INDIAN FOOTBALL BAZAR

¢ Hmingsanga

European football-a player insawnkual te kan hriat theih em em laiin Indian footballer hmun danga insawn kual te chanchin kan hriat tel ve ngei a ngai. Football khawvel-ah player-te chhak leh thlang, chhim leh hmarah an inkal thelh sup sup laiin, India ramah pawh player-te insawn kual theih hun lai a ni. Player tha tam takin 'ram tha lehzual' hmuh inbeiseiin an chaw bel hunna an sawn a. Indian ramah chuan Goa leh Kolkata League te hi a bawmtu an thahnem viau. Hetih lai hian local league chauh beisei lova I-League-a I Div leh II Division khelh hunah player inlei khawma sum leh pai tam tak thap ngam te pawh an awm. Mizo tlangvalte khelhna club leh club lian deuhho dinhmun i'n thlir teh ang. An club budget tarlan te hi player thar leina atan liau liaua an tih a ni e.

CHURCHILL BROTHERS
Kumin Budget: Rs 7 crore
Nikum Budget : Rs 5 crore

Season hmasaa I - League champion team an ni. I - League-a player mal chetha ber leh AIFF-in player malte chawimawina a siam zawng zawng hui vektu Churchil Brothers te hian Player Of the I-League (MVP), Best Forward, Golden Boot dawngtu Odafe Onyeka Okolie, Best Goalkeeper - Arindam Bhattacharya, Best Defender - Gouramangi Moirangthem Singh, Best Midfielder - Ogba Kalu Nnanna te an la hum thei.

Team tichak zual turin Brazilian striker Nascimento Silveira chu Dempo SC atangin an lalut a, Mizo tlangval Robert Lalthlamuana a la tel chhunzawm ang. Mizo tlangval pahnih Vanlalrova leh Vanlalfela te'n Churchill Brothers tan khelh phak tumin contract thar an ziak tawh bawk. Assamese tlangval, Oil India striker Durga Boro pawh an lalut fel tawh.

Hetih lai hian an coach, I-League-a Best Coach atana thlan Zoran Djordjevic chu a bang thung. A hmun ruak luah khat tur hian Brazilian coach Carlos Roberto Pereira da Silva chu ruat thar a ni. He pa hian a champion pui leh thei ang em?

Churchill Brothers te chakna hnar pakhat chu Odafe Okolie hi a ni. Chutih rual an player hman tangkai tak Chitra Sen chhuak hian central midfield-ah pawi a thlen thei mai thei. An lei thar Nascimento Silveira hian a ai a awh zo thei mai thei bawk. .


DEMPO SPORTS CLUB
Kumin Budget : Rs 8 crore
Nikum Budget : Rs 7 crore

An player chhuanvawr ber, team captain ni bawk Beto chu a chhuak mai dawn ni awmin thu a thang chiam a, mahse sum tam zawkin contract an ziah pui leh thei hlauh. Tun dinhmunah chuan team tha tak ni tura beiseite zinga mi an ni.

Beto chan mah se Ranty Martins leh Climax Lawrence te an la chhawr zui leh thei dawn a, tunlaia Indian striker zinga tha ber tia sawi theih Sunil Chhetri an nei thei hi phurna tham a ni ngei ang.

Defender senior pahnih Abhijit Mondal leh Satish Kumar te hun hi a liam tawh ti pawhin a sawi theih ang a, anni pahnih thlak tur hian tlar hnung lamah tawnhriat ngah pahnih Anwar Ali leh Covan Lawrence an nei thar bawk. Dharamjit Singh chu loan-in Dempo SC atangin kum tluanin an hawhchhuak thei dawn a, hei hian awmzia an nei viau thei. Jerry Zirsanga hi inhliam tawh lo se, mumal takin khel ve thei tawh se kan va ti em !


EAST BENGAL
Kumin Budget : Rs 7 crore
Nikum Budget : Rs 6 crore

East Bengal sawi apianga mitthlaa lo lang chu an coach Subhas Bhowmick hi a ni awm e. Subhas Bhowmick chu harsatna neuh neuh, khelmual pawn lamah a neih avangin a hming a reh hman viau. Goan club Salgoacar-ah technical director hna a thawh hnuah awmzia a neih pui loh hnuin East Bengal-ah bawk a rawn let leh ta. Hei hian East Bengal-ah phurna nasa tak a thlen a, chu mai ni loin, India captain Baichung Bhutia chuan East Bengal tan a khel ve leh tawh dawn bawk nen, an tha a tho hle.

Foreigner Yusif Yakubu, Edmilson, Sebastian Omar Monesterolo (Argentina), Jan Berger (Czech) leh Dayoub (Lebanon) te an nei thar.

Air India atangin Subhash Singh leh Harmanjot Singh Khabra, Sporting Club de Goa atangin an lei thar bawk. Heng mite hian East Bengal-ah hian 'danglamna' an thlen lo a nih chuan kuminah hian beisei tur dang a tlem ngawt ang.

Hetih lai hian an player chhuanvawr Subrata Paul leh striker Sunil Chhetri, defender Surkumar Singh te hmun ruak hi an luah khat zo ang em tih chu ngaihtuah tham tak a tling bawk. Malsawmkima leh Beikhakhei te hian hmun an chang phak ang em?


MOHUN BAGAN
Budget: Rs 6.5 crore
Nikum: Rs 5.5 crore

Foreigner an neih zingah Jose Barreto leh Marcos Pereira te an hum theih bakah Chidi Edeh an nei thar a, Goan star Micky Fernandez, Riston Rodrigues te an neih belh thar bawk. Churchill Brothers atangin Genius Zenith an la bawk.

An player neih sa rawlthar rual seng sawngte hi tun season-ah chuan an hmang tangkai hle turah ngaih a ni. An chakna hnar ber tur chu an midfielder-te hi an ni ngei ang le. An coach Karim Bencherifa hian duh thlan tur a ngah khawp mai. Barreto hian goal a thun thei chhunzawm ang em? Lalramluaha hian season hmasa ai khan hmun a chang tam zawk thei ang em le?


CHIRAG UNITED
Kumin Budget: Rs 3.5 crore
Nikum Budget : 2 crore

Bagan defender tha pahnih Nigerian Peter Odafe leh Brazilian Eduardo Chacon te hian Chirag United defence line phui tha tawk lo hi an tiphui thei a nih chuan beisei an nei thui thei viau mai thei. Coach Subrata Bhattacharya hian rawlthar lam aiin tawn hriat ngah tawh player a lakhawm nasa. Mahse heng mite hi tlem chuan an upa deuh tawh hlawm a tih theih ang. Chutih rual chuan an tawnhriat ngahna tak hian awmzia a nei thei mai thei ve bawk.

Sum leh pai chu an ngah a, an sum neih ang erawh phurna tham tling khawpin an chetha thin lo hi he club tlakchham lian tak pakhat a ni. Mama leh Tuaitea te'n he club hi beiseina sang tak nei chungin an zawm a ni.

Kuminah hian I-League-ah kher lo, Kolkata League-ah tal an chetha a nih chuan sum tam zawk thawh inhuam an nei nual. He club captain Sawmtea hian eng tak thlenpui ang maw?


SHILLONG-LAJONG FC
Kumin Budget: Rs 3.5 crore
Nikum Budget : Rs. 2.5 crore

I-League khel tur zingah chuan Mizo player fuankhawm tamna ber club an ni. Tunah hian Mizo player sawm tling lo deuh an kawl khawm mek. Heng zingah chuan player pathum emaw tal hi chuan first XI-ah hmun an chang ngei turah beisei a ni.

Foreigner pakhat, Chirag United atangin Nigerian Daniel Bidemi an nei. Coach thar tawnhriat ngah tak Stanley Rozario an nei thar bawk. Skill nei tha, thahrui leh tharum ngah tak tlangmi tel tamna tur a ni. Hei hi an chakna hnar pakhat tur pawh a ni ngei ang le.


PUNE FC
Nikum Budget: Rs 5 crore
Nikum Budget: Rs 3 crore

Ram dang mi player an la lei rih lo. Player inla thar nasa ber pawl erawh an ni ngei ang. Ram dang mi lak an tum rualin an tum pakhat chu India mi te'n an club-ah hian hmun pawimawh ber chang se tih a ni.

Season hmasaa an defender chhuanvawr leh rinrawl Nigerian Chika Wali an nei chhunzawm ang a, central defender S Venkatesh an lei tho bawk. A hmatawng lamah tlakchham an nei. An rinrawl Jeje Lalpekhlua hian hma a sawn ve zel bawk. Lalrozama pawh a hman tlak tial tial.

Pune FC hian hmabak eng tak an nei. India ram club zingah hmunhma nei tha leh changtlung ber pawl an ni. An club kalphung pawh India ram club dang te ai chuan a mumalin awmzia an nei hle. Nakin lawkah chuan India ram football club tha ber leh changtlung ber an la nih theih ngei a beiseiawm.


JCT
Nikum Budget: Rs 4 crore
Nikum Budget : Rs 3 crore

Season hmasa khan beisei an phak lo. Kuminah tualchhung player tam zawk senglutin Nigerian midfielder Pen chu an lalut thar. Academy atanga chhuak naupangte chhawr tangkai an tum hle. Mizo tlangval Chuantea pawhin JCT senior team hi a zawm tawh. Mahlima chuan season hmasa khan a zawm tawh nachungin, inhliam vangin a khel tam thei lo a nih kha. Kuminah hian he'ng Mizo tlangval pahnihte hian JCT-ah hmun an chang phak ngei tuah ngai teh ang.

Related Posts :