Monday, August 17, 2009

Eiru Hriat Theih Dan!

¢ HC Vanlalruata

Tunlaiin PRISM leh SOSA te'n eiruknaa fihlimlo-te thlan an buatsaih dawn thu chanchinbu lamah ka lo hmu ve a. Thil fimkhur ngai tak, mi thenkhatin tute-emaw an huat avanga remchang an lak theihna tur a nih rualin kan ram dinhmun enin eiruk dona hmanraw chi khat chu a ni thei awm e. A buatsaihtute'n an thlifim thiamin ka ring a, chutih rual chuan eiru hriat theih dan awlsam ka hriatte phawrh ve mai mai a tha-in ka hria.

Kum 1991 bawr vel khan Bagha-a kan kal tumin Mizoram thar chhuah sawhthing hralh chungchanga sawhthing thartu leh kharchhawnga phailama hralh thintute'n an manganpui-a anchhia pawh an lawh tam ber thin vai sumdawng pakhat kha a in ka va hmu ve hrim hrim a. Chutihlai chuan cheng nuai 40 chuang neia a insawi bakah chumi hmang leh a thawhpui dangte nena an sum thawhkhawma Mizoram sawhthing thar zawng zawng lei an tum thu min hrilh a. Chutiang khawpa pa hausa si chu tiin a inah chuan ka leng lut ta a. A inchhungah hian awm aiin awmlo a tam zawk.

Khum hming chu a pu ve ang chu tunhmaa CRPF-ho mutna khum, a ruangam thir tlawn, a khum chhuat puan chhah veh kual ang chi kha pakhat a lo awm a. Thuthleng sei pakhat, dawhkan tereuhte pakhat leh a choka-ah pawh eirawngbawlna bungbel tlemte bak hmuh tur a awmlo tluk a ni. Mahse, sum lam chu a nei. Car a nei lova, a veivahna'n pawh a chuan man tlawm rikshaw a hmang rim ber.

Mizote erawh chu kan dang daih mai. Pawisa kan neih hi chuan miin min hre nghal ngei ngei a ni ber. In kan sa a, chumi pawh duhtawk lovin thlam kan sa leh a. Pawisa kan ngah dan a zirin kan in sak pawh a ropui a, kan thlam sakah ringawt pawh kan pawisa neih zat awm chu a hriat theih mai. Chumai chu kan la duhtawk ta lova, car kan lei nghal thuai a, a hausa chuan an lei man to mai a ni.

Mihausa inchhung han lut i la. Choka lam chu a lo hmui huam mai a, an hmeh a tha em em tih a hriat a. An thut pindana an thil tar leh an bang an cheimawi dan atangin an sum neih dan chhut a harsa vak lo. An tukverh puanzar hman duh danah pawh a lang thei deuhthaw ang chu. Video camera leh thlalakna pangngai an neih that dan ringawtah chuan (tui zawng takte a lo nih theih avangin) hisap ngawt theihloh chin a awm mahna, mahse han hawikual i la a lang thui thei khawp mai.

Mizote chu tribal kan ni a. Kan India mi puite angin Income Tax kan chawi ve si lova, chuvangin kan eiruk pawhin chhui chhuah kan har bik chin a awm. Chuti chung chuan nula a rai chuan tlangval a ngai a ni tih kan hre thei ang hian kan thil neih leh kan in leh lo, thlam thlenga en peih chuan hriat kan harsa chuang lo. Sorkar hnathawk emaw politician (Minister/MLA) te pawh an hlawh bi hriat vek a ni a. Chuta tang chuan an thil neih atangin an eiruk leh eiruk loh chu hriat mai theih a ni.

Vaiho chu Income Tax an pek avangin thuhruk theih loh tam tak an nei a. Chutih rualin keini angin neih thinglungkhawng pawha thil lei mai mai an ching ve lova, an eiruk-in Income Tax an pek dan leh chhiah an awlruk dan man theih an nih avangin hrem awlsamna chin an awm a. Rangkachak leia khawl an ching a, mipui vantlang hmuh ve vakloh chi a nih avangin keini ang chuan an lang chhuak lo. Chuti chung chuan car changkang tak neite hi chu hausa thawkhat takah ngai ila kan ring sual lovang.

Tum khat chu kan thianpa hian, "Minister-te hi an minister lai hian in te hi sa ur ur lo sela, an nih loh hnu daihah te sa zawk sela miin an eiruk hi an hre lutuk lo tur a nia," a ti a. Kan thian pakhat zawk erawh chuan, "Minister an nih lai ngeia sak hi a tha em a lawm. Insakna atan sorkar motor an hmang thei hi chu a ve chauh a ni zawk a. Tute'nemaw an tlawn hunlai tak a ni a, insakna bungrua, leirawhchan, balu leh thir tlawn te an rawn dah zut zut mai thin a. Senso tlem zawkin an sa thei a lawm," a ti a. Chu chu sorkar officer hovah pawh a dik tho ka ring. Thuneihna chan lai taka in sak chu a awlsam ngei ang.

Chuvangin eiru hriatna chu an hlawh zat i hriat hnu-ah an thil neih en mai rawh. A nupui/pasal a sumdawng a nih pawhin a thil zawrh leh hralh atangin an sum lakluh awm tawk vel chu hisap a harsa chuang lo. Kan ramah hi chuan eiruk kawnga fihlimlo han hriat mai hi thil khirh khan tak a ni lova. Mahse, in leh lo leh ramte pawh chhungte hminga dah nachang hre thiau hian an eiruk bawk thin si avangin kuta man chiaha hrem tur erawh chuan ACB lamte'n chik zawka an chhui erawh chu a ngai ngei ang chu.

Related Posts :



No comments:

Post a Comment