Friday, April 17, 2009

Sorkar Tuk Atangin NLUP

Inthlan dawna mipui hipna tura thu dik chanve sawi hi politician-te chin dan a ni fo. Zoram pum huap pa langsar ber berte'n rui lo hai lova an sawi ngai an sawi tlut tlut takah chuan Zopa pangngai tan chuan lo awih mai a awl viau thin a, mahse, inthlan a zo a, ram hruaitu an han nih meuh chuan an thusawi takte kha an vei zui tawh ngai meuh lo. NLUP chungchang pawh hi chutiang deuh chu a ni ang tih a hlauhawm khawp mai.

Nikum lam te kha chuan NLUP sawi ruala mipui rilrua lo lang nghal chu 'chhungkaw tin hnena Cheng nuai khat sem' tih a ni. Chutiang dawt chuan hmun tam takah sawi lo mah se mipui rilruah cheng nuai khat sem hi tuhin a awm tih erawh a chiang khawp mai.

Politician tam berte hian hmai hnih neia thusawi an chin avangin mipui rin an hlawh loh phah fo a, dik tak chuan party mi leh sa bak ngaisangtu an awm meuh loh chhan pawh hi an thusawi thin vang hi niin a lang.

UT hun lai atanga vawiin thlenga ram hruaituten mipui hmaa an thusawi leh ti tura an intiam zawng zawng hi tihlawhtling ta vek se chuan thingtlang loneitute hi Mizorama pa nuamsa ber ber an ni tawh ang a, power (electricity)-ah kan intodelh tawh ang a, eirukna a bo ang a, politician-te aiin taima taka hnathawkte hi an hausa zawk ang a, raltiang ram thlir loin he ramah hian 'Lal lai par tlanin' kan leng tawh ang. Mahse, kan pute thusawi hi mipuite hriatthiam rual loh khawpa thu inthup, pawnlang ang reng fu a lo ni leh thin si. An thu leh ui bengah hlin tur a vang em thin a ni.

Thla hmasaa budget session-ah khan NLUP chungchanga eptu lama mi KLiantlinga, MLA zawhna chhangin chief minister Lal Thanhawla chuan, kum 5 chhunga NLUP tihpuitlinna atana sorkar laipui atanga sum dil chu cheng vaibelchhe 2,500 a nih thu a sawi a nih kha.

Sorkar laipui chuan nakkum sorkar kum chhunga hman turin cheng vaibelchhe 500/600 Mizoram sorkar pek remti mah se, kum 10 kal ta chhunga Mizoram sorkar hna thawh dan leh inenkawl dan a tlakhniam tawh em avangin cheng vaibelchhe 120 bak chu dik taka hman a harsa dawna hriat a nih avangin a kum hmasa berah chuan hei hi tawkah ngaih a ni, a ti bawk.

Assembly house-a pu ber thusawi atanga a lan dan hi chuan pawisa kum thar atangin NLUP-a hman tur cheng vaibelchhe 120 a awm dawn tihna tluk a ni. Mahse, budget-ah chuan cheng vaibelchhe 100 dah chhin a ni thung.

Hemi hma hian MPCC thupuangtu Ronald Sapa Tlau pawhin Bhavan-ah thuthar lakhawmtute a kawm tumin NLUP bultanna atan congress sorkarin cheng vaibelchhe 100 a nei tawh niin a sawi a, mahse he a thusawi hi a hnu lamah an pha leh deuh thung.

Inthlan campaign lai khan tuna MPCC president Lal Thanhawla chuan Serchhipah NLUP chungchang hi sawiin, "..Lal Isuan 'heng mi te ber chunga in tih hi ka chunga ti in ni e' a ti ti r'u? Chuvangin NLUP (new land use programme) in vawiinah chuan kan sorkar tuk atangin Zoram kuthnathawk mi te, hmeithai te, pachhate zawng zawng hi kan tuam chhunzawm leh ang. A lo berah Cheng nuai 1-in rahbi kan tuksak ang kan ti a ni," a ti a. A ngaithlatuten kut an beng hluah hluah a ni.

Tichuan NLUP vang leh thil dang vangin mipuiin congress party candidate-te hneh takin an thlangtling a, November ni 11, 2008 khan sorkar thar lakluh a ni a, MPCC president Lal Thanhawla chu chief minister a ni ta bawk.

Mahse, an sorkar tuk atang chuan thla 3 pumhlum a liam leh tawh a, NLUP hmangin tumah an la tuam chhunzawm ta chuang lo. Chutih laiin, a khat tawkin NLUP chungchang hi chu an sawi ri reng a, mipuiin ngaihdan nghet an lo neih tawh te chu 'chutiang a lo ni lo' ti ang deuhin an sawi danglam leh thul. Eptu party lamin an lo chhaihbuai ve reng bawk a, insawifiah thiam a pawimawh hle a ni.

Mahse, Health Care Scheme pawisa chingpen dan media lamah a putru hlauh mai a, chu thu chuan Aizawl khawpuiah chuan NLUP a hliah khuh viau rih. NLUP-a tuihal thingtlangpa erawh chuan healthcare scam aiin cheng nuai khat thu chiangkuang lo hi an ngaihven zawk daih ang.

Sorkar thar lakluh atangin ni 137 a liam leh tawh a, hetih chhung hian NLUP hi tang ang chauh, a thawm bak hriat tur a la awm lo. NLUP Apex Board chu din a ni tawh a, chumi hnuaia mi tur Implementing Board pawh din a ni tawh. Apex Board vice chairman pawhin April ni 9,2009 khan a office thar a luah tawh bawk. Heng hi NLUP thawm kan hriat hnaivai chu a ni mai rih.

Mi tam tak lo beisei dan kha chuan sorkar tuk mai atangin NLUP hi an buaipui nghal char char ang a, thingtlang loneitute pawhin NLUP hmangin an kum khat hnathawh dan tur an thlang thei dawn a ni. Mahse, a buaipuitute tawngkam atang chuan loneih (agriculture leh horticulture) lamah phei chuan hmanhmawh hleih theih a ni dawn lo. Pawisa awm ta pawh ni se industry leh vety lam chuan an dawng nghal thei maiin a rinawm a, a pawimawh bera ngaih loneitute chuan kum tharah chauh an dawng ve dawn a ni.

Hman atangin sorkar kan hrawn tawhte hi an vuaicha viau thin ve reng reng. A tawng lam an chak a, a thawh lam an muang ruih zel a, an thil tum tihhlawhtlin tak loh an ngah viau zel a ni. Chutiang chu NLUP-ah hian kan hmu tan ta mai em tih hi zawhna lian tak a ni ta. Sorkar tuk atanga Zoram pum tuamchhuak tura hma an lak nghal an beisei laiin loneitute chuan kum thar an nghah a la ngai dawn a nih hmel.

NLUP sum lo kalna tur chungchang pawh hi a chiri ang reng viau bawk. Nikum inthlan dawn hnaiha cable TV-a tihchhuah Zo Talk-ah chuan MPCC president chuan,"A hmasaah pawh khan 5% lek kan lak pawh khan sing 3-in kan cover vek thei. Tunah hian 5% lek kan lak pawhin annual plan hi vaibelchhe 1000 chuang a ni a, khata tanga 5% mipui tana hman kha chu a uihawm tham lo a. Kan hmanna ber tur zawk a ni a. Kha khan nuai khat aia tam a cover thei, kan hotuten an chhut vek tawh a ni," a ti. Khang hun lai kha chuan budget pawisa hmanga (annual plan sum pawt hekin) NLUP hi kalpui an tum ni awm tak a ni.

Mahse, inthlan campaign-in a vawrtawp a thleng chho a, phai lam atangin vai mi lian prime minister te, Sonia te, Rahul-a te, Pranab Mukherji te an lo kal inchhawk ta zut a. Chutih hun lai chuan, prime minister-in congress an sorkar chuan NLUP hi state budget atang ni loin central budget atangin package rawn siam a tiam niin an sawi leh ta thung. Mahse, Manmohan Singh-a Aizawla a lo kal kha chuan Congress sorkar hunah NLUP hi chhunzawm a nih tur thu vel kha a sawi chu a ni mai a. Sorkar laipui leh Mizoram budget tharah hian NLUP lo kalna tur chu a chiang mai dawn a, lo inrinsiak vak vak a ngai hran awm lo e.

NLUP hi kum eng zat chhunga mi tur nge tihah hian hriat dan leh sawi dan a inang lo thluah mai bawk. R. Selthuama, MLA, vice chairman, NLUP Apex Board chuan tun hnai mai khan hemi chungchanga Zozam Weekly zawhna chhangin,"A sawi lawk theih loh. A project hrim hrim hi chu kum 3 chhung atan kan ti a, sawi lawk thei erawh a ni lo ang," a ti.

Nikum lama cable TV-a tihchhuah Zo Talk-ah khan NLUP (Cheng nuai 1) hi kum eng zat chhunga sem zawh tur nge? tih zawhna chhangin tuna chief minister ni ta hian, "Term khat chhungin kan sem zo vek ang, a aia hma pawhin kan sem zo hman ang," tiin a chhang a nih kha.

Mahse, budget session lai, March ni 20, 2009-ah khan zawhna chhangin chief minister chuan, NLUP duangtuten kum 5 chhungin Mizorama chhungkaw dawmkan ngai zawng zawng tuam kim vek an ni ang tih an sawi lo a, tuam kim vek nan kum 10 emaw, 15-ah emaw a ngai thei hial ang, a ti leh si a ni.

Session-ah bawk hian rural development department changtu minister R Lalzirliana chuan, NLUP chu kum 5 mai ni loin kum 10 project te pawh a nih tur thu a sawi bawk.

RD changtu minister bawk chuan, NLUP dawng thei tur chin an awm loh thu sawi lang telin, "Mizo zawng zawng daih tur a ni tih hi kan sawi thin dan a ni," a ti bawk. A huamzau hmel hle a ni.

NLUP hi a taka hmuh tur a la awm lo a, engtiang chiahin nge an kalpui dawn tih pawh hriat la ni lo mah se mipuiin beiseina sang tak nen an thlir mek. Congress party hian kumpui linglet an lo aupui tawh a, thingtlang khaw kil ber thlengin hre lo a ram pawh an awm tawh lo ang. Chu mai a ni lo a, MLA inthlanah pawh a hlawhtlin ngei beiseiin mipuiin congress party candidate-te an vote nasa hle tih a chiang bawk. Chuvangin, a hlawhchham thiang lo a, ram hruaitute hian tih tak tak arpa tuihal a an beih a ngai dawn a ni.

Related Posts :



No comments:

Post a Comment