¢ Hmingsanga
Infiamnnain hma a sawn theihna tur chuan sum leh pai tam tak aa ngai. Sum leh pai tam tak sen huama Mizoram football tihmasawnna tura kailawn pawimawh tak chu tualchhung football tihhmasawnna tura theihtawpa tanlak a ni. Chutih rual chuan tanlak dawn chuan sum leh pai tam tak thap a ngai a, mi inphal pung sela, mi remhriate'n an remhriatna te hmang tangkai bawk se, nasa takin hma kan sawn ang.
Season hmasa khan MFA chuan Mizoram football tihhmasawnna turin theihtawpin hma a la a, season tan phat atangin I Div club-te chuan hunawl nei hman mang lovin tournament an khel deuh reng a ni. Kuminah hian MFA chungah beiseina sang tak mipuiin an nghat a. Season hmasaa tualchhunga tournament kan neih that avangin U-16 National Football Championship-ah champion kan ni thei a, U-21-ah finalist kan ni a, Santosh Trophy-ah kum danga kan thlen ngai loh pre quarter final kan thleng thei ta bawk. Heng bakah hian regional tournament-ah pawh result kan nei tha thawkhat. Hemi piah lamah Mizoram player tam takin state pawnah eizawnna an hmuh phah te hi hmasawnna tih loh phal rual a ni lo ang.
Season bultanna tournament-ah hian MFA chuan register player te chauh khelh a phalsak dawn a, season hmasaa team tha Police team pahnih 1st Bn MAP, 3rd Bn MAP team te chu MFA Cup 2008-a an tel loh vang leh an tel loh chhan, chhuanlam tha tawk lo nia an hriat avangin MFA chuan II division-ah a tlak thlak tir a, season hmasaa point hmu tlem Zotlang FC pawh II Division-ah an tla thla bawk. Tichuan tunah hian I Div-ah club 6 chiah an awm ta a ni.
MFA league khelh tur hi double leg-a khelh tur a ni ang a, a thawh khatna chu July ni 2-ah Lammual-ah khelh tan a ni ang. A thawh hnihna chu season tawp lamah khelh chhunzawm leh a ni dawn. League khelh chhung kar lakah tournament lian tham deuh tak buatsaih an tum nia sawi a ni a, heng bakah hian Independence Day Cup chu a karlakah hian khelh a ni bawk ang.
Tun season-a I Div Club-te hi i'n thlir thuak thuak teh ang. Kuminah hian eng ang tak nge an nih dawn sawi thiam a har hle.
DINTHAR FC: Mizorama I Div club zinga daih rei ber pawl an ni. Mizoram chhung leh pawnah record an nei tha. Season tharah hian player senior thenkhatte paihin rawlthar rual an khawm a, season hmasa khan MFA league champion an ni a, Independence Day Cup-ah semi finalist an ni. BSNL Cup-ah beisei an phak lo a, an che tha lem lo hle. MFA Cup-ah semi finalist an ni. Kumin hian team chhe lo ber pawl an ni leh thei ang em? An player tha thenkhatte chan mah se an aiawh zo tur player an nei turah beisei a ni. Champion thei tur zinga rinkai an ni.
FC KULIKAWN: Mizoram football-ah FC Kulikawn hi hmel thar a ni lo. Mizoram chhungah kher chuan tun hnaia record nei tha ber pawl an ni ngei ang. Hneh theih lohva ngaih thin Police team pawh anni hi a pal dai hmasatu an ni. Tunhnaia Mizoram football-a chanchin tha 'thlentu' te an ni pawh ti ila, a dik ang. A chhan chu Mizorama foreigner chahlut thei hmasa ber an ni. Season hmasa khan Independence Day Cup-ah runners up niin MFA league-ah pathumna an ni. BSNL Cup semi finalist an ni bawk. MFA Cup-ah pawh semi finalist bawk an ni. Kuminah hian player naupang zawk an khawn khawm a, team thar tha tak din tumin theihtawp an chhuah a ni. FC kulikawn hi beiseina sang tak nena thlir tur te zinga mi an ni ngei ang.
SSA FC: Nikuma khan I Div-a kai an ni a, I Division club zingah hmel thar ni chungin rin ai takin an hming an chher. Season hmasa khan MFA league-ah pahnihna dinhmun hauh thei khawpin an rawn 'inlar' a, Independence Day Cup-ah group league an paltlang zo lo thung. BSNL Cup-ah runners up an ni a, MFA Cup-ah runners up an ni leh bawk. An player pawimawh te phai lamah an kal nasa a, team thar an din leh thei ang em tih chu zawhna pawimawh tak a ni.
LUANGMUAL FC: Luangmual FC hi veng chhung mipuite tawiawm thatna avangin tunhnaia club thang duang ber pawl an ni. Anni pawh hi Mizoram football chanchin ziak danglamtu pakhat niin foreigner rawn hruai lut thei an ni. An player tha thenkhatte'n phai lamah 'kal bosan' mah se an hmun ruak luh khat thei tur player an thlang khawm leh tawh.
COLLEGE VENG FC: MFA League-ah a mawng phah an ni. College Veng FC te hian team thar dinin player naupang an la khawm a, veng chhung player an nei that te chhawr tangkai chungin veng pawn lam mi an team ti chak thei tur an lakte hian eng tak thlen zo ang maw?
RC FOOTBALL CLUB: Season thara Aizawl District Football Association buatsaiha zone hrang hrang champion-te inkhelh kual hnua champion an nih avanga Season thara I Div club-a rawn kai thar an ni. Kuminah hian Durltang leh a chhehvela player thate an khawm tha viau. Hmun danga mi an tem tichak tura an lakte hian kawngro an su ang em? Hmel thar ni mah se player an nei chhe lem lo. Eng tak ang maw? Sawi thiam a la har rih khawp mai.
No comments:
Post a Comment