Inneih Man Inhlan Ziak Dan Hi

¢ C Rokhuma

Fin leh var vang pawh ni hauh lovin, kum lama upa ta na na na chu, innei turte sawirem tura palai hna thawh chang a awm thin a.

Tunlai hian man-leh-mual inhlanna mak tih deuh mai ka neih chu, hmeichhe lamin an thutphah tur mipa lam an tumsak ta tlat mai hi a ni. Tun hmaa Mizo taka kan la khawsak lai kha chuan, mipa lamin pek nghal an duh pawhin manah an tel tel nghal duh lo a, ‘Thutphah tur a ni a, kan tel lo ang e,’ an ti nghal mai a. Chu chu Mizo dan dik tak a ni.

‘THUTPHAH’ hi inneihnaah hian hmeichhia, pasal nei tan a pawimawh em em a; awmze thuk tak nei a ni a. A pawimawhna langsar zualte chu hengte hi a ni:

1. Inpui lam nen an inthlunzawmna a ni. Thutphah nei ta lo sela chem leia lei ang chauh a ni.

2. Hmeichhe pasal neiin thutphah a neih chuan, a pasalin lo ma ta sela, a pasal chuan man zawng zawng a thutphah nen a pe vek tur a ni. Chu chang ni lovin; thuam chhawm nei a nih chuan a la chhuak vek thei.

3. Hmeichhia chu vanduaiin zan khat mitchhin lo tawk palh ta hlauh sela, thutphah nei a ni tlat mai a. A thuam chhawm zawng zawng a chhungte’n an la kir thei.

Inneih tuma thutphah la awm Rs20/- lek hi man ba dang ang a ni lo a, mipain a neihnun chhuanga mi fa duhlai chem leia lei mai tum chi a ni lo a, pe tla te tea a hmeichhe lamin an thutphah tur mipa lam pek kir chi pawh a ni lo. Mipa lam hian tawngkam thain pek vek pawh lo tum tehreng sela ‘Hei hi chu, Thutphah atan kan dawng lo ang e,’ tih mai tur a ni.

Dan tlangpuiin, tunlai pawhin nula biain palai vawi engemaw zat kal a ni thin a, hetah hian man inpek dan tur zawng zawng te sawi fel vek tur a ni a; man chu Rs 500/- emaw, 400/- emawah khan thutphaha bet tur emaw, 500/- leh thutphah Rs 20/- tih emaw Rs 400/- leh thutphah Rs 20/- tih emaw sawi fel nghal vek a; man inhlan hun khan sawi tawh ang khan indawn mai tur a ni a. Thutphah atan Rs 20/- pek kir a ni; tih ziak hian, Thutphah awmzia a bawhchhia a ni. Hmeichhiain an thutphah tur an man atangin mipain an (deposit) pe ngai reng reng lo a, mipa lamin chem leia an lei mai loh nan an inven kulh pawimawh a ni tih hi i hre tlang teh ang u.

Man inhlannaa ziak dan tur pawh (a tha ber ka ti lo naa) Form ka han siam a. A hmang duh tan chuan a hmantlak hle ang.

Related Posts :