¢ Lalremruata renthlei
Mizorama Call Centre awm chhun, ZIDCO leh Public Soft Corporation India tang kawpin an din chuan buaina nasa tak a hmachhawn mek.
Thuampui Venga Ch Chhunga Bus Terminal building-a inkulh, NE 10 to 6 Call Centre chu Public Soft Corporation of India (PSCI) din niin, hetianga Call Centre din a nih theih nan hian PSCI leh ZIDCO chuan nikum September thla khan inremna thuthlung, Memorandum of Understanding (MoU) an ziak tih a thawkte chuan an sawi a, chu MoU-ah chuan Call Centre din nan ZIDCO-in PSCI hi cheng nuai 109.2 a pe tur niin an sawi a, ZIDCO hian cheng nuai 100 chu a pe tawh a, tuna a la pek bak chu Rs. 9,20,000 a ni tih an sawi.
Hlawh an la thei lo a, chu bakah rinhlelh an nei bawk. Call Centre-a hnathawkte chuan hlawh an lak loh rei tawh thu sawiin, “May thla atangin hlawh kan lak tawh loh mai bakah kan call centre hi tuna kan kal dan pangngai ang chuan chhunzawm zel theih chi a ni lo a ni,” an ti.
“Kan hlawh lak theih loh chungchanga kan PSCI pu te kan hmachhawn a. Mizoram sorkar atanga pawisa an hmuh tur, a vaia cheng nuaih 109 chu nuaih 100 chauh pek an la niin a dang nuaih 9 an la pekchhuah loh avanga hlawh min pe thei lo an ni," tiin an sawi. "PSCI Managing Director Inder jit Bhat phei chuan "Sorkarin Memorandum Of Understanding (MOU) an 'violate' a ni tiin a sawi,” an ti bawk.
Call Centre-a thawkte chuan, “ZIDCO lama thu kan dawn danin a tira sorkar atanga pawisa sanction a nih hmain ZIDCO pawisa cheng nuaih 44 pek an ni phawt a, October 2008 thlaah Call Centre hmun Ch Chhunga Bus Terminal building building hi luah niin a tul ang ang chu lei a ni ta a ni. A hnu ah cheng nuaih 56 chu December 2008 thla ah pek a ni leh a. A hma a PSCI in thil an lei tawh te a ba a lak an nei te a nih ngawt loh chuan cheng nuaih 46 an hmuh hnu ah hian Call Center hmunah hian thil dang generator hmanlai chhuak, ri chur chur chi cheng nuaih 3 man tih loh engmah lei belh hmuh tur a awm lo a ni. A vaiin cheng nuaih za chu pek tlak a ni ta a ni,” an ti bawk.
Call Centre-a thawkte chuan an thawhna hmun chu cheng nuai za senna hmun ni theia an hriat loh thu sawiin, “Tuna kan Call Center hmun chhung en sawn cheng nuaih za man hu thil a awmin kan hre lo a ni,” an ti.
Kumin kum tir atanga hna an thawh tan chauh thu sawiin, “Company hian, training October 2008-ah tanin a hnathawh taka chu January 2009-ah a tan a ni. April 2009 thla thleng chauh hlawh a pe chhuak thei a. Chuti chuan thla li chhung chauhin cheng nuaih za a hmangral tihna em ni? Hnathawktute thawhchhuah cheng nuaih 15 chuang kan belh leh lek phei chuan PSCI lam chuan tunah hian pawisa pakhat mah an nei lo ret niin a sawi a. Chu mai bakah PSCI-in sorkar nuai za pek bakah PSCI pawisa nuai 50 chuang hloh bawk angin a sawi bawk si,” an ti bawk.
“He Call Centre din nana Memorandum of Understanding (MOU), September 2008 thlaa sign hi mumal lo tak a niin a lang a ni,” tiin MoU pawh an sel a.
MOU sign a nih hmain investigation chiangkuang a awm mumal lo nia an ngaih thu sawiin, “Eng ang company nge PSCI chu a nih a, Call Centre India ram hmun hrang hrangah eng zat chiah nge an neih te, a address leh thlalak nen (a hmuna zu tlawh kher pawh ni lovin) hriat chian a ni em, leh engang hna thawkin nge sum an lo hai luh tih mai bakah PSCI company pawisa dinhmun te hi hriat phawt a ni lo vem ni?” tihte chu zawh a nh leh nih loh zawhna an siam a ni.
PSCI Managing Director thusawi pawh sawilangin, “India ram hmun hrang hrang 7 (pasarih) ah Call Centre an nei niin an sawi a. Tuna kan hriat dan erawh chuanin hmun pakhat mah ah Call Center an lo nei reng reng lo mai a. An neih chhun Gurgaon, Delhi-a mi pawh process ho te pakhat chauh ('My rights 9 to 9' tiin Consumer rights lama member tur zawn a ni a) chu Domestic (Hindi tawnga India ram mi zinga member zawn mai mai) Call Centre lek a ni,” an ti.
“Training chhuak hmeichhe 8 te chu March 2009 thla tawplam khan Delhi hmunah chuan tirh thlak an ni a. Tunah hian June thla khan hlawh an lak theih loh vang leh hnathawh tur pawh an neih loh avangin tawngkama banin an lo haw chho leh vek tawh a ni. An report chu hetiangte hi a ni. An zu thawhna hmun chu building te tak Air Conditioning te chu sawi ioh inthiarna hmun chiangkuang lo, tui pawh awm ngai lo a ni,” an ti bawk.
“A office pawnah chuan engmah signboard eng company ta nge a nih tih lanlirna a awm lo a. Computer te chu an hluiin internet connection 3-ah chauh a awm a, an inhman tawm thin a ni. An chhukthlak hmain hnathawktu (Call Center Agents) engzat mah an awm lo a, Hindi-a tawng a ngai si a, an thiam si lo a, English-a vaiho biak an nan tum pawhin an bo telh telh mai si a, chuanin hna lem tak mai, e-mail thawn te rei lo te chhung chu an tihtir a. Chumi bak chu a changin engmah thawk lovin office-ah chuan an va thu nileng thin a ni. Vai hmeichhe dang pahnih an lak belh a, pakhat phei chu an rual hian hlawh lak theih loh vangin a bang ve nghe nghe a ni. Chu chu PSCI company office lian neih chhun 'condition' a ni,” an ti bawk.
“MOU sign-tu Dr Zohmangaiha sawi danin Delhi-ah pawh vawi khat mai ni lo a zu kal tawh a, hetiang office hmu leh a chinchang hre chung hianin MOU chu a sign pui ngam a nih chuan risk a la huai khawpin kan hria,” tiin an sawi bawk.
Zohmangaiha an dem thu sawiin, “Hetiang thu hrang hrang avang leh hlawh lak theih loh avanga Dr Zohmangaiha May ni 28 2009-a Call Centre hnathawktute'n kan han kawm tumin a thawktute thlavang hauhva PSCI a 'question' a, a nawr kan rin laiin, ani chuan a thawktute chu company cho ang leh thu dik lo thehdarh angin min puhin min hau let ta hrep zawk a ni. A sawi dan phei chuan 'Media te chu ka hlau lo em mai, sawi tur kan nei tam ve tho' a ti a ni,” tiin an sawi bawk.
An thawh tira an tiam chungchang tarlangin, “Pu Inder jit Bhat-a chuan 'thla 7-8 hnuah chuan international in kan kal ang' a ti a. Hetiang hi an dinhmun a nih si chuan, a rinawm loh khawp mai. A thil lo sawi tak, International a siam tur thu zawh chuanin, Mizorama VO1P ( Voice over Internet Protocol), internet hmanga khawilai hmun a mi pawh biak pawh theih vekna a la awm loh vang a ni, tiin a sawi a ni," an ti.
Hetihlai hian ZIDCO managing director Zohmangaiha leh PSCI MD Inder Jit Bhat-te chuan press mite hmaah call centre-a thawkte chungchang sawifiahin, he buaina hi Mizo hmeichhe pahnih hnathawka an lakte karah inbeihna awm vanga lo chhuak a ni, tiin an sawi thung.
"Pune leh Bangalore atanga Mizo nu pahnih zirtirtu atana lakte karah promotion chungchanga inthik rukna a lo awm a, nu pakhat hnam dang pasal nei zawk chuan a rukin a naupangte fuihpawrhin May ni 27, 2009 khan engmah inhriattir lawkna awm lovin hnathawktute chu nuarin office an kal duh lo," tiin an sawi.
Hetianga boruak a awm hnu hian hnathawkte chuan PSCI hnenah hian rinhlelhna leh thawktu awm tha duh lo ban tumna awm an dodal thu hming ziakin an pe niin Zohmangaiha chuan a sawi. Hnathawktute an thawh that duh loh tak avang hian an thawhchhuah pawh a tlem ta sawt nin an tarlang a, May thlaa cheng nuai 5.70 ngawt thawkchhuak chu June thla a nih meuh chuan cheng nuai 1.7 chauh an thawkchhuak thei ta niin an tarlang a, hei hian hnathawktute hlawh pek thlengin a nghawng niin an sawi.
"May thla hlawh advance chu an dawng kim deuh vek a ni," tiin an sawi a, June thla hlawh erawh an pe rih lo a, he buaina chawkchhuaktu ber nia call centre enkawltute'n an sawi hmeichhe pakhat chuan July ni 3 khan banna a thehlut niin an tarlang.
Hlawh lak tlai chungchangah, "Air India te pawh private an ni a, an buai deuh lai chuan an hnathawkte hlawh an pe tlai a, keini pawh private kan ni," tiin Inder Jit Bhat chuan press conference-ah a sawi.
An hnuaia thawk buaina siam nia an hriat mi pakhatin banna a thehlut a, ani bakah hian hnathawk pahnih an ban bawk. Mi pathum an ban bak zawng hian July ni 14 chawhma dar 10-a NE10 to 6 pisa an thlena an in-report chuan ngaihdam an ni dawn tih an sawi a, amaherawhchu, intiamkamna an neihtir tur thu an sawi thung.
PSCI harsatna tawh an sawi zingah Call Centre hmnarua import order June tira ruahman tura tih, October-a sawn a nih vanga sum tam tak hloh a ni te, December-a sum an hmuh chauh thu leh chu pawh kim lova an hmuh thu te, electric leh tui mahna inlei chawp a ngaih vang te nen a vaia Call Centre hmunhma cheina nen mahni pawisa bil cheng nuai 45 lai an seng niin an sawi bawk.
Nu pahnih promotion inchuh nia an sawite hi Sheila leh Kimi te an ni. Zozam Weekly-in a biakpawhnaah chuan, “Kan pahnih inkarah chutiang engmah a awm lo. Innghirnghona engmah kan nei lo,” an ti a, “Rahul-a'n min ko a, Press Conference-a kan hming lam a ni chu a pawi a tih thu leh thiam loh kan neih a hriat loh thu min hrilh a ni,” an ti bawk.
Kimi chuan, “Vawiinah pawh kan vaiin Office-ah kan kal a, mahse, tu nge hnathawk thei ang? Telephone bill BSNL-a kan pek theih loh avangin nuai 2 chuang kan pe lo a, an disconnect vek a, hnathawh ngaihna pawh a awm lo hrim hrim,” tiin July ni 14 khan Zozam Weekly a hrilh.
Chanchinthar lakhawmtute hnena Pu Zohmangaiha'n Delhi-a an tirh thlak nula pasarihte hming a sawilan duh loh chhan - ‘Pasal an hmuh lo mai ang’ tia a sawi chu chanchinthar lakhawmtuten a sawi ngei an phut a, mahse, Zohmangaiha chuan a sawi duh ta chuang lo a ni.
Call Centre-a thawk pakhat VL Rengpuia Sailo chuan, “Aizawla Call Centre din a nih dawn khan chanchinbuah ka lo hmu a, tichuan beiseina sang tak nen interview turin ZIDCO office-ah ka va kal a. Vanneih thlak takin ka tling ve a, an kalpui dan tur leh a company chungchang te ka zawt a, Aizawla Call Centre hmasa ber tur a nih tur thu leh North East-ah chuan a hmasa ber a nih tur thu te min hrilh a. Tin India ramah pawh branch dang pasarih an neih thu leh California based a nih thu te min hrilh a ni” tiin Zozam Weekly a hirlh.
“Training hi October ni 6-a tan tur tih kha a hun takah tan lovin a hnuah kan tan. Hemi hma hian induction te ka nei a, tah chuan James (Taiwanese) founder anga an sawi te leh ZIDCO MD, PSCI MD leh midangte pawh an tel a. Company chungchangte pawh a tlangpui an sawi a. He call centre hi north east bakah thla sarih hnu velah phei chuan International-a leh a nih tur thlengin an sawi a, keini interview-a tling kalkhawmte phei chu kan phur ve em em a, thawh hlan pawh kan nghakhlel ve hle a ni” a ti.
“Tichuan training te kan han tan a, thil chu a kal tluang ve em em a, assessment (test) te kan han nei a, chumi hnuah a hmasa berin mi sawmpathum Process Training nei turin, Aizawla thawk turin min thlang chhuak phawt a, hemi zawh hian marketing survey te kan nei a, hemi-ah hian kan tih ber chu member zawn a ni a. Kan chhungkhat laina leh thian hnaite member te kan nihtir a. December ni 11-ah office tan tura tih kha engemaw vangin January ni 11, 2009 khan kan tan ta chauh a. Hetah hian thil mak deuh pakhat chu a hmaa mi 13 min lakte khan assessment kan nei vek a. Chutah chuan tla ta te pawh an awm a, mahse, office kan tan hian midang zawng a hmaa process training tura lak ve loh te kha engmah assessment pawh nei lovin office an rawn joint ve nghal vek a, kan hnathawh tur te min hrilh a, bike nei thenkhatte chu collector turin min dah a, thenkhat phei chu information pawh pe lawk lovin post an thlak kual vel mai mai a. A tir atangin administration hi a fel lo em em a, a phuahchawp hlea pakhat phei chu a ban phah nghe nghe a ni,” tiin a sawi.
VL Rengpuia chuan, “Probation period kan zawh hnu March thla atang khan vanneihthlak takin collection in-charge ah min hlangkai a, thil pawh a la kal tluang viau a, March thla phei kha chuan collection a that em avangin pawisa pawh nuai sarih chuang kan lalut a, kan pu Rahul Sinha phei chuan PSCI history-ah hetiang hi a la awm ngai loh thu leh record kan siam thu te min hrilh a, phur pawh kan phur tlang hle a ni,” a ti.
“Tichuan hun lo kal zel a, May thla atang khan sales membership zawn kha a tlahniam tan a, hmasawn lam aiin tlakhniam lam kan pan ta tial tial a. Harsatna kan tawk chho zel a, kan phone line te disconnect an rawn tum hial a. Kan pu Rahul-a mangangin hna pawh thawk lovin employee zawng zawng sweeper te thlengin kalchhuaka member zawng theuh turin min tir chhuak ta a. Hetah hian 'mi pakhatin cheng zakua in hmuh loh chuan in hlawh atangin cheng zakua hi paih (deduct) a ni ang' a ti a. Tin, ban then in nih loh chuan hlawh pek ngaihna a awm tawh lo angin min hrilh a, kei chu kal chhuak ve lovin ka awm a, employee dangte chu ka phone kual a, hrehawm an tih thu leh harsa an tih thu min lo hrilh a, lo let khawm leh tura hrilhin kan pu Rahula chu ka hovin kan hmachhawn ta a ni,” a ti bawk.
“Member ni tura va sawma khawngaih va dil hi a zahthlak a, kan zahawmna a bo thu te ka hrilh a, 'chutianga mi te va ngen turin ka ti lo che u, in ti a nih chuan ti tawh suh u' tiin min chhang a, a hnu lawkah kan telephone line zawng zawng chu disconnect a ni ta a, telephone hmanga hnathawk kan nih avangin hna kan thawk thei lo a, chawlh an puang ta a. 'Kal leh hun tur chu phone hmangin kan rawn hrilh ang che u' min ti a. Thil mak tak pakhat chu phone bill pawh a tir atangin an pe lo tihna em ni? A vang chu an rawn disconnect nghal tawp mai kha a mak khawp mai!” a ti bawk.
“May ni 27 khan mi thenkhat ban a tum avangin hei hi a dik lo e, office-ah kal lovin inhmukhawm ang u, tiin a tam zawk chu office-ah kan kal ta lo a, chu chu strike-ah an ngai ta a ni. Tichuan May 28-ah ZIDCO MD leh PSCI MD te hovin meeting an ko a, employee zawng zawng min ko khawm a. Office-a kan luh chhoh hmain paper-in MOU chungchang leh company hi a rintlak tak tak em tih ziak employee tam zawkin a kan sign-na chu kan thehlut a. Chawhma lamah ZIDCO MD Pu Zohmangaiha lo kalin PSCI MD Inder Jit Bhatt phei chu a thinrim thu rawn sawiin ka naute, ka fate ang an ni a, keiman kan kawm phawt a nge, tiin min rawn kawm a, tichuan kan harsatnate kan hrilh a, min dawng sawng tha viau a. Chumi hnuah kan pute ho nen chuan min kawm ta a,” tiin an dinhmun a sawi.
V.L. Rengpuia chuan, “PSCI MD Inder Bhatt chuan 'eng vanga strike nge in nih?' min ti a. Kei chuan he company hi a rintlak tak tak em tih leh India ram hmun hrang hranga branch sarih an neih leh neih loh zawh pahin leh California-a an base chungchang te ka zawt a, tin, thu lengvak kan hriat dan te zawtin Gurgaon (Delhi) ah phei chuan public soft corporation tih ni lovin people soft bak an hriat loh thu te ka sawi a (People Soft) phei chu company hran a nih thu te ka zawt a, mahse beisei loh takin kan harsatna min sutkian pui tura kan ngaih lain 'company credibility in challenge a ni' min ti hlauh ta zawk mai a. Kei phei chu midang Junior te bum kual leh amah Pu Zohmangaiha hial pawh awihtir lek lekah min puh bakah 'setana hnathawh' ang hialin hmaichhanah ngei min puh a ni. Hetah hian kan kal loh chhan (STRIKE an tih) termination kan duh loh chu ka lo sawi hmaih a, mahse a hnuah ka sawi lang leh ngei a ni,” a ti.
“Kan thil tih chu thil dik lo hulhual leh dan lo a nih thu te min hrilh a, mahse kan thil hriat kan sawiin 'Pu Zohmangaiha, MoU kum 10 thleng sign-tu ina 'kei pawh min awi tir lek lek alawm' a ti kha, a MoU sign-ah khan a chiang tawk lo a ni lawm ni? Bakah amah ngeiin domestic call centre a ni tih hi ka hriatna a la rei lo a, a ti te kha a thil sign-ah hian a chiang tawk lo tih a chiang tawk viau a ni,” a ti bawk.
"Pu Zohmangaiha ngeiin hetianga min tih hian ka dinhmun hi sokarah leh mipui hmaah (ama tawngkam ngeiin) min ti 'awkward' a ni a ti a. Telle caller in-charge in, ‘ka pu, i dinhmun sorkar leh mipui hmaah ka tiderthawng emaw ama sawi angina kan ti 'awkward' a nih chuan min ngaidam dawn nia’ a ti a, a sawi zo hman awrh tihah 'sorkar leh mipui ka ti lo, hengho vai-ho lakah hian a ni ka tih ni' a ti leh daih bawk a. Chumi hnuah phei chuan engmah sawi ve theih loh khawpin min hau vak a, media lam kan sawi paw'n 'media ka hlau lo' ti hial te'n tawngkam a cheh a, bakah 'he kan buaina sum leh pai chungchangah pawh hian ZIDCO pawh kan la che ve hlei nem' a ti a. Khati khawpa sumah pawh kan buai tawh lai leh phone bill pawh pe thei lova kan awm lai khan ZIDCO atanga min tanpui thei a nih chuan ngati nge min puih mai loh? A chinfel dan tur kawng zawn aia vaiho hmaa min bei vak kha ka hrethiam thei lo a ni,” tiin Zozam Weekly a hrilh.
“Pu Zohmangaiha hian MoU chungchangah hian investigation kimchang tak neih a ni lo tih a lang chiang a. A chhan chu 'domestic or international call center'a nih leh nih loh pawh a hre chiang lo a, tin call center kalphung pawh engmah a hre lo. Kum sawm chhung sign ngam hian eng nge an kalphung tur leh an run dan tur hi pakhatmah a hre lo hlawm tawp a ni,” a ti bawk.
“ZIDCO MD leh PSCI MD ten press conference-a an thu sawi kha dawt hlang hlak tam tak a awm bawk a, a thawktu lak chungchangah pawh khan a vua leh vang training pawh kal tlang lovin an thawk a, ka in-charge na hnuai ngei collection dept.-ah pawh Josia, engmah training miah lo collector-ah hrilh chawp ngaiin hlawh ngai reng siin a rawn dah kan han sawi deuh pawhin thuneihtu sang lam atangin a nia, an tia, 'E!' kan ti a, kan ngawih bopui mai mai a ti hi kan thleng chu a ni,” a ti
“A haider luih tlat chu mi pahnih khat tihah a ngai lui tlat a, he kan thil tih hi employee zawng zawng inrawnkhawm hnua inthuruala kan tih a ni. Miss Kimi chungchang a sawi zawng zawng te kha dawt muhlum kha a tam zawk a ni. Keini tlema chinchang hre deuh chu min dah bo hi a tum ber niin ka hre bawk avang chu Miss Kimi phei chu experience ngah tawh a nih mai bakah a thil sawi ve tawh chuan tuna kan General Manager Rahul a pawn a hlauh ber a ni,” a ti.
VL Rengpuia chuan, “Tuna Ch Chhunga Terminal building-a kan awmna, kan office saw va en ula, an senso an sawi nen hian pakhat mah a inmil lo. A tirin cheng vaibelchhe 1 an dawn hmain nuai 44 ZIDCO-in a pe phawt a, chu chuan engkim bun fel vek a ni a, awm tur ang chu a awm vek tawh, data base lo thleng tur tun thlenga lo la thleng lo tih loh chu.Chumi hnuah pawisa an dawng leh a chu pawisa chuan enge an lei kan hre lo, generator ri hum hum diesel hmang tih loh chu!” tiin a sawi bawk.
<<<<<<<<<< >>>>>>>>>>
Delhi khawpuia PSCI hmunpuia Call Centera thawk tura zirlai pasarih an thawnthlak te chu Zozam Weekly chuan a kawm a.
Gurgaon-a PSCI office niawma a thlalak an tarlanhi in thawhnachu a ni chiah em?
Ni lo, a teuhlo mai. Computer flat screen pawh annei lo hrim hrim. Kan thawhna hmun nia an sawi a ni a, a thlalakkan en khan kannuih a za tawp.
Inrinniah khulama kan office nia an sawi chu a thlalak phochhuahna neih kantum a, tah chuan a chiang mai ang.
Delhi-a in awmlai khan eng hna nge an thawhtir che u?
A tirah chuan Mail min thawn tir a, chumi hnuah calling min tih tir ve a. Mahse, hindi vek a ni sia tih ngaihna kan hre lo.
Hlawh in la mumal em?
Teuh lo mai. Hlawh kan la mumal thei lova, khuta kan hotupa pawh kan zawt thin a. A nihna takah chuan kan hrehawmna te kan chhungte kan hrilh ngam lova. Pu Zohmangaiha hi pa ang tak takah kan en a, kan lungawilohna pawh ama hnenah kan han sawi thin.
Thla li chhung in awm a?
Hna kan thawk tak tak si lova. Kan tan tihngaihna a awm tawh lova, lo haw chhoh mai kan rilruk a. Office atangin min rawn phone a hlawh a lak theih anti a, kan lawm ve lutuk. Kan va thleng chu Rs 1000/- diat diat min lo pe a, kan rilru a na lutuk a.
Pu Inder Jit Bhatt phone kan tum a, a mobile a switch off daih bawk sia. Mizorama managing director Rahulkan bia a, a ni chuan min khawngaiha kan account-ah Rs 1000/- theuh min rawn thunsak a ni. Rahul hi chu demna kan nei lo.
Khualama office a kan hotupapawh hlawh a lak that theihloh avangin a bang ve tawh tho.
Pu Zohmangaihalakah chuan in vui hle a?
Pa ang tak takinkan en a, min ngaihsak kan ring a ni. Power kan neih loh avanga Delhi lama kan riak phei pawh duh duhna a kal kual angin min lo sawi leh nghal.
Min tirtu a ni a, pa ang tak takin kan en a, khulama kan hrehawmna te, kan office hrehawm kan tih zia te pawh kanchhungte hrilh ngam lovin ama hnenah hlir kan sawi a. Kan harsatna kan sawite phei chuan kan thlavang a hauh viau turah kan ngaih laiin helamah min sawi chhe leh em em bawk sia.
No comments:
Post a Comment