Monday, August 17, 2009

Malsawmna Mak

¢ Lalhruaitluanga Chawngte

Thian dun inkawm ngeih deuh mai, vanduainain a tlakbuak avanga inchhiatkhum tate kha.

Naupan tet atanga inkawm, engkim ti dun thin, a thlum a al ei za thin an ni a, duhzawng engkim inhriatsak, thuruk pawh nei lo khawpa inkawm ngeih an ni.

Unau inkawm ngeih takte chu thian ena inen khawpin an inkawm ngeih thin a, thian inkawm ngeih deuhte erawh unau ena inen khawpin an inkawm ngeih thin thung. Chu mite thian dun pawh chu unau enin an inen a, nupui tih loh chu engkim an intawm a ni ber e.

Lungchhermi an ni a, an thiam bakah an chak em avangin mite chuan an duh em em mai a, thawh tur nei lovin an awm ngai lo. Tin, an hnaah chuan an rinawm em em bawk a, an hming pawh an khaw chhehvel thlengin a thang a ni.

Ni tinin an inzuichhuak a, hlim takin an thawk dun thin. Hlawh pawh a hrangin an la ngai lo a, an thawh zawhah zat leh zatin an insem mai thin. Tin, a mamawh zawkin an chan tam zawk chang te pawh a awm, an inthik ngai lo.

An hna chu hahthlak hle mah se an inkawmngeih em avangin hah pawh an sawi ngai lo a, chutia hlim taka hna an thawh theih avang chuan mi pawhin an awt thin hle. Mahni hnathawh, hmela lang khawpa thawkrimte hi khawvel hian hmuhnawm a ti thin a, chu mite thian dun pawh chu mi hian hmuhnawm an ti thin em em.

Ni khat chu, an hnathawhnaah chuan an chesual ta tlat mai. Pakhat zawk chuan a thianpa kut chu a chhu palh hlauh mai a, a chhu na em em mai lehnghal! Thisen pawh a chhuak pur pur mai.

An han enchiang a, a thianpa kutzungpui chu a lo bung hmawk mai a nih chu!

Chutia a kutzungpui a bul ta chu a rilru a na em em mai a, a hlimchhawnah phei chuan thil dang reng a ngaihtuah thei lo. Tin, hna a thawh theih tawh dawn loh avangin hrehawm a ti hle.

Chuta tang chuan an inkar a chhe ta. Ngaihdam dil chiam mah se a thianpa chu a ngaidam thei tlat lo. A thianpa ngaihdam dilna te chu a beng a hupsan a, lungpui biak ang mai a ni, a ngawi ran mai. A hnu deuhah phei chuan hmuh pawh an inhmu ngai ta lo.

A kutzungpui a bulh bakah a kutzungtang dang pawh a che hlei thei ta lo a, a kut khing lehlam chu a hmang hlei thei lo a ni ta der mai.

Mahse, chhungkaw chawm a ngai si; kut khing lehlam chauh hmang thei chung chuan a thawh theih tawk hna dang a thawk ve tauh tauh a, a hah thin hle. A hahna ai mah chuan a rilru natna chuan a tihrehawm a, kut khing lehlam hmang thei lova a'n awm ta ringawt mai chu, mi mah khaw khat pa chak nih nak a laiin, a rilru a na thin hle.

A thianpa chunga a thinrimna chu a reh thei lo, zan muthmuna a ngaihtuah chang te hian sil urh khawpin a inseh ruh thin. A mitthlaa a thianpa hmel a rawn lang chang te hian a lo chhiatkhum zawk zawk zel ti hiala sawi tlak a ni!

Ni khat chu, a ramvak a, a nupui fanaute ei tur sa kah ngei a tum a ni. Silai chu a'n tin tau tau thin a, mahse, a kut vei lam a hman mumal theih loh avangin a duh angin a ti hlei thei lo. Chutih lai te chuan a thianpa laka a lungawi lohna chu a lo zual a, a ha a thial bap bap mai.

Sa chu kah ngei a tum a, a ti hlei thei si lo. A vak a vak a, nakinah chuan khua a lo thim ta. Kawng a bo a, an khaw awmna lam reng reng a chhut thiam ta lo. Hnung lam leh hma lam a hre ta lo a, ding leh vei a hre tawk a ni tawh mai e. Zanah chuan mangang takin a vak a vak ta mai a ni.

Nakinah chuan thawm a hria a, mihring thawm nia hriain, a lawm em em mai a, a va pawh ta rawih mai.

Mahse, vanduaithlak takin, chu mite chu hringei an lo ni a, chutia mihring an hmu chu an lawm hle. An man a, ei an tum ta a ni.

An lam hual a, an zai bawk a, tin, eng eng emaw an chhamphual leh bul bul thin. Meipui alh hluah hluah bulah chu pa chu an thlung ran mai. An chem sei te chuan an han tin zuau zuau thin a, tin, hmeichhia leh naupangte chuan an lo nuih leh dar dar thin bawk.

Chu pa chuan a hlau em em a, meipui bula ding e ti lovin a khur dar dar mai. A hnu deuhah phei chuan khup inkhawng hlawk hlawk khawpin a khur ta hial. An phuar beh tlat avangin tlanchhuah ngaihna a awm der si lo.

Meipuiah chuan bel lian pui mai an chhuang a, bel chhungah chuan a khatin tui a awm. Chu chu a tui hang tur a ni, chu pa tui hang tur chu.

Chutia hun engemaw chen an han lam vel hnuah chuan an bel chhuan a lo so a, chu pa chu thlak an tum ta. An han sil phawt a, mahse, chutia an silna lamah chuan thil hmuh an nei ta tlat mai. A kutzungpui lehlam a bul!

Chu'ng hringeiho chuan puithuna mak deuh mai an nei; mihring kutzungtang kim lo chu an ei duh lo. Chutiang ei chu vanduaina thlen theiah an ngai a, an duh bau lo. An duh lo mai pawh a ni lo, a thiang lo bur. Pi leh pu atanga an inzirtir dan a ni.

Chu pa pawh chu, a kutzungpui a bul tih an hriat tak avangin an ei ngam ta awzawng lo mai a, ei chu sawi loh, an bul hnaia awmah pawh an duh lo. An bula a lo awm ve ringawt pawhin vanduaina a thlen thei ang tih an ring a, a hlauhin an hlau. A rang thei ang berin an khua chu chhuahsan se an duh hial.

An lalpa chuan tlangval sawm rual a thlang a, a rawn kir leh loh nan a hla thei ang ber thlenga thlah turin chu'ng mite chu a ti a, tichuan, chu pa chu an hruaichhuak ta a ni.

Chu'ng lai vel ram chu an lo hre hneh ngang mai, pumpelhah te kalpuiin, rei lo te chhungin hla fe an thlenpui hman. Tichuan, chu pa chu an chhuah ta a, him pialin an khua a thleng leh ta a ni.

Kawng a bo a, pan lam tur hre lovin a vak a vak a nih kha. A tum loh dan deuhin kawng hruaitu tur a tawng a, a rilru ti-na em em thintu a kutzungpui bul vang chuan a him phah bawk.

Khua a thlen veleh an in pawh pan lovin a thianpa te inah chuan a lut nghal a, ngaihdam a dil ta mawlh mawlh mai a.

Malsawmna hi herh tuata a rawn thlen chang a awm; a hun laiin kan hrethiam lo chawk lehnghal.

Related Posts :



No comments:

Post a Comment