Monday, September 7, 2009

Nun ningte chhan an ngai e

Tun hnai kum 3 - 2006-2008 chhung khan Mizoramah mahni intihlum an tam ang reng hle. CID (Crime Branch) te'n an chhinchhiah dan chuan 2006-ah khan Mizoramah mahni intihlum mi 70 an awm a, 2007-ah 28, 2008-ah 41 an awm. A tlem ber kum 2007 hi Mizorama inawkhlum naupang ber tia sawi, kum 13 mi a inawhhlum kum kha a ni.

2006 atanga 2008 thlenga intihlum zingah hian kum 15 leh kum 29 inkar an tam ber a, 60 an awm. Kum 30 leh 44 inkarin an dawt a, 54 an awm. Mahni intihlum zingah thalai an tam ber tihna a ni a, YMA member an tam ber ti pawhin a sawi theih ang. Tin, KTP member rual vel an tam ti pawhin a sawi theih ang.

Kum 3 chhunga mahni intihlum zingah hian inawkhlum an tam ber a, 95 an awm. Vaiho hian tuia zuanthlak leh mahni inhal te an ching a, kum 3 chhung hian Mizoramah mahni inhalhlum an awm lo. Tuia zuangthla erawh 3 an awm. 2006-ah khan mipa 3 chu tuia zuangthlain an intihlum a, kum 15 leh 29 inkar mi 2 leh kum 30 leh 44 inkar 1 an ni. Khawl hmanga intihlum mi 2 an awm; 2008-ah khan mipa 2, kum 15 leh 29 inkara mite chu khawl hmang hian an intihlum a ni.

Social works lama mithiam PL Liandinga chuan, “Heti tak maia mahni inthat an tam hi chuan ngaihtuah a tithui khawp mai,” a ti.

“Depression a awm tihna a ni mai a, depression nei an tam hle tih a lang reng bawk,” tia sawiin, “Beidawnna a awm a, ram kalphung, job opportunity-ah leh thil dang dangah thalaite hi an beidawng a ni kan ti thei ang” tiin a ngaihdan Zozam Weekly a hrilh.

“Stress sang lutuk te, rilru hah rimtawng te, administration chhia leh sorkar kalphungah te, khawvel an hman danah te an lungawi thei lo a ni,” a ti.

“Beisei tur neih loh chhan an nei thei a. Media te'n ram kalphung an project dan a thim lutuk a ni thei a, an thil hmuh leh hriatte chuan eng aiin thim lam a awn zel zawk pawh a ni thei,” a ti bawk.

Chhungkua erawh a dem vak lo a, “Chhungkua erawh dem a har lutuk mai thei. Strong culture engmah nei lo kan nia, chhungkua pawh tih dan phung inang lo leh danglam identical situation a awm chuang lo. Thui lutuk chuan chhungkua chu a mawhpuh theihin ka hre lo,” a ti.

“Zirlai tam takte rilruah hian 'zir vak vak mah ila sawipuitu leh tihpuitu ka neih si loh chuan ka tling chuang lo ang tih rilru hi a lian lutuk a, hetia kan rin phak bak ai hian a lian a ni. Hei hi thil tha lo tak mai a ni a, ram inrelbawlna dik lo hrinchhuah a ni. Kan thalaite'n hetiang ngaihdan hi an neih chuan kan ram chu a chhe viau tihna a ni mai,” a ti.

“Ruihhlo do pawh hi a tel thei ang. Zu kan do nasa a, khawvelin a do si lo. Zu do kan puang a, khawvelin a do si lo,” tia sawiin, “Zu ni lo ruihhlo dang tih hi kan thalaite'n an ti hreh a, sual lian tak niah an ngai a. Mahse, zu chu kan do nasa mai bawk si. Rilru chi-ai takin an awm a, chutih laiin kan sakhaw hruaitute lah thil dang dangah an lo fihlim leh bik si lo. Dik tluantling an hmu bik lo a, rilru tawt takin an awm a ni,” a ti bawk.

“Thalaite hi dem ngawt theih pawh an ni lo, thalaite khawvel siam tur kan ni a, kan siamsak thei tak tak si lo. Sorkar hmalakna a hlawhchham hian a tuartu chu mipuite kan ni. Kan thalaite hi nakina kan ram leh hnam lanna tur an ni a, an khawvel kan siamsak hi beidawnna a nih chuan a pawi khawp ang,” PL Liandinga chun a ti.

Psychiatrist Dr C Lalhrekima chuan tun hnaia mahni intihlum pun hluaina chhan chu a hriat bik loh thu a sawi sawiin, “Engvangnge tih ka chhui lo” a ti a, “Mahse, mi tu pawh amah a intihhlum chuan ama tana rit em em mai a nei a, chuta ta chu kalsawn a duh a ni kan ti thei ang,” a ti.

“Mahni inthah chhan hi kawng tam tak a awm thei ang a. Depression, thinrimna nasa tak, phuba lakna te pawh a ni thei” tiin mahni intihhlum chhan thenkhat a sawi.

"Tun hnaiah tleirawl te te mahni intihlum an tam hle mai a. A chhan ka hre lo," a ti a, “Mizote hi 'emotion control'-ah kan sang lo a ni,” a ti.

“Emotion control-ah hian kan puitling lo em em mai a, kan thiam lo bawk. Thil kan duh pawhin nasa em emin kan duh huam huam a. Ngaihzawng kan neih pawhin a ni tho, eng thilah pawh kan inpe tawp hreh lo. Chu chu sex thlengin a ni a, kan ngaihzawngte tan kan inphal mai a,” tiin a ngaihdan a sawi.

“Inngaihzawn hi thil thiang a ni a, inthen leh pawh thil thiang a ni. Mahse, chutiang a thlen chang chuan kan 'emotion' kan control thiam tlat loh avangin kan awm thiam ta thin lo a ni,” a ti.

“Thinrim thei kan ni a, kan thimrim pawhin kan thunun thiam a ngai a ni. Engvangin nge kan emotion hi a puitlin loh em em tih hi a chhanna ka hre bik lo,” a ti.

“Nu leh pa kan demawm thei hle ang. Kan fate kan enkawlna kawngah tih dik loh kan nei a ni thei a. Chutiang bawkin society pawhin kawngro a su thei a, kan chhehvel thil kan tawn leh thleng mek pawhin kawngro a su thei bawk. Thil chiang tak erawh chu kan emotion control-ah hian kan sang lo em a ni,” a ti a, “Nun kawng dik inzirtirna hi chhungkuaah kan uar tawk lo,” a ti bawk.

“Ngaihzawng neihte hi thil thiang a ni a, inthen leh te pawh hi thil thiang a ni. Nunphung pangngai a ni a, chu chu kan hrechiang em em tur a ni,” tiin hmangaihna lama rilru nat vanga intihlum an awm thin chu pawi a tih thu a sawi.

“Mahni inrintawkna kan neih a ngai a, chu chu chhungkua leh khawtlangah zir tur kan neih niin ka hria,” a ti a, “Heti lam hawi hi nu leh pa leh khawtlangah pawh kan inzirtir tawk lo a ni, ” a ti bawk.

Related Posts :



No comments:

Post a Comment