Friday, April 3, 2009

Sem Sem Dam Dam, N...L...U...P

Dr. Vanlalchhawna, Reader, Department of Economics, MZU chuan NLUP chungchanga a ngaihdan sawiin, "Sum tam tak senna tur thil a ni a, a zuzi palh ang tih a hlauhawm hlein ka hria. Ka ngaih pawimawh chu, mi tam takin an hriat dan anga a thlawna sum tam tak dawnna tur anga ngaihna hi awm lo se. A hlawhtlin tak tak theihna turin ruahmanna tha awm bawk se," tiin.

Inthlan campaign lai vel khan Congress party hruaitu thenkhat chuan NLUP hi a hlawhtlin ngei theihna atan Mizoram University-a mithiamte thawhpuia sawm an tum thu leh, anniho hi monitoring buaipuitu atan ruat an nih tur thu an sawi thin. Sorkarna an siam hnuah erawh chu thawm chu a reh rih. NLUP Apex Board leh Implementing Board te an han din tak hnu hi chuan mithiamte telna monitoring cell din hi an tum leh ta chiah lo pawh a ni mai thei.

Hemi chungchangah hian Dr Chhawna chuan: "Official ni lovin vawi khat chu university tan thil tih theih tak tak a ni em ti chu min sawipui tawh a. Mahse, official a ni lo, mi tlem te kan ni a. A bak chu an rawn sawi leh awm ka hre lo. University lam tan pawh monitoring te chu tih theih loh a ni lo ang," a ti.

NLUP hlawhtlin theihna tura rawtna a neihte sawiin, "Ka duh dan chuan state policy a nih rual rualin a dawngtute nena mawhphurhna incholet theihna awm se. Entirnan, central scheme thenkhat, CSS ang te pawh hi state sorkarin a tum ve a ngai a. Hetiang hian a dawngtute hian mawhphurh letna nei ve zel se. Chumi atan chuan panchayat system ang chi te hi awm se, sorkar leh a dawngtute mawh inphurh tawn theihna awm se a that ka ring. A hmaa mi anga an kalpui chuan a hlawhtlin teh vak ka ring lo," a ti bawk.

Hetih lai hian 'chhung tin tan cheng nuai 1' tih chungchang chuan sawi a la hlawh hle zel a, sawi dan hrang hrang a piang mek.

NLUP Apex Board vice chairman R Selthuama pawhin: "Kan manifesto leh 'NLUP Changtlung Zawk' tihah khan, han en chiang chiah ula, cheng nuai khat kan pe ang tih a awm lo reng reng ang," a ti ve leh ta bawk.

Biahthu min hlan lai khan...
March ni 20, 2009 a ni a, Mizoram Assembly Session-ah member te'n NLUP chungchang an khel bar bar mai.

NLUP chungchanga member te zawhbelhna chhang turin house leader, Mizoram chief minister Lal Thanhawla a rawn dingchhuak a, NLUP chu kum 10 atanga kum 15 vel hnu daiha tihhlawhtlin tur tiin a sawi a nih kha.

"NLUP hi kum 5 chhungin kan zo vek ang tih hi policy siamtute hian kan sawi lo, a zawh theih loh tih kan hria. Policy siamtute hian cheng nuai khat theuhin kan sem ang kan ti ngai lo..." chief minister chuan a ti.

"Kan uluk dawn avangin NLUP kalpui chhung hian kum 10 atanga 15 a duh ang," chief minister chuan a ti bawk.

Kum 5 chhung atan sorkar laipui hnenah cheng vaibelchhe 2,500 an dil phawt tih a sawi bawk. Sorkar thar budget hmasa berah chuan NLUP atan hian cheng vaibelchhe 100 dah a ni thung.

November ni 6, 2007-ah khan, eptu party an nih laiin Mamit Chhim Veng YMA Hall-ah Mamit District Congress Conference neih a ni a, chutah chuan MPCC president, tuna Mizoram chief minister ni ta Lal Thanhawla chuan thu sawiin, "Kum 2008 MLA election-ah sorkar kan siam chuan NLUP bul kan tan leh ang a, chhungtin hnenah tanpuina cheng nuai khat kan pe ang," a ti a nih kha.

"Congress-in 'kan ti ang' kan tih chu kan ti thin; remna leh muanna a lo thlen theih nan 'kan lalthutthleng kan kian ang' kan ti a, kan intiam kan tihlawhtling a, chumi hnuah 'NLUP leh rangva kan sem ang' kan ti a, miin min rinpui lo. Mahse, miretheite tanpui nan kan thutiam kan tihlawhtling," tia sawiin, "Kan rama mirethei leh hausa kar zau lutuk tireh tur leh kuthnathawktute chhanchhuah nan chhung tin hnenah tanpuina cheng nuai 1 kan pe ang a, khawpuia miretheite pawh kan hmaih lo ang. An eizawnna bultanna tur kan siamsak ang," a ti bawk.

He'ng thu hi an party ngei hian thuchhuah siamin an puangzar a ni.

December ni 6, 2007-ah khan MPCC president hian Lungleia Congress Office-ah Congress zawm thar a lawmluhnaah thu sawiin, "Congress party chuan miretheite chhanchhuak turin a ngaihna kan hria a ni," tiin NLUP chungchang hi a lo tlangaupui tawh bawk.

"Mizoramah miretheite leh mihausate inkar a zau ta lutuk a, mautam tampui mitthi kan hmachhawn mekah hian thingtlangah tam a tla a, kuthnathawktute'n nitin harsatna kan tawk chho ta mek zel a. Mizoram sorkar hi tampui kan hmachhawn mek hi hmachhawn turin nasa zawkin inbuatsaih tha se ka duh takzet a ni," a ti a, "Kuthnathawktute chhanchhuahna tura kan programme - NLUP hi mi thenkhatte'n sawi bawrhbangin, a theih loh ti tein an tawng mek a. Miretheite chhanchhuak tur hian a ngaihna hriat a ngai a, keini chuan a ngaihna kan hria a, kan policy leh programme te hi central-in min tih hlawhtlinpui zel dawn a ni," tiin chumi tum chuan a sawi.

"NLUP hi kum 5 chhungin kan zo vek ang tih hi policy siamtute hian kan sawi lo, a zawh theih loh tih kan hria. Policy siamtute hian cheng nuai khat theuhin kan sem ang kan ti ngai lo..." tiin sawi mah se eptu party an nih laia an thusawi thenkhat nen chuan he thu hi a inkalh tlat!

August ni 30, 2007-ah khan Diakkawn Community Hall-ah Special District Conference-cum-Political Training, Kolasib Block Congress Committee huaihawta neih a ni a, chumi tuma MPCC president Lal Thanhawla thusawi chu Mizoram Pradesh Youth Congress Committee (MPYCC) chuan thuchhuah siamin tiang hian an tarlang:

"Pathian leh mipuite khawngaihna zara kan kuta sorkarna a awm tuk atangin NLUP changtlung zawk hi tan nghal a ni ang a, mirethei leh pachhia te'n lei rem kan lo rah leh theihna turin chhungkaw tinah an trade thlan ang zelin cheng nuai khat chuang kan pe tawh dawn a ni," tiin.

"Hetianga huaisen tak leh rin ngama Pu Hawla'n Congress party-in sorkarna a chan veleha a tih tur a tarlang hi Congress Thalai chuan kan chhuang em em a ni," tiin MPYCC chuan thuchhuahah hian an thailang nghe nghe.

December ni 14, 2007-ah khan MPCC senior vice president, tuna rural development minister ni ta hian a bial Tawizo khuaa Congress zawm tharte a lawmluhnaah thu sawiin, "Hetianga Congress party boruak a san zel lai hian party thenkhatin, 'a thlawna pawisa sem a tha lo, NLUP an sem tak tak thei lovang' tiin cencus record nen an khaikhin a, a chhiarkawpin an chawk a, a theih loh dan tur sawiin campaign an bei mek a. NLUP changtlung zawk kan tiam avangin chief minister leh midangte an mangang em em a, a sawichhiat dan tur an zawng ngar ngar a," a ti a, "Hei hi an hriat loh vang a ni," a ti nghe nghe.

NLUP hotupa tawngkam
R. Selthuama, NLUP Apex Board vice chairman, Implementing Board chairman ni bawk chuan Revised NLUP chungchang tiang hian Zozam Weekly a hrilh:

Apex board leh Implementing board-te hi tunhnaiah in thukhawm em?
Tun hnaiah chuan kan la thu rih lo a, thutna hman pawh a awm lo. A order siamthat kha niminah an tichhuak chauh a. Chutah chuan high powered committee an siamtha a, a function tur tlem an tidanglam bawk.

Nodal department tur hi a chiang tawh em?
Planning department kha han tih deuh chu a ni a, mahse nodal department-ah chuan Agriculture hman an ni dawn ta zawk.

Board member atana sorkar pawnlam mi, prominent citizen ruat tur tih kha a ni a, in ruat fel tawh em?
La ruat fel lo.

Budget-a Revised NLUP atan cheng vaibelchhe 100 dah chhin a ni a, a la hman theih chuang si loh a. Pawisa la hman theih loh tur budget-ah in dah tihna a ni maw?
Pawisa kha annual plan-a mi tur a ni dawn a, tentative-in Rs 100 Crore an dah a. Lo hman theih pawh ni se chuti mai chuan a la theih loh ang, buaipui tur a la awm alawm.

Pawisa awm huna sem theih turin in inruahman fel tawh em?
La inruahman lo. Mahse, kha kha chu thil har lutuk loah kan ngai. Tin, a tak takah chuan agriculture leh horticulture ang chi te phei chu hmanhmawh hleih theih a ni lo, lo an vat vek tawh si a, kum tharah lo chuan (pawisa hi) dah chi niin kan hre lo a. Thlai chi sem dawnin a tlai vek tawh.
Kum tharah January thla velah chuan kan dah hman ang, tun financial year chhung a la ni tho dawn a. Mahse, industry leh vety lamah te hi chuan beneficiary thlan fel chuan a pawisa hi a sem theih nghal tho ang.

Cheng vaibelchhe 100 hi in hmu dawn chiang tihna em ni? UPA hi sorkar ta lo se NLUP hrim hrim pawh hi a zuzi mai lo'ng maw?
Kan annual plan hi final a la ni lo mah se working group-in an recommend chu an remti ngei turah kan ngai a. Ka hriat chinah working group recommend hi an tihdanglam ngai ka hre lo a. An recommend tak phei chu Cheng vaibelchhe 120 a ni nghe nghe a. NLUP hi annual plan a lut tur a nih avangin sokar laipuiah UPA ni lo sorkar pawhin a buaithlak ka ring lo.

Tunhnaiah 'Cheng nuai khat kan sem ang tih kan sawi lo' tih te kha sawi awm leh a, campaign lai kha chuan in sawi ngei si a.
Kan manifesto leh 'NLUP Changtlung Zawk' tihah khan, han en chiang chiah ula, Cheng nuai khat kan pe ang tih a awm lo reng reng ang. Hmanah pawh (NLUP hmasaah) khan cheng sing 3 sem tur kan ti a, mahse an trade thlan dan azirin Rs 29500 te kan sem a, thenkhat chu Rs 50 a sing hnih tling lo te pawh a ni. A scheme a zirin nuai khat tling leh tling lo a awm ang.

Chhungtin hnena sem tur anga in lo sawi tawh kha?
A dawng thei (NLUP pawisa) chhungkaw tin hnenah tihna a ni, eizawnna nghet nei lo chhungkua hnena sem tur a ni.

NLUP hi kum 5 chhung atan a mi?
A sawi lawk theih loh. A project hrim hrim hi chu kum 3 chhung atan kan ti a, sawi lawk thei erawh a ni lo ang.

NLUP hi development programme nge poverty alleviation programme? Pu Hawla khan retheite chhanchhuahna liau liau niin a sawi a, development programme chu tam tak neiin a insawi kha a ni a..
Sawi thiam a har khawp mai, a awmziaah chuan poverty alleviation programme chu a ni zawk mah a. Mahse, mirethei, eizawnna nei loten eizawnna an neih chuan development chu a ni tho bawk. NLUP-in a tum ber chu retheite khaichhuah hi chu a ni. Kan tum ber pawh tlangram loneih bansana a aia eizawnna ngelnghet siamsak hi a ni. Development programme kan neih te chu, kawngpui siam te, tuikhuah te leh a dangte hi a ni.

Related Posts :



No comments:

Post a Comment