Monday, July 13, 2009

Mizo Nationalism lamtluang

"Tuna kan hnam nun eichhe theitu ber chu - kan thawhchhuah loh, kan phu loh sum kan inchuhna a ni," tih chu Bualhranga ngaihdan a ni.

"Hei hian kan rilru a tituiek a, lemchang kan ni tawh. Takna kan nei tawh lo. Engtin nge he'ng hi kan tih ang? Milemin thil tha leh thil tak a siamchhuak lo ang," a ti bawk.

Bualhranga chu zalenna suala rammu tawh a ni a, tun thleng hian Zofate hmasawnna tur ngaihtuahin a rilru a seng thin.

Zalenna an sual lai khan an naute, rilru fim tak pu chunga thi tur an dawm hlum zauh zauh a, "Kan ram leh hnam hi lo phatsan hauh suh ang che u aw," tiin an naute thi tur chuan an chah thin.

Chu thu chuan a rilru a luah reng a, ram tana tha tur leh Mizo hnam damna tur chu a theih ang tawka ngaihtuahin a bawhzui ta thin a ni.

"Mizo Nationalism tichhe thei tur thlemna ka tawh apiangin kan naute tawngkam kha ka hrechhuak thin," a ti.

June ni 3-ah khan MZP huaihawtin Archive Hall-ah Mizo Nationalism leh tunlai Mizo nun chungchanga an ngaihdan sawihovin Mizo pa rawnkai leh nu zahawm tak tak an kalkhawm a, an tui tlang hle. Chawhma lam dar 10:30-ah an tan a, tlai dar 3:30 an thleng. Banah pawh remchang a awm a nih chuan la khelho leh an duh thu an sawi sap sap mai.

Sawihona hunah Bualhranga chuan an naute tawngkam hnuhnung hi a sawichhuak a, Mizo hnam a him loh a hlauh thu sawiin, tunlai Mizo nun chu siamthat ngai hlea a hriat thu a sawi. A hmuh dan chuan Mizo nunah hian takna a awm lo. "Hnam tlaktlai lo chauh an ral thin," tiin a thu tlang a kawm a ni.

Zalenna suala rammu tawh bawk, MNF defence minister ni thin R Zamawia pawhin Mizo nun chu siamthat ngai a ti a, "Kan hotute'n kawng dik loah min hruai a, barhluih sorkar hnuaiah kan awm," a ti. Mizo Nationalism a kal dik loh vangin Mizote nun a tlahniam nia a hriat thu a sawi.

"Kan tunlai nun tlakchhiat chhan hi chu kan hruaitute'n vang a ni," a ti.

Dikna leh rinawmna chungchang sawiin, a fapain Delhi-ah lehkha zir a tum tumin thamna an pek duh loh avangin seat an hmu lo tih a sawi a, "Kan fate mihring an tlin theih nan lehkha zirtir kan tum a, corruption-a bul kan tan pui chuan awmzia a awm lo," tih chu a ngaihdan a nih thu a sawi.

Mizo Nationalism vawnnun nan rinawmna leh dikna a pawimawh a ti a, "Nu leh pa te'n kan fate kan zirtir lo," a ti tawl mai.

He hunah hian Aizawl Theological College vice principal Rev Dr Vanlalchhuanawma chuan "Mizo Nationalism leh tunlai Mizo nun" tih thupui a sawi a, chhimtute'n an ngaihdan an sawi ve bawk. An thusawi hrang hrang atanga a lan chuan - Mizo Nationalism hi chawinun tul an ti tlang a, tunlai Mizo nun hi lungawithlak loh an ti bawk.

Thupui sawitu chuan: "Mizo hnam hmangaihna leh lainatna; Mizo hnam hmangaihna vanga inpekna, thawhchhuahna, Mizo ram leh hnam that nana tanlakna apiangte," tiin Mizo Nationalism a hrilhfiah a ni.

"Hnam dang nena inpawhna tha a keng. Hnam ropui zia a ni. Mizo Nationalism hi 'vai huat' a ni ngawt lo," a ti bawk.

"Mizo Nationalism hi India national integration dona a ni lo. Integration tihchakna a ni thei," a ti a, "India Nationalism chhungah Mizo Nationalism hi vawn nun theih a ni. British Nationalism chhungah khan Indian Nationalism kha vawn nun leh chawhharh reng a ni," tiin Indian Nationalism chhungah Mizo Nationalism vawn nun theih a nih a rin thu a sawi.

"Pathian hi nationalism bul leh siamtu a ni. Ram leh hnam hi a siam a ni a, mihringa hnam hmangaihna hi a dah a ni," tiin a paper-ah hian a ziak a, "Isua leh Davida te'n an nationalism an zui," tiin a sawi zau a, "Isua kha 'revolutionarist' a ni miau a," a ti bawk.

Sakhuana leh Nationalism chungchang sawiin, "Israel hnama puithiam te, roreltu te leh zawlnei te kha Pathian Thlarau hruaia hnam chhantu an ni tlangpui," a ti/

"Nationalist zawng zawng chu thlarau mi an ni vek lo mai thei; thlarau mi zawng zawng erawh chu nationalist deuh vek an ni," tiin he thu hi a sawi zawm a ni.

"Mizoram sakhaw pute pawh hi nationalist tak an ni tlangpui, an sawi hman lo mai pawh a," tiin Mizorama sakhaw hruaitute a hmuh dan a sawi bawk.

Isua Krista chu revolutionarist (danglamna thlentu) a nih thu sawiin, "Isua kha Juda nationalist-ah chhal theih dan a awm," a ti nghe nghe.

"A pian leh murna Juda culture chu sual tel lovin a zawm mai. Serhtan, inthawina, kut, tawng, thu leh hla (music), ei leh in thu-ah te Juda kalphung a zui mai," a ti bawk.

Mizo Nationalism chu vawn nun zel tul a tih thu a sawi a, mahse, chu chu tharum thawhna nena ngaih pawlh tur a ni lo tih a sawi thung. "Indian Nationalism leh Mizo Nationalism vawn nun kawp theih a ni ang em?" tiin chhimtute chu zawhna a zawt a ni.

Chhimtute hian Mizo Nationalism an hriatthiam dan te an sawi hlawm a, an hrilhfiah dan hi inang diak diak lo mah se Mizo Nationalism vawn nun tul an tih thu erawh an sawi deuh vek.

Sawihona huna sawitute hian tunlai Mizo nun siamthat tul an tih thu, Mizo Nationalism lam inzirtir tul an tih thu an sawi hlawm a, rinawmna leh taimakna chu Mizo Nationalism vawn nun nana thil tul nia hria an thahnem hle.

'Kan thatchhe lutuk a, kan dingchhuak lo ang...ti hawi zawnga sawi te, 'Kan rinawm lo em a, kan him lo ang...' ti zawnga sawi te, 'Incheina leh nawmsakna lam kan uar lutuk, hei hi siamthat a ngai...' ti tein an sawi tlangpui a, '|hangtharte hian Mizo nun dan mawi an hre lo... aia upa zahna an hre lo...' tia sawi te, 'Nu leh pa te kan hlawhchham a ni, kan fate hi nun dan dik kan zirtir lo, rinawmna kan zirtir lo, hnam hmangaihna kan tuh lo...' tia sawi te pawh an awm.

Hlemhletna chungchangin sawi a hlawh hle a, sawitu tam takin hei hi Mizo hnam hmelma nia an hriat thu an sawi a ni. Mipui sum eiru theite an vawklallen nia sawi te, officer liante'n mipui sum an ei nasa nia sawi te an awm a, 'sum kan duh lutuk...kan duham lutuk...' tia sawi te, hna dilnaah pawh thuneitute biaa hna hmu thin an tam nia sawite pawh an awm.

MLA hlui F Lalremsiama chuan July ni 2-a Delhi High Court thutlukna, mawngkawhurte zalenna chungchang sawiin, mawngkawhur chu Bible phal loh a nih thu a sawi a, hetiang thilte hi do a hun a tih thu a sawi. Khawtlang nuna thil dik lo hrang hrangte chu do tul a tih thu sawiin, tuna Mizote nunphung chu lungawi thlak loh a tih thu a sawi a, "Kan duham lutuk... sorkar hnaah, nitin hnaah kan thatchhe lutuk..." tiin Mizo Nationalism hmelhma a sawi. "Hetiang a nih chuan Mizo hnam hi a dingchhuak tak tak lo ang," a ti.

Hetiang zawnga sawi hi an awm nual; Rev Lalchungnunga, Aizawl Theological College lecturer chuan: "Rinawmna kan tlachham, officer-te'n ram budget an ei hnem lutuk a, chu chuan kan nationalism a tidal," a ti a, DGP hlui Lalngheta Sailo pawhin, "Thuneitute hnena sawipui theitute avanga hna hmuh inbeiseite'n thatchhiatna an thlen," tiin Mizo Nationalism hmelma a sawi a, thangtharte chu incheina uar lutuk tiin a sawi bawk.

MHIP president hlui Lalnipuii chuan Mizoram leh a chhehvela Zofate chenna hmun hrang hrang chu pi leh pute'n an thlahte hnena an rochun a ni tih sawiin, "Eng ang ram nge kan tu leh fate hi kan hnutchhiah ve dawn?" tiin Zofate chenna hmun hrang hrang humhalh tul a tih thu a sawi. ZORO president, zalenna suala rammu tawh R Thangmawia pawhin, "Nationalism nei turin ram neih a ngai a, kan ram chin kan tihfel a ngai," tiin India, Burma leh Bangladesh tea Zofate insuihkhawmna lam a sawi.

Zalenna suala rammu tawh K Hawlla Sailo pawhin, "Kan rama oil laichhuahah 10% chauh chang turin eng tin nge sorkarin kut a thlak theih?" tiin ram leh a hausakna chu a ram neitute chanpual a nih dan a sawi a, rammu tawk dang Vanlalngaia chuan Mizo identity hriatchian tul a tih thu sawiin, thangtharte chu heti lam ngaihven tura a duh thu a sawi bawk.

C Chawngkunga (ex-minister) chuan, "Mizo hnam leh ram himna hi kan nationalism chu a ni," tiin a sawi a, NESO vice chairman Lalmuanpuia Punte chuan Mizo Nationalism tidaltu chu India Nationalism nia a hriat thu a sawi. Mizo Aw editor Dr Zirliana chuan Indian nihnaa lungawi tul a tih thu a sawi thung.

Lallianchhunga chuan Mizo Nationalism chungchangah hian zirna atanga bultan a ngai tiin a sawi a, tuna Mizoram zirna kalphung hian heti lam hi a hlat hle nia a hriat thu sawiin, zirlaite'n Mizo nun leh Mizo thil an hre lo hle nia a hriat thu a sawi.

Mizo hnam hmelma nia an hriat hrang hrang an sawi a, Mizo Nationalism chawinun a nih theih nana rawtna hrang hrangte pawh an sawi. Sawitu pakhat, lecturer hna thawk thin phei chuan eirute an thih theih nana tawngtai tul a tih thu a sawi nghe nghe.

A then chuan Zofate insuihkhawm tul an tih thu an sawi a, India, Burma leh Bangladesh tea thendarha awm Zofate insuihkhawmna chu Mizo Nationalism atana hmalakna tur pawimawh nia an hriat thu sawi te pawh an awm.

Zofate chenna ram humhalh tul ti an awm nual a, India, Burma leh Bangladesh-a Zofate chenna chu chan lova humhim tura beih tul an tih thu te, Mizoram ramri siamthat tul an tih thu te an sawi hlawm.

Mizo Nationalism leh Indian Nationalism inkungkaihna chungchangah ngaihdan a inang lo' India mi nih mai tha ti an awm laiin, Indian Nationalism lakah Mizo Nationalism a him lo ang tih hlau an awm bawk.

Sawihona hun zawhah thupui sawitu chuan khaikhawmin, Mizo Nationalism chu a la parchhuah ngei a beisei thu a sawi a, Mizo Nationalism-in ngaih pawimawh a hlawh lo sawt hle nia a hriat thu a sawi nawn a ni. Tunlai Mizo nuna thil tha lo leh thil dik lo hrang hrangte hi Mizo Nationalism a tet sawt em vanga thleng ni theia a hriat thu thukhuh ang reng takin he berampu hian a sawi.

"Nationalism kan neih tawh loh avangin sual nawi te te a lo awm," Rev Dr Vanlalchhuanawma chuan a ti a ni.

He hun kaihruaitu Dr H Lallungmuana pawhin a hmawr bawk nan, tawi tein Mizo Nationalism chungchang a sawi a, Mizo Nationalism chu a la parchhuah ngei a rin thu sawiin, rorelnaah pawh midang thuhnuaiah kun lovin Zofate chu, Mizo Nationalism parchhuah hunah chuan, a thu ber an nih a beisei thu a sawi.

"Aigupta-a pur lo chaw tawhte pawhin kir leh hun an nei ang," a ti.

MZP general secretary VL Krosshnehzova chuan Mizo Nationalism chu MZP chuan thupui berah an neih tih a sawi a, "Kan tunlai hunah hian hetiang lam hi kan ngaihven ta lo em a, Mizo Nationalism hi chawinun a nih theih nan tanlak lehzual tul kan ti a ni," a ti.

Related Posts :



No comments:

Post a Comment