Monday, September 7, 2009

"I'd Like To Use My Yellow Ribbon" Hmangaihna vang liau liauin..

Kum sawmpasarih mi rawlthar hlim hlawt Mike Emme chuan lungawi takin a car '1968 Ford Mustang' chu a khalh thin a. Chu a car ngainat tak mai chu Colorado phula tuma ngaihsak hlawh lova kum sarih zet lo ding tawl tawh a lei ni. Uluk takin a chei tha a, rawng eng lar tak a hnawih bawk. Mike-a hi lehkha thiam thei tak, hlim hmelpu reng mai chi a ni a, mi dang tanpui peih tak mai leh ngainatawm tak a nih avangin thenrual tha pawh a ngah hle a ni. A car ngainat tak avang hian a thiante zingah chuan 'Mustang Mike' tia hriat a ni thin.

A thuziak hnutchhiahah chuan, "Midang huatna rilru put ve theih hi ka chak hle mai," tih leh, "Lo inthiam lo duh reng reng suh u. Ka Nu, Ka Pa ka hmangaih che u. In kiangah ka awm reng dawn tih hi in lo hre reng dawn nia," tih te zawng hi a ziak a. A hnuai lamah chuan "Love, Mike 11:45" tih a ziak bawk.

He rawlthar ngainatawm tak mai hi hmangaihna lipuia a chen mek laiin a vawrtawp a thleng thut a, a bialnuin mi dang a neihsan a, August ni 23 a a bialpa thar nen an inhual chiah atang chuan Mike-a tuarah vanpui a chim a ni ta ngawt mai, hlim ni hmel reng reng a hmu ta lo a ni. September ni 8 a lo thleng a, chumi ni chuan Mike-a chuan amah hretu zawng zawngte thin thawng dawt tur thil a ti ta. Ama car Mustang eng ah chuan a thu a, kawngkhar a kalh a, a inkaphlum ta a ni.

Dar 11:52 ah chuan a nu leh pa, Dar leh Dale Emme te leh a unaupa Victor-a chu an in panna kawngah chuan an rawn inkhalh thleng chiah a, Mike-a car eng lar Mustang hnungah chuan an ding a - minute sarih laiin an tlai a nih chu.

A tuk a lo ni a, chhunah chuan Mike-a te inah chuan tleirawl leh rawlthar rual an lo kalkhawm a, an kawr hak T-shirt ah chuan "IN MEMORY OF MIKE EMME" tih a inziak a, chumi hnuaiah chuan Mustang eng lem chu a inchhu bawk a. (chung chu Mike-a thian tha ber Jarrod-a leh Jarrod-a nu siam a ni nghe nghe)

Chumi hnu atang chuan nitin mai hian Mike-a nu leh pa hriatah chuan Mike-a leh a Mustang chanchin hrang hrang chu an sawiho sap sap thin a. Motor khawl thil a hriat zia te, a thiante bakah a rualpui mi dang tanpui a peih zia te, school kal tur a phurh thin thu leh a thlah ngun avanga "Mustang Mike" a tih phah hial thu te chu an titi tui ber a ni a. An thu sawi tam ber chu Mike-a chhungte hriat ngai loh a ni hlawm. An zinga thenkhat chuan primary school an kal laia a chhunchaw tur naupang khawngaihthlak deuhte a pek ve thin thu te leh chutih hun lai atang tawh chuan mi dang tanpuina thawhlawm a a pawisa pai chhun pek a chin thu te chu an sawi laih laih a.

Nu valai tak pakhat pawhin Mike-a chhungte chu phone-in a rawn bia a, tum khat chu zan rei tawh takah a car a chhia a, a fate pahnih la naupang tak takte nen thim hnuaiah mangang taka an awm laiin an bulah Mike-a chu a rawn ding a. A driving licence chu a phawrh a, a tina dawn lo tih entirnan a hmuh a, an car chhia chu a siamsak bakah an hnungah zui zelin him takin an in a thlen thu a rawn hrilh a.

School a an pawla mi hmeichhe pakhat pawhin Mike-a'n Mustang gear thar lei a tum tawh a thulh leh tak thu a sawi chhuak a. A pawisa khawlin Mustang gear thar tha tak lei a tum vek tawh chu thulhin a hlui pahnih a lei a, pakhat zawk chu a classmate chu a pe a, chu tleirawl te chuan a car chu a khalh leh theih phah a ni.

Tleirawl pakhat pawhin Mike-a vang liau liaua Homecoming dance a a tel ve theih avanga a lawm zia a sawi a. Evening dress leina tur pawisa a neih loh thu leh second hand dawra mi lei tur a awm thu Mike-a'n a lo hria a, a leisak avangin a tel ve theih phah a ni.

Mike-a kum 14 a nih kum hian a u fanu chu a zeng a, a taksa a tiche thei lo a. A hrawka thawkna dawt an vuah chu Mike-a chuan a thlak thiam thuai a, a buaipuitu berah a tang zui a, thlak a ngaih thut pawhin a tharin awlsam takin a thlak zung zung thin a, a thawk thei loh thut chang pawhin a buaipuitu ber a ni a. A tawng theih loh avangin zaizir a biak dan a thiam bawk a, a hla duh zawng te a ngaihthlak tir thin a. An pahniha an hla duh em em mai thunawn chu 'Pathianin hla tak atangin min thlir reng thin' tih a ni nghe nghe. A u fanu damlo mu hlawm reng tawh bulah chuan a tap chawt a, a vuan a, a kuah a, a tihlimtu ber a ni thin.

Rawlthar leh tleirawl rualte chu Emme home ah chuan Mike-a chhungte lungleng hnem turin an kal khawm leh dam dam a, an thianho zawk pawh chu hnem ngai tak a ni. Anmahni ang rual zinga mahni intihlum an tam tak zia te, tleirawl leh rawlthar mahni intihlum tam ber hi mi pangngai chung lam leh I.Q sang tak tak an nih hlawm thu te an sawi nak nak a. An sawi khawm takah chuan mahni intihhlum hi naupang kum 5 leh kum 14 inkar zingah thihna langsar parukna a nih thu leh kum 15 leh kum 24 inkar zingah pathumna a nih thu te an sawi chhuak ta zel a. Kum tin hian naupang kum 10 leh 19 inkar mi 7,000 zet intihlum an awm thu te an sawi a, America ramah chuan he hri tha lo hian primary school naupang thlengin a man nasa tawh hle ni a an hriat thu te an sawi kai ta zel a.

An zinga pakhat chuan rawlthar/tleirawl mahni intihlum, rilru buaina an neih hriat lem loh te leh an rualpui naupang dang mahni intihlum ve lote inan lohna langsar tak mai ni a a chhuituten an sawi dan a thiante chu a hrilh a. An inan lohna awm chhun ni a an sawi chu mahni intihlumte inchhungah hian silai hman mai theih a awm thin a lo ni.

Tui taka an titi zawm zel lai chuan hetiang vanduaina lo thleng thin hi a ven theih reng em, tih te leh mi mal theuha hmalak dan tur te an chu an sawi kai ta zel a. Mike-a nu chuan a fapa hming daih lohna tura engemaw tal siam a duh thu a lo sawi ve a, Mike-a car ngainat em em Mustang eng chawiin chu hriatrengna thil (mementos) chu rawng eng ni thei se, tiin a sawi nghe nghe a. A lo rilruk dan an han zawh chuan Mike-a nu chuan "'Mahni intihhlum tum suh!' tih te, 'Chutiang khawpa i nun a beidawng a nih chuan khawngaih takin tanpuitu ko hram ang che!' ti te, kan ziak dawn alawm," tiin a chhang a. Chutihlai chuan an zinga pakhat chu a han hawi chhuak a, an zinga pakhat T.shirt hakah chuan Mustang rawng eng lar ngei mai inchhu chu a va hmu a, chuta tang chuan 'the Yellow Ribbon Project' chu a lo piang ta a ni.

An chhungkaw thiantha Linda Bowles chuan ribbon eng tel lian tak a lei a, chu ribbon hman tangkai dan tur ziahna lehkha a chhuttir bawk a. Ti hian a inziak a...

"YELLOW RIBBON PROJECT"
In loving memory of Michael Emme
THIS RIBBON IS A LIFELINE : It carries the message that there are those who care and will help. If you (or anyone else) are in need and don't know how to ask for help, take this, or any yellow ribbon or card, to a counselor, teacher, priest, rabbi, minister, parent, or friend and say:
"I'D LIKE TO USE MY YELLOW RIBBON."

(YELLOW RIBBON PROJECT : Duhtak Michael Emme hriatrengna. HE RIBBON HI NUNNA KAWNG A NIH HI : Mi dangte buaipui leh tanpui inpeih reng an awm a ni tih thuchah a keng a. Nangmah (leh tupawh) tanpui ngai leh puitu tur mamawh chuan hemi hi a nih loh pawhin ribbon leh card eng hrim hrim emaw pawh kengin counselor, zirtirtu, thuhriltu, rabbi, pastor, nu leh pa, thiante (a remchang ber) hnenah hian : 'KA RIBBON ENG HI KA HMANG DUH E' tih mai tur a ni)

Mike-a te in chhungah chuan a thiante ho chu an thukhawm a, an titi mam mam a, an thian ngainat tak mai avanga an lunglen zia te, an tawrh zia te sawi a, mittui hru leh zauh zauh chung chuan chu thuziak (instruction card) chu ribbon engah chuan an chilh bet zel a. An rilruah thil dang a leng lo, Mike-a an ngainat zia chu an titi leh an thiltih mek atang chuan a lang thei a ni.

A tuka Mike-a sunna hun an hmanna hmuna chuan ribbon eng an siamsa zanga lai chu bawmah dahin an hung ta a. Hunserh an hman zawh meuh chuan bawm chu a ruak vek a, yellow ribbon chu a lo zo hman vek a. Thuziak intarna ribbon eng 500 zet chuan mahni intihhlum tum naupang engemaw zat chhanchhuak turin hna a thawk zui ta a ni. Kar engemaw zat liam hnuah chuan chu Yellow Ribbon Project avang chuan tleirawl leh rawlthar thenkhat, mahni intihhlum tumte chhanchhuah an ni a. Miin an lo hre zau ta zel a, a hnu lawkah chuan Colorado state chhunga high school hrang hrangah Yellow Ribbon Project chu an din ta sup sup mai a, tichuan hmun hrang hrangah a darh zau a, ram hrang hrangah a lo ding ta zel a ni.

Rilru hah vang leh lunglen khawhar vang te, hlauh vang te leh buaina chi hrang hrang vangin naupang tam tak - an pawn lam lan dana hlim hmel tak ni si te - hi a rukin an rum a, an chhungril lamah na tuarin an chiau vawng vawng thin. An tan hian tih theih kan nei ve em le?

(On Death and Dying tih Thea Alexander ziak leh yellow ribbon project website atanga lak a ni - Lalthlamuana Ralte)

Related Posts :



No comments:

Post a Comment