¢ Debbie Chawngthu
Taksa leh vun enkawl peih tan tunlaiah chuan inenkawlna tur chi hrang hrang lei tur a awm tawh a, mahse a then chu man to tak tak te an nih thin avangin ei tur ringawt anga kan ngaih thin atanga vun leh taksa enkawlna tur i han tarlang teh ang. Heng kan tarlan tur te hi huat nei thin tan pawh an huatawm loh a, chu chu an thatna pakhat a ni.
ARTUI: I vun a nung lo riauvin i hria em? Artui hel pakhat hi han chawk bawrh bawrh la, i hmai leh nghawngah han hnawih teh. Khumah hahdam takin mu la, minute 20 chhung chiahin tuivawtin phihfai leh ang che. Artui hian vun kaw zau tawh a sawr zim a, hmai chuar tur a veng bawk. Artui var lai hi cleanser tha tak mai a ni bawk a, sam i suk hma darkar chanve chhung i sam chiah nan hmang ang che. Conditioner anga hman i duh anih pawhin artui pakhat chawk phuan la, chutah chuan brandy fiante hnih pawlh la, i sam i suk hmain i sam nuai nan hmang ang che. Sam leh luleia artui regular taka i hnawih anih chuan i sam a nung ang a, sam hmawr kak lo awm tur i veng bawk ang.
THINGFANGHMA: Thingfanghmaa enzyme awm hian vun thi a ti nung a, a tih nem mai bakah a tifai bawk. A tak hi rawt sawm la, face mask atan hmang ang che. Hei hi vun engang tan pawh a pawi lo a ni.
SERTHLUM: Serthlum kawr hi paih mai lovin khawl la, nisaah pho ro ang che. A lo ro hnuah dip takin tui tlem nen rawt diak la, face mask tha tak i nei a ni mai. Face mask reng reng hi minute 30 tal hmai chiah nan hman a tha.
CARROT: Carrot ho vun ro leh sensitive tan a tha bik a, tui tlemteah chhum la, a daih hnuah rawt sawm ang che. Chu chu face mask anga hman mai theih a ni.
THINGPUIFE: I mit a kham riau anih chuan thingpui sen dai tawhah lapua chiah la, chu chuan i mit khuh ang che. Thingpuife hman tawh hi paih mai lovin sam tih tlet nan khawl la, i sam suk dawnah tui nen chhuang so leh la, a daih hnuah i sam tleuh nan i hmang dawn nia. Pangpar hian an ngeih hle bawk a, pot ah chhun luh mai tur a ni.
CHI :Mit kham leh bui lek luk tihreh nan tui lumah chi al la, chu chuan i mit dim takin hru ang che. Chi tuiah lapua chiah la, i mit khuh nan i hmang thei bawk. Kea i kal hah hle anih chuan chawhtawlhah tuilum dah la, chi fianthum vel i telh hnuah i ke chiah nan hmang ang che, i ke kham a reh huai mai ang.
CASTOR OIL: Sam nung tak i neih duh chuan castor oil hian i sam zankhuain chiah thin ang che. I suk hmain tuisaah towel chiah la, i sawr hnuah towel lum chu minute 20 vel i lu tuam nan hmang rawh. Hetianga tih hian oil kha luleiah a lut tha bik a, samin a ngeih em em a ni. Mithmul sei leh dum i duh chuan i mut hmain castor oil hnawih ziah ang che.
KHAWIZU: Khawih danglam ngai miah lova moisturiser ni nghal chu khawizu hi a ni a, i theih anga tam i hmai chiah nan hmang thin ang che. I vun a mawm anih chuan artui var lai nen chawhpawlh la, inhnawih ang che. I vun a ro ve thung anih chuan cream tlem nena chawlhpawlh hmang la, a tha em em ani.
FANGHMA: I mit men a nuam lo anih chuan fanghma zai lep la, hahdam taka mu chungin i mit khuh nan hmang rawh. Artringent anga i hmang duh anih chuan rawt sawm la, bawnghnute tlem pawlhin i hmaiah hnawih ang che. Vun mawm nei i nih chuan fanghma kawr hian i hmai nawt thin ang che, a tihfai mai bakah vun mawm lutuk tur a veng bawk ang.
ZIKHLUM: Zikhlum tui dah daihin i hmai phih la, vun chawmtu tha tak a ni mai.
SER:Vun mawm nei mi leh ser ei peih lo tak i nih pawhin i hmai hruk nan tal hmang rawh. I vun mawm a nep mai bakah arngeng awm tur lakah a veng ang che.
CURD: Bawnghnute khar hlang hi hmai chiah nan a tha hle a, vun mam nan regular takin hmang thin ang che. Aieng nena chawhpawlh pawh a tha.
No comments:
Post a Comment