, mitthi thlarauin khawvel a chhuahsan thlaah Aizawlah mi 8 an inawkhlum a nih chu.
WHO leh International Association for Suicide Prevention (IASP) bultumin UNO chuan kumin September ni 10 hi mahni intihhlumna laka invenna ni - World Suicide Prevention Day-ah a puang a, September thla hma chiahah Aizawlah chuan mi 8 an inawkhlum a nih chu.
CID (Crime Branch) te'n an chhinchhiah dan chuan kumin January atanga July thleng hian Mizoramah inawkhlum mi 16 an awm tawh a, heng zinga 13 chu mipa an ni. Mi 16 zinga a zatve zet chu Thitin thlaa inawkhlum an ni.
A number zawng chuan 8 hi a tam lem lo a ni mai thei; mahse, Aizawl mihring zat atanga teh chuan, thla khat chhungin mi 8 an inawkhlum tih chu a 'neu' hauh lo. Mi tam takin mak an ti a, chanchinbu lamah inawkhlum an awm thu chhiar tur a awm deuh reng mai chuan sawi pawh a hlawh hle.
WHO (World Health Organisation) chuan 'depression' hi rei lo teah khawvel pumah natna tlanglawn a ni dawn tiin an chhut a, mite'n rilru leh thinlung hrisel an neih theih nan hma pawh an la viau nghe nghe. Rilru lama natna veite'n nun an ning a, mahni an intihlum thin. Chutiang laka inven chu mithiamte chuan an ngai pawimawh a, khawvel hi chutiang lakah chuan chhanchhuah a ngai an ti a ni.
Mizoram pawh chutiang lakah chuan chhanchhuah a ngai a, nunna hrui chu tuin nge thlung ta ang?
Monday, September 7, 2009
Nunna hrui thlung r'u
Subscribe to:
Post Comments (Atom)
No comments:
Post a Comment