Tunhnai maia album thar tichhuak thar Bethsy Lalrinsangi chu a hla pakhat, 'Bible Hla' vangin Lunglei Theiriat Kohhran chuan chawimawina an hlan.
A lawina - Lunglei Salem Baptist Kohhran naupangho nen Bible hla hi music video pawh an lo siam tawh a, he hla hi puitling zingah tha titu tam tak an awm rualin naupang lamah a tla na hle a, Zoram kilkhawr ber thlengin naupang hovin an lawm a, an zawm dual dual a ni ber.
He a hla pakhat vang hian Pathianni khan Bethsy hi Theiriat Kohhran chuan chawimawina an hlan a, "Chawimawina ka dawn tawh zawng zawngah chuan ka la lawm ber tum a ni ang," tiin Bethsy chuan chawimawina a dawn avanga a lawmzia a sawi.
"Mizoram chhunga zai vanga award dawn theih ang chi chu ka dawng ve deuh vek tawh a, he'ng award ka dawn zawng zawng hi ka lawm a, mahse tun tuma chawimawina ka dawn tluka ka lawm hi a la awm lo," tiin Bethsy hian a sawi a, chawimawina an hlan lai hian a mittui pawh a tla hial niin a sawi.
Bethsy hian a album tihchhuah tak hi a hralh tha thawkhat a, hetih lai hian a ruka lo copy an tam hle nia sawi a ni a, hei hi Bethsy hian pawi a tih thu a sawi.
Bethsy ang bawk hian tunhnai maia a debut album '2009' tichhuaktu Lunglei lam zaithiam tho, Lalropuii Pachuau chuan a album tihchhuah thar hi a ruka lo copy an tam hle tih a sawi ve bawk.
"Sum tam tak kan seng a, tha leh zung kan seng nasa bawk a, chutiang a nih laia lo copy ru duh an awm hi pawi ka ti a, ka rilru pawh a na khawp mai," tiin Lalropuii hian a sawi a, a album thar hi hralh tha tho mahse a beisei ang erawh a ni pha ta lo niin a sawi bawk.
Monday, August 17, 2009
Bethsy a lawm
Subscribe to:
Post Comments (Atom)
No comments:
Post a Comment