Sunday, July 5, 2009

Chawimawi Tlak PTI

¢ David M. Thangliana

Singapore International Water Week-a kan chief minister Pu Lal Thanhawla’n, “I am a victim of racism in my own country” (Mahni ram ngeiah chibing inthliarna tuartu ka ni) ti-a sawi anga Press Trust of India-in thu a vawrh darh chu India ram chuan a buaipui hle mai a, a chhan pakhat chu Australia rama India mite’n chibing thliarna an tawrh lai leh India sorkarin Australia-a India khua leh tui cheng mekte thlavang a hauh lai a nih vang a ni. A chhan dang lehah chuan chibing ang zawnga inthliarna hi khawi ramah pawh lo awm se khawvelin (international community) a dem thin vang a ni.

Thil awmzia dik tak nia ka ngaih chu Singapore chinchang hriate chuan an hre thei maiin ka ring a. Singapore lo pian chhuah dan chanchin hi a kimchanga kan sawi dawn chuan thil dang a leng dawn lo a, chuvang chuan a tawi zawngin tihian sawi ta mai ila: British-hoin 1819 khan East India Company hmingin Sultan of Johor hnen atangin an luah hawh a. A hmaa ramhnuai mai mai lo ni thin chu British-hoin lawngchawlhna hmun atana an han luah takah chuan eizawnna tha zawk te lo awmin China atang te, Malay (tuna Malaysia ni ta) atang te leh India atang tein an pan a, chungho leh ram hrang hrang atanga pem lutte chu Singapore khua leh tui an ni ta mai a. 1959 khan mahnia ro inrelin sorkar te an nei ve a, Singapore mi han tih turin Mizorama Mizote kan tih ang hian tumah an awm lo a. Hemi avang hian hnam hrang hrang inchawhpawlh chuan Singapore hi an siam ta a ni ber a. Official language pawh pali lai an nei nghe nghe a, chu'ngte chu Chinese, Malay, Tamil leh English te a ni.

Hetia hnam hrang hrang inchawhpawlh awmna rama thu a sawi khan Pu Hawla khan India pawh hnam hrang hrang inchawhpawlh a nihzia sawilan nan India hmun thenkhatah chuan India mi ka nih ring lo te ka tawk ve thin tih thu a sawina-ah ka ngai a, “In ram leh kan ram chu kan inang khawp mai” a ti lek fang ni turah ka ngai a. Mahse a thusawi lo thehdarhtu PTI hnathawk chuan a duhthawhna lamah a kuaiher ta zeuh a, chu chuan inhnialna a thlen ta ni berin a lang. Chutih lai erawh chuan hetia thusawi kawihherna hian rah tha tak a chhuah ve tlat mai a, chu chu North East India-a chengte’n India hmun danga fahrawn leh ramdangmi ena min lo en thinna na kan tihzia sawichhuahna hun remchang a rawn siam ta a ni.

Pu Hawla sawi ang deuh khan India ramah hian hnam (race) lian pui puia then chi thum an awm a. Chungte chu - Dravidian an ni a, South India lamah an cheng a; a dang leh chu Aryan hnam an ni a, Central leh North India lamah an cheng a; a pathumna chu Mongolian thlah an ni a, a tam zawk chu North East India-ah an cheng a ni. Kan thlahtute a zirin kan hmel lan dan leh kan vun rawngte a inang lo vek a, Dravidian leh Aryan-te chuan inanna engemaw chen an neih laiin Mongolian thlahte chu kan danglam ta deuh hlek a, India hi hnam chi hrang hrang awmna hmun a ni tih hre lo tan chuan Mongolian hmelpute chu ramdangmi emaw an tih awl tak tur chu a ni reng a ni. Hetia ramdangmi emaw kan nih tia min hai thin hian lung a ti awi lo a, mahse, chu aia rilru tinatu chu NE mi kan nih avanga India ram hmun danga awm ‘vai’ kan tih mai te’n hmuhsitna nena min en thin hi a ni. Hemi avang hian NE atanga India hmun hrang hranga lehkha zira kal, Mongolian hmelpute chuan harsatna tam tak an tawk thin a, mahse heng harsatnate sutkian a nih theih nana tan min lakpuitu hi kan hmu tam lo a, NE students te phei chu an lungawi lohna a rei tawh a ni.

Tunhnu deuh hi chuan India rampui-a (mainland) mite chuan North East India hi a awm tih an hre ve tawh a, mahse NE India-ah hian tute nge cheng tih an hre lem lo a ni. Hnam chi hrang hrang India rama an awm ang bawk hian NE-ah hian hnam chi hrang hrang an awm ve a ni tih an hriat loh chu sawi loh, hnam chi hrang hrang inawmpawlhna ang zawnga tehkhin chuan NE hi India tenau a ni ringawt a, kan inpawlhsawp ve hle a ni tih chu an hre lo lehzual. Hemi hi India mi tam zawkin an hriat loh avangin hmel danglam deuh han pu ta chu min hmu hrang a, min hmu mikhual ta thin a ni. Chu chu tu thiam loh nge ni ta le?

Article dangah heta ka zawhna chhanna hi ka ziak tawh a, chutah chuan tihian ka ti a: “A tir lam chuan sorkar laipui thiam loh chu a ni meuh mai. Mahse sorkar laipuiin min ngaihsak that tawh hnu pawha hriat kan la hlawh lo viau hi chu national media te vang a ni a tih loh theih loh. Media lam mi ka nih avangin NE-ah pawh hian media thian tam tak ka nei a, keiniho hi inhmuhkhawm changa kan sawi ber chu national media-in min hlamchhiah zia hi a ni. Hei hi a dik chiah a, national media hian NE chanchin hi tarlang tam deuh se chuan India hian kan awmzia leh kan nihphung chiang takin a hre tawh tur a ni a. Mahse, hlawkna an um lutuk vang nge, kan chanchin hian mi beng a verh vak lova an hriat vangin chanchinbu hralh leh TV-a hlawkna awm vak lo-ah min ngai a ni ber ang chu, NE chungchang hi a tha lam chu an tarlang khat hle.

PTI-in kan chief minister thusawi her danglam hreta a lo chhuah tih hi tak tak a nih chuan a lawmawm hle mai, amah Pu Hawla tan huat thlala hle mah se. Hetia her danglam a nih avang hian sawi kan hlawh a, thil sawi hlawh reng reng chuan ngaihven a hlawh lo thei lo a, chuvang chuan PTI hi kei chuan chawimawi tlak hlein ka hria. Kan thalaite India ram hmun danga zirna tha uma kalte hi an tawrhna a rei tawh a. Kei hial pawh hi primary school-a phai lama ka zir laiin ka tawk a, kum 40 chuang a liam tawh hnu pawha kan thalaite’n an rual u zawkte’n kan lo tawrh tawh an la tuar cheu mai hi chu an lainatawm tak zet a, hetia kan harsatna chungchang a ram pum ang inhnialna rawn ti chhuaktu PTI hi fak a phu hliah hliahin ka hria a ni.

A lehlam zawnga thlir chuan kan CM hian PTI vangin engemaw chen chu a tuar mai thei. Mahse mipui tana rawngbawltu a nih angin a tawrhna hian rahtha a chhuah phawt chuan a lawmawm dawn a, chuvangin Pu Hawla hian PTI thu thehdarh dan hi lungawithlak loh hle mah se huata la lova puitling taka remchang a zawn zawk hi a duhawm hle. A thil sawi kaihher avanga lawmthu sawina reng a ring mai.

Related Posts :



No comments:

Post a Comment