Biak in kawnga ruihhlo zuarte mahin Kristiante rilru an la peng thin a ni a, biak in chhung ngeia Kristiante lehkhabu thianghlim Holy Bible hal meuh chu Zoramah a thleng ang tih pawh suangtuah a ni ngai lo. Mahse Kawnpui Hmarveng Presbyterian Kohhran biak inah chuan Pathianni zan nge Thawhtanni zing hma tak zawk hriat lohah Holy Bible hman lai chu lamtualah tu tih hriat lohin a hal.
A kang vap thenkhat chu Maichamah chapdarh a ni a, chet dan ngeiawm tak hmangin Maichamah vek hian chil chhak a awm bawk. Chu mai a ni lo, inkhawm hruaitu chairman thutna pawh zun khum a ni bawk. Pulpit Bible lian, Pulpit-a awm reng thin chu pawhthler a ni nual bawk. Mak ang reng tak chu Pulpit leh a chheh velah hian thil sen (thisen nia sawi te pawh an awm) per hnuhma a lang a, thutthlengah pawh tling kalhin, a bul velah pawh lapua te hmuh a ni. Biak in bungraw dang chhia leh bo a awm hriat a ni lo.
Biak in suasam duh hrim hrim emaw, ruk tur zawng leh tih chhiat tur zawng nise chu sound system part tha tak tak lak mai theih a tam a; Bible aia tihchhiat awlsam tihchhiat tur thil dang a tam bawk. Chuvangin Pathian leh a Kohhran laka helna thil tih ni a ngaitu an awm pawhin rin zawn theih vek a ni.
He kohhran hi Pathianni hmangin Rev.B.Sangthanga, bialtu Pastor-in a tlawh a, Pathianni-ah Baptisma leh Lalpa Zanriah Sakramen kilho niin, zan lamah pawh Kohhran-ho te'n hlim takin Bial Zaipawl te nen Pathian an fak a, chulai hmun ngeiah cuan a tuk maiah thil duhawm lo tak hmuh a ni ta a ni. Kohhran Committee thukhawm nghalin hetiang thil sual titu hi Pathian hnenah an tawngtai sak a ni.
He thil thleng entu tam tak zinga mi thenkhat chuan misual satliah thil tih niin an ngai lo a, anmahniah thawktu engemaw takin a thawk niin an ngai. Kum 5 kal ta velah khan thil hrechiang intite chuan Kawnpui-ah han mi awm herh deuh, Pathian aia thil dang ring zawk an awm niin an sawi a; mahse tun hnaiah erawh chuan hetiang boruak hi hriat chhunzawm tur a awm tawh lo.
Biak in bungraw bo pakhat mah hriat a la ni lo a, hei hian pawikhawihtute hi Kohhran laka hel emaw, Pathian in tihbawrhban hrim hrim tuma thil ti an nihzia a tilang chiang hle niin a hmuna hmutute chuan an sawi. ‘Lamtualah Bible hi an hal a, chairman thutthleng cushion hi an zunkhum niin kan hre bawk. Thil ruk tum ni sela, an hnuhma a lang ang tih hlauva thup awm tak an nih laiin an sulhnu bawlhhlawh tak tak hmuh tur a awm a, khuangpu thutna hnung a thutthlengah thisen far hnih a far a, a kiangah lapua a awm bawk a. Hei hian ngaihtuahna a ti kal thui hle a, Setana biakna emaw, inthawina lam emaw a ni thei mai awm mang e tiin ngaihtuahna min siam,' tiin Upa Zahlira Zote, Kohhran Committee chairman chuan a sawi.
Kawnpui khua hian Setana be pawl an lo nei tawh thin a, hei hian pawl an lo nei tawh thin a, Hmar Veng biak in suasamtu te hi Setana betute an ni thei ang tih rinna a tilian hle. ‘Nikum khan Chhim Vengah sawn setana biakna a awm tih naupang inpuanna atangin hriatchhuah a ni a, high school naupang thenkhat in Setana an lo be thin a ni’ tiin Upa Zahlira Zote chuan a sawi.
‘Kohhran hote hian tunhma pawhin harsatna kan tawh chang a awm a, tunah pawh kan tawk leh a ni a, Pathian kan rawn a tul a, police lama kal pawh kan tum lem lo. FIR pawh kan thehlut lo, keini chuan tawngtaina nena theihtawp chhuah kan tum a, pawikhawihtute pual hian tawngtaina a tam thei ang ber neih kan tum a, Mizorama Kohhran hrang hrang te pawhin an tawngtainaah min lo hria se kan duh tak zet a, an tawngtainaa min hre reng turin kan ngen duh a ni’ tiin Kawnpui Hmarveng Presbyterian Kohhran chairman chuan Zozam Weekly a hrilh.
(Zozam Weekly July 25-31, 2006 issue-a mi chhuah nawn a ni)
SETANA BIAKNA HMANRUA LUNGLEIAH CHHAR
Dt 23.6.2006 tlai dar 3:30 vel khan Dariella Camp, Ramthar veng, Lungleiah Setana Biakna hmanraw chi hrang hrang an phochhuak. Heng bungrua an phochhuahte hi chi hrang hrang zungbun, Banbun, Syringe, Chemte, Satanic Sign an tih mai kut zungtang awm dan tih danglam chi hrang hrang lehkhapuan a ziah te, arsi hnuaia meipui awm lem te, Cross letling te, lipstick bakah Setana be tura an inpekna lehkha ‘Setana hi ka lal leh chhandamtu a ni’ tih ziak thisena nem hnan tho leh Circle chhunga arsi lem awm thisena nem hnante a ni. Lehkha pholan zingah hian ‘Satan is God’ tih te leh milem satanic sign an tih mai bakah Hindi hawrawp hmanga ‘Our father, Hallowed be thy name, thy Kingdom com...’ tih ziakte a chuang bawk.
He camp neitu leh Speaker ni bawk Pu R Lalrinliana (Tea) chuan heng setana beho hi inkhawm, Sunday School leh zing tawngtai inkhawmnaah pawh an tel ve zel thin tho a, an thulh phah chuang lo a, a rukin setana an be reng tho a ni, a ti. "Setana betute hi an pawn lam lan dan atang ngawt chuan thliarhran mai theih an ni lo a ni," a ti bawk.
A sawi zel dan chuan tattoo chi hrang hrang zingah hmanrua an ngah hle a, thi, bengbeh, zungbun, banbun leh an TV en duh zawng atang te hian nasa takin sualin a bei thin a ni. "|hi pakhat phei chu a hranpa ngata chhertir a ni a, a neitu hian a ui hle a ni," a ti bawk.
Campers zinga pakhat chu a pianthar loh nan Aizawl atangin an rawn warning a, setana a biak tan tirha thisena a thuziah leh a hming thisena a nem hnan leh hmawlhte pakhat pen tui sen leh a hring a thuziak awm an rawn thawn bawk. Thuziah hi Chinese nge Hindi tih hriathran a har hle.
Pu Tea hnena Camper inpuang pakhat chuan Aizawlah chuan biak in hrang hrang 3-ah an inthawi thu leh harsatna an tawh chuan loh thu sawiin, biak in tihbawrhban duh vang hrim hrima biak in chhunga inthawi thin an nih thu a sawi. Setana an biak dawn hian a betu turten an duh sign an hmang mai thin ni a hriat a ni a. Question mark (?) hmang an awm bawk a, washer ang deuh banbun hmeichhe lamin an uar deuh nia hriat a ni bawk.
Dariella camp hian hetiang bungrua hi vawi 3 an halral tawh a, tuna mi pawh hi thla bial zan Setana betuten an biak hunlai angah ngei halral leh a ni ang an ti.
(Zozam Weekly June 27- 3 July, 2006 issue-a mi chhuah nawn a ni)
No comments:
Post a Comment