SSA A Kal Her Luai Luai

Kum kalta chhunga S.S.A Mission Mizoram atanProject Approval Board-in sum hman a remtih zat chu Rs 6739.15 lakhs lai a ni.

Pawisa tam tham tak mai a ni a, hmasawn dawrhna tham lai niin heng pawisa te hi a hmanna tur dik takah hman a ni em? tih chu zawhna lian tak a ni zawk.

SSA pual bik liau liauin Cheng nuai 6706.27 hman a ni a, NPEGEL tan Cheng nuai 7.44 leh KGVB atanCheng nuai 25.47 te hman phalsak niin a vaia belhkhawm chu Cheng nuai 6739.15 lai a ni.

Sum hmanna tur atan hian ruahmanna chi hrang hrang siam a ni a, pawisa a tam ang bawkin a hmanna pawh a tam nangiang mai.

Chung zinga pakhat Education Department hnuaia SSA in computer leh a behbawm a leite hi ACES Infotech, Kolkata nena inremna siama an neih a ni.

Mizoram SSA hnuaiah Computer center 140 a awm a, chunga hman atan chuan ACES Infotech hian Computer 10 zel supply in a vaiin Computer 1400 lai a supply a ni.

Chumai ni lovin inremna ang chuan a enkawl hna pawh ACES Infotech hian an buaipui chhunzawm tur a ni bawk.

Centre pakhat chauh enkawlna atan pawh hian SSA Mizoram chuan sum a seng hnem hle a, Centre 60 zinga centre pakhat zel enkawlnan kum tin Cheng nuai 2.3 a seng a, Centre 80 dangah pawh hian centre pakhat enkawlnan kum khatah Cheng nuai 2.4 zel a seng bawk.

SSA in Computer Centre a neihte enkawlna atana kumkhata sum sen zat chu Cheng nuai 309.2 lai a tling.

Computer Centre din a nih dawn hian SSA chuan tender a chhuah a, Company 5 in he tender hi an chhang.

A chhangtu zingah hian DOEACC & ZENICS \ang kawp pawh an tel a. Mahse, a tehfung pakhat, School Computer Education-ah a tlem berah kum 5 chhung tal experience an nei tur tih chu an pha lo a. Chutiang bawkin a chhangtu dang Cybernet, Infotech Services, Marks System te pawh an duhthu an sam loh vangin hnawl anni bawk.

Company pahnih NIIT Kolkata leh ACES Infotech te erawh endun an ni a. NIIT hian State panga laiah leh School 2400 chuangah experience an neih tawh thu tarlan a ni a. Kum thum kal ta chhunga an pawisa khawih chevel pawh Cheng vaibelchhe 1,000 a nih thu an tarlang bawk.

ACES Infotech chuan state pahnihah experience an neih thu an tarlang a, an sum khawih chevel pawh Cheng vaibelchhe 1 a nih thu tarlang. Technical specification-ah NIIT hi 1 (pakhatna) pek a nih laiin ACES Infotech chu 2 (pahnihna) pek a ni thung a. Tichuan ACES Infotech chu SSA hnuaia Computer leh a behbawm supply tur chuan thlan a ni ta zawk a ni.

Hei hi kum 2004 a\anga kum 2008 inkar chunga SSA nena inremsiamna a ni a. Chumi hnuah 26th March 2008 khan ACES Infotech nena thawhhona chu tihnun leh a ni ta bawk.

Inremna ang chuan ACES Infotech hian kum hnih chhung SSA nen inremna an siam a, March 2010 thleng he contract hian a huam dawn a ni.

Inremna ang chuan School 80 thlan chhuahah ACES hian internet facility darkar 200 daih an pe tur a ni a, chumai nilovin Computer text books, course material leh instruction material te a thlawnin zirlaite hnenah an sem tur a ni bawk.

Heng bakah hian Computer Stationery te, printing ribbons leh cartridges, floppies leh CD te bakah zirna atana thil \ul zawng zawng chu ACES Infotech pek vek tur a nih thu inremnaah hian a tel.

Chumai bakah ACES chuan zirlaite tan bika siam60 multi media CD zirlaitena E-learning an neih theihnan a thlawnin an sem tur a ni bawk a. Chumai a la ni lo, electric hman man thlengin ACES tum tur a ni bawk.

SSA Mizoram nena an inremna hmasaah phei chuan ACES hian Aizawl-ah office an din tur a ni a, District Headquarter tinah an din tel bawk tur a ni tih a ni a. Inremna ziah a\anga ni 40 chhunga office te chu din hman ngei tura tih an ni bawk.

Inremna ang chuanComputer Center atan room khat dah tawp tur a ni a. Electric pawh a hranga lak tur a nih bakah internet thlunzawmna tur telephone connection school tinah dah tur a ni bawk.

Mizoram Education Mission Society (MEMS) leh RMSA (Rastrya Mik Siksha Abhyan) chungchangah mi \hahnemngaiten RTI hmangin zawhna an siam bawk a.

MEMS hi engtika din nge? MEMS hian engtik atangin nge hna a thawh tan? MEMS hi Cabinet Approve a ni em? Central Guidelines ah Director hian SSA leh RMSA hi a kawp lo tur ni a a lan laiin Mizoram ah chuan Director hian a kawp niin a langa, enge a chhan? tih te zawh a ni.

Heng Zawhna chhannan hian Paper phek 19 zet hman a ni a, chhanna mumal a lang lova, Govt of Mizoram Education & Human Resource Development (School Education) Notification January ni 6, 2009 copy chu chhanna atan hman a ni a. An dan leh hraite chipchiar taka ziahna leh September ni 3, 2008 a School Education Minister hova mi pawimawh 12 lai Meeting Minute leh State Appraisal Team an inruatna leh an member-te list inziahna chu a chhanna ber ni awma lang chu a ni.

Hei mai bakah SSA lam record dan chuan kum 2007-08 chhung khan naupang school kal lo 4913 an awm niin an report a. Chu chu kum 6 a\anga 14 inkarte anni.

Mahse, 31.3.2008-ah chuan naupang school kal lo hi an pung ta hluai a, mi 4913 a\angin 11920-ah an kai ta dawrh mai. Hei hi a chhan chu mautam vang nia sawi a ni.

SSA lam hriat dan chuan mautam vanga Mizoram puma naupang school kal thei lo zat chu 7007 lawih anni.

Hemi a nih vang hian SSA hotute chuan naupang school kal loten an kal ngei theihna tura hmalaknan ruahmanna an siam a.

Pakhatnaah chuan Residential Bridge Course an ti a, hemi hnuaiah hian Cheng nuai 263.50 ruahman a ni a. Non-Residential Bridge Course atan Cheng nuai 69.87 a ruahman bawk a, School an kai leh theihnana ruahmanna dangah Cheng nuai 26.88 sen ral ni bawk. Mobile School an ti a, hemi atan hian Cheng nuai Cheng nuai 36.84 senral a ni bawk a, chu lovah Innovative Scheme atan Cheng nuai 311.07 hman a ni bawk. Ti hian a vaiin naupang school kal lo tena school an kai theihnana SSA sum sen zat nia an sawi chu Cheng nuai 708.16 lai a ni.

Child Friendly Material
Child Friendly Material atan hian SSA chuan Project Approval Board (PAB) (Central)-in a pawmpui anga Rs. 5,60,00000/- Mizoram SSA in a neih thu an sawi.

Heng atan hian item thlan a ni a, chung te chu Jersey ( including Goal keeper’s Shirt), Skipping Robe, Football, Rubber Ring te thlan a nih thu an sawi.

He thil Supply tur hian Tender koh a ni lo. Hemi atan hian Financial Management & Procurement-in a phal ang a (FMP Para 144) Single Tender-in Free Will Sports Private Limited hnenah Sports materials leh Duck Rider, Arihant Industrial Corporation Ltd, Mumbai hnen atangin Hriatpuia Enterprise kaltlanga lei a nih thu tarlan a ni.

Financial Management & Procurement Para 144 ina sawi angina changtute emaw tender dang angina tender chhuah a ngai lova, All DPC Meeting September 2008 a rel angina Item leh Brand Identified sa a nih angina a siamtute hnenah distributor Mizoram a mite kaltlangin Order mai a nih thu sawi a ni bawk.

Child Friendly material Supply-tu ber chu Hriatpuia Enterprise, Chhinga Veng, Aizawl a ni.

Hriatpuia Enterprise te hian a sum hlawma lak chuan an supply hnem hle a, Jersey, Skipping Robe, Football, Rubber Ring leh Duck Rider te an supply tel bawk.

Sawi tawh angin he thil atan hian tender koh a ni lova, SSA Office lam chuan Single Tender a nih vangin tender chhanna hi hnawl a awm lo tiin an sawi.

Child Friendly hnuaiah tho hian Text bu pawh tam tham tak lei a ni a. Excercise bu te hi Baid Brothers Silchar, Puii Stationery Store Saron Veng, Ch.S Enterprise, Lower Chanmari, Aizawl Agencies, Barabazar Aizawl leh Enterprise Barabazar Aizawl ten an supply a ni.

SSA hnuaia electric wiring hi tun thlengin firm pakhat chauhin an la thawk a. He firm hi Zoen Electricals, Bara Bazar a mite anni.

Zo-Sports a an hruaitupa B. Vanlalhruaia chuan, “SSA hnathawhdan zawhna hrang hrangte leh an chhanna te en hian SSA hian Infiamna rau rauah pawh duhsak a nei hle tih a lang a, An bungraw leite en hian SSA hnuaia football zirte hi thahnem hle mahse, Jersey hi set khat ah 18 pawh lonise, Naupang 56268 lai haktur Rs 1,34,10,540/- senga an han lei mai bakah Skipping Rope Rs 2,85,684/- man leh Football Rs.11,11,614/- seng a leite hi a Rate leh Quality lam thlir lemlo pawhin a uchuak deuh niin a lang a, Game dang te harsat dan ngaihtuah loh theihloh a ni a, Football hmanraw leinan tur ngawt atan hian a hmang nasa lua deuh a, hei hi Sum siamna mai a nih palh mai a hlauh thawnawm tlat.” tiin Zozam Weekly a hrilh.

B. Vanlalhruaia chuan, “Mizoram-in Govt approve Supplier thahnemtak kan nei a, heng Dawr te hi chu Infiammite leh Infiamna lam ngaihven tute hi chuan kan hmelhriat tlangpui hlawm a, Mizoram chhungah Sports Goods siamtu Company Distributor, an dawr hmun pawh hriatloh SSA hian Supply tura a thlang nalh mai theite hi ngaihtuah chian tham tak niin a lang bawk.” a ti a.

“Heng Rubber Ring leinana sum an hman Rs 42,068/- leh Naupang inawmlem na hmanrua Duck Rider leina man zozaite hi a Uchuak hle tho mai Rs. 11,051,000/-meuhvin Duck Rider lei si chuan a rate te hi nawr hniam ve deuhse a that dawn teh nen, Sum hmanna an hriatloh zia a lang chiang hle in a hriat.” tia sawiin, “Heng te avang hian SSA-in Child Frenly Materials chungchanga a sum hmandan hi Zo-Sports chuan ngaihthatna tur ah angailo a ni ber.” a ti bawk.

SSA chu chhui zui zel chi nia a ngaihthu sawiin, “Computer Supply chungchang phei hi chu ngaihtuah zui chi ah pawh a langlova, a pawi takzet a ni. Rinhlelh tur hlir mai a ni ta ber a, Chanchinbu mite'n chhuizui tlak a, an ngai a nih chuan Zoram thanzel nan chhuizui theise a duhawm hle mai. Sports lam thil ah hi chuan Zo-Sports hi engmah nilo mahila, kan thikthu a chhe hle a, naupangte leh infiammite hi sum siamnan a hman tlak an awm tawh lova, an khawngaih thlak zia hi mitamtak hian an hrelo fo” a ti a.

“Zo-Sports chuan neih vang ni lovin ama sum sengin kum 5 chhung chu ram rawngbawlnaah ngaiin ke a lo pen sak ve tawh a, sorkarah pawh sports hmasawnna turin a theih tawpin rawtna a siam a, zah pawh dawn lovin ke a pen mek zel a nih laia sports hi mi\henkhat sum siamna mai mai atan chuan United Sports Association of Mizoram leh MPCC Sports Cell te hian an remtih loh thu an sawi chamchi a. Chu chu Zo-Sports ngaihdan pawh a ni reng a ni.” tiin a sawi bawk.

Related Posts :