Nupui a nei dawn alawm hei!

Vincy-a'n nupui a nei dawn tih hi chanchinthar a nih loh pawhin zu nghei a tum, tih hi chu chanchinthar a ni chiang!

"Ka hmangaih ber ka nei thei dawn ta," a ti a, a hlim ngang mai. Palai an tir a, an inbe rem tawh niin thu kan dawng a, a ni leh hun tur erawh an la ruat lo.

A nupui neih hmain album tlangzarh a tum a, a album hi a 'bon' dawn viau niin Vincy chuan a sawi. "A bon tih ka sawi ngam chuan a bon dawn a ni mai," a ti.

A album thar tlangzarh hmain video pawh pakhat chu local channel-ah dah a tum a, video shooting pawh a nei tawh. A hla hming pawh a dangdai leh mai mai 'Fakselna' tih a ni deuh tawp.

He video pawh hi a hmuhnawm leh viau dawn, Vincy chuan, "A raw tiah tiah khawp mai," a ti.

A album thar tur hi "Zu Chhia' tih a ni deuh tawl a, sawi a hlawh dawn chiang. 'Zu' tih a tel tawh hi chuan a tha zawng emaw, a chhe zawng emaw talin sawi hat a tling nghal zel a, tunlaiah MLTP ACT hlih leh hlih loh tih velah inhnial a awm mek bawk nen eng emawti kawng zawng tal chuan album hriathlawh tak chu a ni dawn hrim hrim.

Vincy hian a zu in thu a pha ngai lo, mahse, hetia nupui a neih dawn tak avang hian zu pawh nghei a tum. "Pa han nih dawn hi chuan ngaihtuah turte hi a lo tam khawp mai a..." tiin a nupui nei tuir hi a hlim viau rualin a rilru pawh a hah ru ve viau tho.

Chhungkaw hlim tak din a duh a, chutiang tur chuan zu in reng nen a inmil lo tih pawh a hria. "Nghei a ngai tawh ang, chutiang renga awm a chi tawh lo," tiin zu nghei a tum thu a sawi.

Vincy hian eizawnna kawngah pawh mahni intodelh taka awm a tum a, nupui chawm nih ringawt a tum lo. "Nupuite chawm ringawta awmte chu a tih chi nang," tiin a recording studio siam mekah pawh tan lak a tum thu a sawi a, kum tir lam khan hetiang lam training nei hian Mizoram pawnah a awm deuh vang vang nghe nghe.

Related Posts :