¢ HC Vanlalruata
Kan Kohhran hruaitu un tak pakhat nen vawi khat chu camping, crusade, bethel tih vel chungchang hi kan sawi dun a. Simna tak tak tel si lova phur hluaina leh lungnona (emotion) tipunluntu, mi lema min siamtu, lemchan khawvela min tarlangtu leh nun nghetlo, nun pawnlawi kan nihzia phawrh langtu mai a nih thu ka sawi rawtui pui a. Chu kan pastor senior chuan ka thusawi chu a let thla bik chiah lo a ni ang, “Kohhran hian a thlakna tur kan la hre miau lo a ni,” tiin min chhang a ni.
Hlim hlutna kai chhuak thei chi hetiang camping/crusade tih vel tha ka tih lohna hi a chunga ka sawi takte mai khi a ni lova. Hlauhna hmanga in pianthar tir tum hi tha ka ti lova, insawithaihna hmanga vanrama kai theihna tur kawng zawn hi ka duh hek lo. Eden bawhchhiatna min hrilh a, misual lailet der, hremhmun/meidil hrehawm lutuka kal ngei ngei tur tiin min sawi thaih chiam phawt a. Chumi pumpelhna atan chuan piantharna-ah min pawh luh an tum ta thin. Hei hi evangelist kan tihte leh kan thuhriltute’n camping leh crusade vela min hrual dan a ni ber a. Ka mi hriat chian tak, vawi 12 aia tlemlo piangthar tawhin, “Eden huana Adama leh Evi bawhchhiatna leh chumi avanga Pathian laka sual chhe lailet der, meidil-a tla ngei ngei tur kan nihna, chu meidil pumpelh tura Isua rin tur a nih thu nilo thu thar min hrilh dawn chuan he camping-ah hian ka lut ang a. Chumi tho min hrilh dawn chuan eirawngbawltu lamah ka tel mai ang,” a tih kha ka bengah a cham reng thin.
Sakhaw thil mah hetiang a nih laiin kan khawvel nun hman dan, kan sorkar kalphungah leh zel intihthaihna leh hlauhna kan chelek hi a pawi khawp mai. Hlauhna pawlitik (politics of fear) hi a hlauhawm a ni. Tun tum Assembly inthlanah pawh kan ram hruaitute chuan “Kan party-a i rawn luh loh chuan chutiang khatiang i dawng ve lovang,” tiin mite thinlungah hlauhna chi an tuh a. Kan retheihna denchhenin kan hrumah min vuan a, an duh duhin chu thil tha dawn veloh palh kan hlauhna behchhan chuan min hnuk ta mai thin a ni.
Kan ram politician-te hian mipui hi rethei se, an retheihna denchhen hian kan sorkar reng thei ang tih an ngaihtuah nite hian ka hre fo thin. Mi rethei chuan eitur neih loh kan hlau a, chaw nghei mai kan hlau a, a saptawng takin ‘food security’ kan nei lova, chu hlauhna hrui chuan kan kawngah hrengin duh duha kaih her kan awlsam tawh thin. Chumi piahlamah kan fate’n mite nun dan an hmu ve reng a, rualawh an ti na a, fate duh ang phuhruk theilo nih hlauhna chuan chhia leh tha hriatna bo thakin duhamna bawihah min hruai lut a. Kan ram thatna tur pawh ngaihtuah thei lovin kan awm phah thei a ni.
Inthlan dawna kan retheihna denchhena intihthaihna mai a la nilo fo. Sorkarna chelhtu political party hotute chuan thuneihna engkim an chang miau si a. Miretheite chu an pawl zawm ve ngei turin min tur luiin min vau thin. Rorellai party mi leh sa nih loh chuan BPL member pawh a nih hleihtheih loh an ti nia! Rorellai party mi nih loh chuan inhlawhna ilo leh therhlo dawn tur awmah min thlauthla ta zel a. Kan chhungkua-in kan mamawh em si avangin chhia leh tha hriatna pawh hmang thei lovin a umin kan um ta ruak ruak a. Kan zahawmna thlengin kan hralh ta thin a ni.
US mipuiin Bush-a leh a kaihhruai Republican Party chiang taka paihthlaa, Democrat hruaitu Barack Obama an thlan tlin chhan pawimawh tak pakhat chu ‘Change’ a tlangaupui piahlamah Bush-a’n hlauhna pawlitik a chelek vang kha niin an sawi thin. Kum 2001 September ni 11-ah US chuan firfiakte kutthak namen lovin a tuar a. Chumi phuba lakna atan chuan he firfiak chetnaa mawhphurtu Osama bin Laden-a pawl al-Qaeda tawmkuk Taliban rorelna Afghanistan chu an run ta a. Kha kha chu mipuiin an pawm thlap. Mahse, a tlin zel theihna tura America mipui hlauhna pawlitik-a hruailut a, mihring suat puk puk thei ralthuam nei leh firfiak khawia a puh Iraq ram a run kha an ngaidam ta lo a ni. An han hneh a, an lipse-a Saddam Hussein-a khan mihring suat puk puk theihna ralthuam a lo nei lova, chutiangin al-Qaeda nen an lo inti chhungkhat vaklo tih an hmuchhuak a. Mipui ngaihdan a ni ta lo. An sipaite nunna chan nen a in man thlawt lo a ni.
Ka sawi duh ber chu ram changkangte angin mitin hi hlauhna bawiha lut lo turin tan kan lak a tul a. Sorkar thiltih zawng zawng hre thei turin zirna leh thiamna bakah thil hriat tam leh thuk kan mamawh a. Kan sorkarin mitin zahawm taka eitur thawk chhuak thei tur zawnga thil a kalpui loh ngam lohna tura chet kan lak a tul a. Riltam huaisen an tlem avangin riltam leh rethei-a kan awm chhung chuan hlauhna bawihah kan tang reng dawn tih i hria ang u. Chumi atanga khaichhuah kan nih theihna atan chuan kan huaisen a, kan harhchhuah a, kan thluak hmanga thil hria kan nih hi a pawimawh hmasa tak zet a ni.
No comments:
Post a Comment