Monday, July 27, 2009

Thla 4 daih Vote on Account

Ni hnih chhung awh tur Mizoram Assembly session-ah nimin khan August thla atanga November thla chhunga sorkar sum hman tur pharh a ni.

Planning Commission-in Mizoram Annual Plan a la tihfel loh avangin budget pangngai pharh theih a la ni lo a, kumin chhunga a vawi hnihna atan vote on account a Cheng vaibelchhe 1,068.97 pharh leh chu house-in a pawmpui nghal.

Sorkar sum hman tur lailawk pharhtu chief minister Lalthanhawla, finance changtu chuan, Planning Commission-in state annual plan a la peihfel loh avangin March thla khan lo tiam tawh mahse regular budget a pharh thei ta lo tih a sawi.

Hei bakah hian Planning Commission-in state annual plan chu August thla tir lamah peihfel tura an insawi thu a tarlang nghal bawk a. "Planning Commission-in annual plan an peihfel hnuah he house zahawm takah hian kum 2009-2010 daih tur budget ka pharh leh ang," tiin a sawi.

Mizoram assembly chuan vote on account bakah sorkar sum enkawlna dan Mizoram Fiscal Responsibility and Budget Management (Amendment) Bill,2009 chu pass a ni bawk.

Planning Commission-in Mizoram annual plan a peihfel har bik viau mai hian mi thenkhat ngaihtuah a tithui ang reng viau a. State thenkhat chuan Parliament inthlanpui hma khan full budget an pharh hman a, annual plan an nei fur tawh bawk. Hmarchhak state zingah Nagaland leh Tripura annual plan peihfel a ni daih tawh a. June thla tawp lam khan Planning Commission-in Punjab annual plan pawh a peihfel sak bawk.

State annual plan hi kum tawp lam (November thla vel) ah buaipui a ni thin a. Kum tir te atangin Planning Commission-in chief minister kaihhruai state Planning Board hruaitute a ko khawm a, an sawiho a, tihdanglam ngai te tidanglamin an pawmpui thin a. Chumi hre reng chuan state dang hruaitute chuan hma an la a ni.

Kumin hian sorkar thar kan nei a, NLUP bakah hmalakna tur ruahmanna chi hrang hrang a tam viau avang hian annual plan peihfel vat hi sorkarin a tum ang a, heng hmalakna tur hrang hrangte hi budget-ah a lang turah ngaih a ni a. Mahse, kum chanve a liam tawh thlengin budget pangngai la nei thei loin thla 4 chhunga sorkar sum hman tur daih tawk vote on account chauh pass a la ni cheu mai hian engemaw zawng chuan sorkar chak leh chak loh a hril a tih theih awm e.

Tun hnaia chief minister singapore leh hongkong a a zin haw hnua New Delhi a a cham lai khan Planning Commission lam nen state annual plan an sawiho dawn ni a sawi a ni a. Mahse, August thla lamah sawiho chauh tur a nih thu finance changtu chief minister hian nimin khan house-ah a sawi thung.

Plan sum neih har hian pawisa kum kal mek (current financial year) chhunga sorkar hma thar lakna tur a tithuanawm dawn ngei a. Mipui nghahhlelh em em NLUP leh thil dangte hi a khawtlai lo ang tih sawi theih a ni ta lo.

Related Posts :



No comments:

Post a Comment