Tunlai hla pakhat chu, "Van sanga lengin, chhawrthla eng hnuaiah..." tih a ni! A san lutuk hmel loh, thlawhnaa thlawh velna tawk a ni ngei ang! Chutiang vela sang chuan Mizo zirlaite lung a len hle niin a lang.
April ni 29 leh 30-ah khan Millennium Centre chungzawlah Edufest 09 huaihawt a ni a, he kutpui hian zirlaite a hip hle. Hna hrang hrang zingah van sanga thlawh theihna tur lamin a hip hle.
Edufest 09-ah hian zirlaite kawnghmuh theitu agency leh zirna in hrang hrang 40 an tel a, zirlaite'n panin, an hna duhzawng zir theih dan tur te an zawt a, anni'n kawng an lo kawhhmuh thin. Pilot nih tumte leh airhostess nih tumte buaipuitute an lun hle a ni.
Academy of Aeronautic Engineering, Bangalore chuan April ni 30-ah ringawt khan Mizo naupang, commercial pilot nih tum mi 100 vel an chhinchhiah a, an zingah hian hmeichhia pawh an awm nual. Airhostess nih tum mi 80 vel an chhinchhiah bawk. He'ng mite hian Academy of Aeronautic Engineering te hian an buaipui zui dawn a ni.
National Institute of Management Sciences (NIMS) pawh airhostess nih tum te'n an bawr hle. NIMS-ah hian Mizo nula pahnihin airhostess hna an zir mek a, anni hian Edufest-ah hian zirlaite an lo dawngsawng thin a ni.
"Airhostess nih chak an tam lutuk, an rawn kal sup sup mai. Sikul naupang hian an chak a ni ang, sikul naupangin min rawn pan sup sup mai," tiin NIMS-a airhostess nih tuma inbuatsaih mek Bety Lalliandingi chuan a sawi.
"Kan uniform te hi nalh an tia, bakah airhostess te nun dan, kan lifestyle hian a hip niin ka hria. Airhostess te chu ei leh inah te, incheinaah te, thil hrang hrangah hian 'special' taka enkawl an ni a, chutiang lifestyle chu an duh niin ka hria," a ti bawk.
Pilot leh airhostess nih tumte kawng kawhhmuh theitu dangte pawh an lun a, aeronautical engineering leh aircraft maintenance engineering lam pawh zirlaite hian an bawh viau bawk.
Edufest 08-ah pawh hetiang lam hi zirlaite'n an lo ngaihven hle tawh bawk.
Edufest 08 hi nikumah khan April ni 29&30-ah Millenium Centre chungzawlah vek hian neih a lo ni tawh a, chumi tum chuan airhostess leh thlawhna lamin zirlaite a hip hle.
AHA stall chuan Edufest 08-ah hian airhostess nih theih dan hrilhin an pui zui thei tih an puang a, hei hian zirlai a hip hle a ni. Hmeichhia - ft 5.2-a sang chin, pawl 12 pass chin tana thawh theih airhostess hna hi pawl 11& 12 zirlaite'n an bawr a, chutih rual chuan nula puitling, MA zo tawhte paw'n an berawn bawk.
AHA te inkhuarna piah lawkah chuan Edufest 08-ah hian Academy of Aviation Engineering, Bangalore te an inkhuar a, anni pawh hi an lun hle. A nghaktute chuan aircraft maintenance engineering zir chakte'n an bawr hle tih an sawi a, dawrtu hi an beisei aia tam an hmu tih an sawi bawk.
Chutih laiin a zir man a san deuh vangin zirlai thenkhat chuan an zuam lo tih an sawi thung. Kum 3 daih he course zir tur hian Rs 4,40,000 a ngai a ni. Pawl 12 (Science)-a 50% hmu pha chin, physics, chemistry leh mathematics late tan a zir theih a, pawl 11 leh 12 zirlaite'n an rawn nasa tih stall nghaktute chuan an sawi.
Zirlai hmeichhiate'n airhostess nih an chak chungchang hi sawiin airhostess nih tuma inbuatsaih mek Bety chuan: "Ka rin ai daihin mi hian airhostess nih hi an lo chak. Hna tha a ni a, kan zirna hmunah te hian midang rawn lut zel se ka duh khawp mai a, an rawn luh zel pawh ka beisei," tiin a sawi.
"Amaherawhchu, hetia kan ngaih ang ngawt hi chu a ni lo tih kan hriat a thain ka ring. Thatchhe taka zir theih a ni lo a, inthlahdah a thiang lo tawp. Kum tluana taima taka zir a ngai a, mi tam takin an rin ang ngawt chu a ni lo ang," a ti thung.
Bety hian Diploma in Airhostess Training a zir mek a, August thlaah an zo ang. Thla 14 chhung zir tur a ni a, an zirna hmunah hian Rs 1,44,000 vel sen a ngai. Zirna hmun dang nen a inthlau lo ang.
Airhostess nih tuma inbuatsaihna hmunah hian Hindi, French, English (BBC) te an zir a, mi kawm dan, mi dawr dan, mi tihhlim dan te an zir nasa hle. Mi mit taka en dan, nui seih chunga mi mit taka ena midang tihlawm dan te an zir thin.
Taksa enkawlna lamah pawh model tur ang maia ulukin an enkawl a, make-up leh a bawlhlo thlengin zirlaite chuan an dawng thin. Tattoo nei pawh airhostess atan hian an duh lo reng a ni.
Ei leh in lamah pawh an zirlai atangin duat an hlawh a, eitur tha ber ber an dawng thin. Thei leh thlai lam an ei nasa a, buhfai ei an phal vak lo thung. Kawng engkimah mi pangngai khawsak dan aia sangin an inkhawsaktir a ni ber.
Chutiang vel chuan khawvel hmun hrang hrangah hmeichhiate a hip thin a, sipai leh ralthuamin mipa a hip thin ang hian airhostess hna hian hmeichhiate a hip thin a ni. Chutih rualin airhostess te hi pilot leh thlawhnaa thawkte'n an beisei chawk tih chu sawi dan pakhat a ni ve tho.
Edufest 09-ah hian zirlaite'n engineering lam an bawh viau bawk, computer engineering lam an bawh zual. Hei hi chu beisei saah a ngaih theih ang. Tunlaiah engineering lam hi khawvel hmun hrang hrangah a lun hle a, hna tamna leh hlawh sanna nia ngaih a ni. Engineering-ah pawh computer engineering lam hi khawvelah a lun ber tiin a sawi theih ang. Edufest 08 leh Edufest 09-ah pawh zirlaite'n engineering lam an ngaihvenzia a lang a, hetiang lam kawng kawhhmuh theitute an lun hle.
Mizote la mikhual deuhna - management studies lam pawh zirlaite'n an bawh viau mai; Edufest 09-ah hian malkhaiah chuan management studies lama zirlaite pui theitu Times Bussiness School-in tlawhtu an ngah ber hial mai thei.
Management lam zirna peng hrang hrang nei, Times Business School hi an lun char char hle a, anni hi 'stall' tha bera thlan an ni nghe nghe.
"Edufest 08-ah khan ka rawn kal tawh a, Mizo naupangte'n management studies lam an ngaihven tih hi ka hria. Tunlai khawvelah management studies hi a lar a, a pawimawh bawk a, Mizo zirlaite'n an ngaihven hi thil lawmawm tak niin ka hria," tiin Times Business School-a hmarchhak viltu, business development associate Seemanta Baruah chuan a sawi.
"Kan beisei phak bakin dawrtu kan ngah. Mahse, management lam hi chu inkaihhruai a ngai a, kawng kawhhmuhtu an awm a ngai a, chuti lamah chuan hma kan la a, Mizo zirlaite'n heti lam an bawh deuh deuh hi kan duh khawp mai," a ti bawk.
Hemite hnuaiah hian Mizo pahnihin BBA an zir mek a, pakhatin MBA a zir mek bawk. Anni pathum hi Edufest 08-a Times Business School te'na kawng an kawhhmuhte an ni.
Management peng hrang hrang zingah hotel management lam hi zirlaite'n an bawh ber mai thei. Hmeichhe lamin heti lam hi an bawh hle. Dehra Dun atanga rawn kal BIFT te chu BBA (hotel management) zirtir thei an ni a, zirlai hmeichhiate'n an bawh hle. An beisei phak bakin anni hi an lun a ni.
Tunlai khawvela thang chak tak - bio technology lam pawh zirlaite hian an ngaihven viau a, tourism industry lama thawh theihna lam an ngaihven viau bawk.
No comments:
Post a Comment