¢ HC Vanlalruata
Tunlaiin sorkar hnathawk pension tawh rawih nawn leh an service pawhsei sak chungchang hi MZP lamin an auchhuahpui nasa hle a. Hna zawng mek thalai tan chuan sorkar hnathawk rawih nawn leh an pension hnu-a rawih chhunzawm hi a huatthlalaawm hle ang tih chu hai rual a ni lo.
Sorkarin hnathawk a rawihnawn emaw an pension hnu-a a rawih chhunzawma an service a pawhsei sak chhan hi chhuanlam a awm nual a. Kha a hna chelh kha a thiam em a, amah tluka thiam tur an awm remchan mai loh chhuanlama rawih chhunzawm a awm thei a. Chulo lehah chuan department lu ber a pension-in a hnuai ami chiah khan kha dinhmun chelh pha tura service a la neih rei tawk loh chhuanlamin pawhsei a awm thei bawk a. Hei hi chu ruahmanna thar siam hmaa hnawhkhah zawk angin an kaltir thin.
Sorkar hnathawk tupawh a tel lova thawh theihloh (indispensable) anga ngaih a ni thin hi a fello hle mai. Hei hi chu kalphung (system) awm felloh vang a ni. Mihring hi a tellova thawh theih loh khawpa fel fal a awm tak tak theih lohva, system tha tak hnuaiah chuan kha hna kha tupawhin thawk sela a danglam chuang ngai lo. System fumfe awm lohnaah erawh chuan mihring mal-ah an innghat vak thin. Hemi tibo tur chuan hnathawk zawng zawngin kalphung fel an neih a, training tha an neih a, experience tha nei tura hna engkim an thiam vek a tul thin. Chutianga kal dan tur leh inawp dan ruahmanna fel hnuaiah chuan thiam vaklo thin pawhin engkim an thawk thei thuai thin.
Sorkar hnathawk tam tak an pension hnu-a rawih nawn emaw an service pawhsei sakte hi chu an fel viau lam aiin sorkarna changtu leh sorkar hotu liante duhsak bikna an dawn vangte, thuneitute an tlawn thiam vang mai mai te a ni duh khawp mai a. Hetianga induhsakna hleihluak awm thin hian sorkar hna kal a tibuai zawk a, thangtharte an dal tlat bawk thin a. Chuvangin a theih hram chuan rawih nawn leh hnathawh lai inpawh sei sak hrim hrim hi chu (loh theih lohva hun khaihlak hnawhkhahna a nih siloh chuan) tih loh zawkah a tha.
Tunlaiah ngat phei chuan kan thalaite hi an zirna a bulthut atangin a tha a, an zirlai pawh a changkangin an zir sang tawh a. Hnathawk tur hian an tling em em a. An mamawh chu experience a ni mai a, thenkhatin an luhna tur leh kaisanna tur an dal tlat avanga experience nei tha theilo an tam thei hle mai thei.
Hemi kan sawi ruala pawimawh tak pakhat chu sorkar hian tuteemaw tellova hnathawh theih lohva a ngaih rual hian hmun thenkhatah chuan a ngaihna hre tawh sa zawng zawng sawn darh a ching ve leh thova. Chutianga a tih chuan hna-in nasa takin a tuar thin. A thiam zawng zawng senghawi a, a thiamlo leh tuaithar hlir an dahkhawm chuan hun engemaw chen chu harsatna a awm a. Chu chu midangin an tuar thin.
An duh chuan harsatna awm pawh pawiti lova a khawih thang an sawn darh chiam laia, a thenah thiam ve tho an awm chung pawha tuteemaw a pa ro emaw tih mai tura pension hun tawha rawih nawn leh service pawhsei kan uar leh viau thin hi chu ngaihtuah chian a tul khawp mai.
Chubakah chuan sorkar hnathawkte hi sawn kual theih an ni chung a, Ministry inthlak apianga pawngpaw siksawi burh burh hi a dik chuang lo. A chhan chu sorkar a inthlakin sorkar thar khan policy thar tihhlawhtlin a tum a, chutah chuan a hmanrua chu sorkar hnathawk an ni a. Sorkar hnathawkte chu sorkar dinglai apiangin a ngaih pawimawh kha ngai pawimawh ve a rinawm mai tura ngaih an ni. Chutih laia sorkar berin rinawm tur leh rinawmlo tur hria niawm taka a khawih chiam thin hi a tul lem lo. An rinawm lova an thalo a nih erawh chuan a khawih ngei ngei tur a ni a; hrem pawh a hrem mai tur a ni.
Sorkar hnathawkte hi sorkar atanga hlawh la, mipui sum hmanga hlawh nei an ni a. Sorkarah an rinawm tur a ni. Chutih rualin kan sorkar hian tih dikloh nei ni chuang lova, tan zawng, duhsak zawng leh duhloh zawng nei lang lutuka thil a tih chiam chiam chuan UP Chief Minister Mayawati ang chauh an ni ang.
Sorkar chuan a hnuaia thawkte chu a enkawl thiam tur a ni a. Duhsak bik emaw huat bik emaw nei lovin an hnathawhah a buk ang a. Thawk thalo leh diklo chu an tih dikloh angin a hrem ngam ang a. Chawimawi tur chu a chawimawi mai tur a ni. Mimal thila lak chi a ni lova. Pension rawih nawn leh service pawhsei sak ang chite pawh a tulna dikah chuan tih a ngai thei a. Induhsak vang liau liau a nih chuan a dik thei ngai lovang.
No comments:
Post a Comment