Monday, May 25, 2009

Bihari Chang An Ni Lo, Bihar-a Zofate Pawh Kan Chhangchhe Ve Tho!

¢ Lian Kunga

A chhunga cheng mihring tam ta na na na chu, Bihar ram ropuiah hian mi maksak tak takte leh thil mak tak tak a thleng thin a, chu'ng te chu he article ziaktu hian vawi tam Zoram lama chanchinbuah a chhuah thin. He article-ah erawh chuan Bihari te chanchin ni lovin zirna sang zawka zir tur leh, chanchin tha puangdarh tura Zoram atanga lo kal Zofa te zinga thenkhat te pawh an talbuai ve zia sermon-na a ni. Tu’n huat thuah an la em lo ang chu maw. “Chawngkhum dan, thlanghuat loh” tih a ni miau a.

Kum 1995 kum kha ni tain ka hria. Ranchi Area Development Authority-a MD ka nih laiin, Zorama mi khawsa thei pangngai fapa, rilru buai avangin Ranchi-a Mental Hospital-a dah turin a chhungte'n an rawn hruai a. Ranchi-a lo awm ve ta chu min rawn bel a, in-admit tura thil tul apiang ka tihfel hnuah a chhungte'n an fapa chu hmu ve tura min ngen avangin an thlenna hotel-ah ka va kal ta a. An room chhung ka luh veleh inhmelhriattirna kan nei nghal a. An fapa chuan ngun taka min en vang vang hnuah chuan, “Pu Kunga chu hmanah khan ka that daih tawh si che a, i la dam fo a ni maw?” a ti ta a nih chu!

Rilru kim lo mah ni se chutianga min han sawikhum siah mai chu ka tim-uai uai a, hlauhnain ka tangah min bel hman hial. Ani nen khan pian a hnu lamah vawi khat mah kan la inhmu lo a, mahse min that daih tawh a lo nih chu! A chhung te inthiam loh nasat zia ka hmuhin ka lainat lehzual. A tukah Mental Hostital-ah (a thah tawh hnu ngei khan) ka va admit ta a nih chu! Ka buai nileng thak lehnghal.

Gaya Medical College-ah hian Mizoram, Meghalaya, Tripura, Arunachal leh Sikim state-te tan kum tin MBBS seat khat theuh reserve a ni a, chu'ng state atang chuan tlangmi zirlai sawm zet kum tin an awm reng thin. Zoram atanga lo kal MBBS zirlai pakhat chu kum 2005 atang khan a talbuai ta a ni. Bawnghnute la turin an College atanga hla vak loah a kal thin a, kal velna tur thirsakawr a nei lo a, bawnghnute lakna bur lah a nei hek lo. A lak dawn apiangin a thiante thirsaksawr (cycle) leh bur a hawh thin a, a chang leh a haw lamin bawnghnute bur a theihnghilh a, a chang leh cycle a theihnghilh thul! Heng thil pahnih te hi a theihnghilh chhawk reng mai a ni.

Chutia a theihnghilh thin avang chuan a thiante cycle panga lai a tihbosak a, bawnghnute lakna bur pawh vawi sawm lai a tihbo sak tawh bawk. Chuvangin a thiante'n hawh an phal tawh lo a, a chebuai teh asin!

'A zualzapui vailenhlo' an tih ang maiin chu tlangval ngei chu kum 2006 khan a talbuai ta tak tak a. Hostel atangin zanah hmanhmawh baklengin ramhnuai lam panin a tlanchhuak a! Kekawrbul tih loh chu thawmhnaw dang reng a inbel lo a, pheikhawk pawh a bun hman lo. Patna-a lo awm ve ta chu Mizo zirlai dangten hlauthawng takin, “Pu Kung, Mr….-a a bo daih, engtia tih tur nge?” tiin min rawn phone a. Chutia thlabar taka min rawn hrilh takah chuan a rang thei ang berin Gaya DM leh SP ka be nghal chuk chuk a, vanneih thlak takin an DIG chu DM ka nih laia ka SP a nih avangin a la thutak ta a. Police 15 zetten a hrang hranga inthendarhin Gaya khawpui leh a chhehvel an zawng ta mup mup mai a ni!

Ni thum leh zan li lai police-te'n an zawn hnuah pawh an hmu zo lo a, Bihar-a Mizo awm te pawh kan mangang hman hial.

Chutia mangang taka kan awm lai chuan, a zan lina khawvar hnu deuh lawkah Mr-a chu amahin a lo haw leh hlawl a. A thiante pawh a be duh lo a, biak pawhin a chhang duh bawk hek lo. A awmna hostel-ah pawh kir leh duh lovin vai Kristian inah a lut a, hmanhmawh takin pindan pakhatah lutin a inkalhkhum tlat mai a ni. Chutia a lo haw leh tih min hrilh veleh Patna atangin MBBS zirlai vek pathumte chu, Gaya-a a rang thei ang bera kal turin leh, Patna-a kan ina rawn hruai haw vat turin Gaya-ah ka tir thla ta a. Gaya-a a inkulhna an thlen chuan Mr-a chuan kawng pawh a lo hawn duh lo a, ventilation atangin a en duh tawk. Zirlaite chu biain a tlanbo leh loh nan awmchilh turin ka ti a, a inkulhna pindan chhunga luh a phal tlat loh avangin khawlum leh thosi karah ka mitirh te chu kawngkhar pawn lamah an tlaivar thak nia! A tawmna pa pawh a mangang ve hman hle, min rawn be zur zut mai a ni.

A tukah chuan engemaw ti tiin an thlem a, Zoram atanga a u-te lo kal te nen Gaya atangin tlai lamah Patna-a kan in an rawn thleng ta rup mai a ni. Thawmhnaw pawh ha lova hmanhmawh taka tlanchhuak a nih avangin ramhnuaia zum leh hriamin a taksa pum a ti hliam phengphung a, a ke-ah phei chuan eng ber nge a rah ni ang, thuk tak takin a pem thluah!

Mikhual pindanah kan riahtir a, Samari mitha ang maiin ka thiannuin a hliam te chu damdawi eng engemaw a hnawihsak hnuah ni khat chhungin a hil nghal a. Zing thingpui pe tura a mutna lama lo kal kan eisiam a hmuh veleh hlau leh khur chunga ring taka auvin, “Hei vaipa a lo kal!” tiin khumah chuan tlangval thankin tawh chu a’n ralkhel leh rih vel! Kan buai ve mai mai asin aw! Vai rama lehkha rawn zir si khan vaiho a hlau tlat a, buaithlak tak a ni!

Chutia tlema a ngaihngam deuh hnuah chuan a rawn tho chhuak a, a tlanbo chhan leh chanchin kan zawt ta a ni.

A sawi dan chuan: “Indopui an puang, tiin hostel-a fanghmirte leh nungcha zawngten mahni sahimna zawng vat tura min nawr sek avangin hmanhmawh takin ka tlanchhuak a, pheikhawk bun leh kawrhak chhung tak ngial pawh a rei dawn avangin ka thlanchhuak ringawt mai a ni,” tiin.

Chu Indopui atanga himna zawnga chak taka thimthama tlan a nih avangin a kalna tur hmu thei hek lo le, Gaya atanga km 15 zet a hlaah vaiho tuichhunchhuahah a tla thla ta a ni awm e.

Ka thiannu hnena a sawi danin chu tuichhunchhuahah chuan tui a lo awm lo hlauh a, chu khuaa mite chuan harsa takin an khaichhuak a ni awm e. He real life hi Gaya-a DIG pawhin bulfuk takin hmaichhanah min hrilh bawk.

Ni hnih khat kan inhrawn hnuah MBBS zir chhunzawm lovin Bihar hnutiang a chhawn a, Zorama haw turin Kolkata-ah an thlawk thla ta a ni.

Tin, ngai teh, chumi ramah vek chuan kum 2000 atanga 2005 inkara Zoram atanga Bihar-a MBBS zir tur Zofaten admission-ah harsatna a tawh avangin kei tehlul hian ka lo tanpui thin. An zinga pakhat pawhin a pangngai tein tanpui turin min rawn pun a. Medical College-a principal hmu tur chuan ka inchhepchhuak ta a. Vanneih a siamin min lo ngaih pawimawh ve khanglan avangin thamna pek ngai lovin admission phalna ka hmuhsak ve leh mai a. Principal-in a phal tih ka’n hrilh veleh ani chuan, “Pu Kung, MBBS pass hnuah Specialist(PG) zirna turin India ramah khawi medical college nge tha ber ang, chu College-ah chuan ka la lut ang...” tiin a insep rawtui nghal vel maw le!

MBBS zir tura admission pawh tihfel hmain specialist zir hun tur a thlir daih! MBBS pass pawh a namai loh teh reng nen! Hetiang mi hi em ni saphovin, “vision nei” an tia an sawi thin hi le?

Kum 1995 leh ‘96 velah khan Ranchi-ah bawk Zoram atanga an tirhchhuah (a tirtu Kohhran chu sawi lo mai ang), chanchin tha puangdarh tur nia insawi maksak tak kan tawng tawh bawk.

Zoram atanga a ruaituten inchawmna khawp pawh hlawh an pe lo nge, pawisa a hmang thiam lo hrim hrim, tih lah hriat ni hek suh. Missionary ve ta fam chu a hlawh zat zawh a mawihnai bawk si lo. A khat mawi tawkin Mizo officer-te hnenah leh a ngamtlak awze mite inah vehbur a khawn kual deuh reng mai nia!
A chang leh zanriah thlak tur buhfai kg khat vel dilin a kalkual thul! |anpui sen a ni lo. A vehburkhawn buai a ta langin ring lo mite hnena chanchin tha puangdarh turin hun a nei lo a ni ber mai! Mizo officer hnen atanga rei tak a hawh LPG gas bur pawh a haw hmain pek let leh a tum lo! Khawiah nge a thehthang tak tih pawh tun thlengin hriat theih a ni lo.

Awle, a chunga ziahlan tak te hi mimal intih mualphona tura ziah a ni lo. He article-in a tum ber chu, Zofate hi India ram hmun hrang hrangah zirna sanga zirin leh hnathawkin kan awmdarh tawh a, harsatna chi hrang hrang kan tawk thin. Zofate kan nih ang ngeiin a chhia leh a thaah intanpui tawnin kan intawiawm tlang thin, tih Zorama awm te pawhin in lo hriat ve a tana ziah a ni.

Thil dang maksak tak tak dang te pawh he article ziaktu hian a tawng hnem tawh khawp mai, mahse he article tawi te-ah hian a vaiin sawisen a ni lo. Pathianin rem a tih chuan ka la chhunzawm leh dawn nia.

Related Posts :



2 comments:

  1. Established in 1997, St. Gregorious Edu-Guidance is a leading education consultancy services providing exemplary service to students all over India. We deal in Admissions to all major professional courses in Premier Institutes across India. We are your one step solution for all career related needs, it may be MD, MBBS BE, BTech (ALL BRANCHES), , MDS, BDS, BPharm, BArch, MBA, MTech, MS, , PhD or any other courses. We provide personalized career solutions on an individual basis keeping in mind the aspirations of our client as well as the affordability factor.
    FOR ALL CAREER RELATED NEEDS CONTACT US :
    St. Gregorious Edu-Guidance,
    #2, 2nd Floor,
    J J Complex, Above Chemmannur Jewellers,
    Marthahalli - P O,
    Bangalore - 560037
    Karnataka
    e-mail :jojishpaily@gmail.com
    Contact: +91 9448516637
    +91 9886089896, +91 9449009983
    080-32416570, 41719562

    ReplyDelete
  2. Established in 1997, St. Gregorious Edu-Guidance is a leading education consultancy services providing exemplary service to students all over India. We deal in Admissions to all major professional courses in Premier Institutes across India. We are your one step solution for all career related needs, it may be MD, MBBS BE, BTech (ALL BRANCHES), , MDS, BDS, BPharm, BArch, MBA, MTech, MS, , PhD or any other courses. We provide personalized career solutions on an individual basis keeping in mind the aspirations of our client as well as the affordability factor.
    FOR ALL CAREER RELATED NEEDS CONTACT US :
    St. Gregorious Edu-Guidance,
    #2, 2nd Floor,
    J J Complex, Above Chemmannur Jewellers,
    Marthahalli - P O,
    Bangalore - 560037
    Karnataka
    e-mail :jojishpaily@gmail.com
    Contact: +91 9448516637
    +91 9886089896, +91 9449009983
    080-32416570, 41719562

    ReplyDelete