Ruihhlo zuar thin kha Pastor a ni tawh

Ruihhlo zuar thin, kum 12 zet lung in tang tawh chu Welsh ram khaw pakhatah Pastor a ni dawn. Caerphilly kianga Oakdale khaw Baptist Kohhran chuan Pastor Brian Morris chu an kohhran pastor atan lungrual takin an thlang ta. An pastor thar tur hi tun hma lamah kha chuan heroin ngawlvei a ni a, ni khatah Pound 100 man a ti thin a, ruihhlo a a sumdawn avangin lung inah a tang hrep tawh bawk.

Pu Morris-a hi kum 57 a upa a ni a, Cardiff University atangin theology ah a a graduate hlim hlawl a, he kohhranah hian rawngbawltu hna a lo thawk tawh thin nghe nghe a. Thla thar atang hian a hna hi a zawm dawn a ni.
Tun hmain police-ten a thlenna hotel an dap thut a, ruihhlo chi khat cocaine Kg khat a lo kawl avangin Swansea Crown Court-in thiam loh a chantir a, kum 12 chhung a tan phah ta a ni. Chutih lai thil thleng chu sawiin, "Police-in min koh hun nghakin police cell-ah ka lo nghak ran mai a. Chutihlai chuan zawi te a tawng ri hi ka hria a, 'hei hi i nun i thlakthleng theihna tur leh mi tha tak i nih theihna tura hun tha a nih hi aw' tiin a rawn sawi a. Ka mitthlu lai Pathianin min rawn kaitho thut ni maiin ka hria, 'ka thusawi chu i ngai pawimawh dawn em?' a ti zuiin ka hria," a ti a.
Dartmoor lung inah khung a ni a, chu hmunah chuan a dam chhunga a vawi khatna atan lehkha a zir ve ta a, lung in tangte tan tawngtai pawl te a din bawk a. Chutianga nun inthlak hlak a kum nga chhung a tan hnu chuan chhuah lailawk (parole) a ni a, Baptist kohhranah a tel zui a, pastor ni turin a inzir chho ta a ni.
"Harsatna leh buaina chi hrang hrang ka pal tlang nasa ve hle thin a, bansan leh mai pawh a chakawm thin. Mahse, ka nihna leh ka nun hlui hre reng chunga pastor atana min thlang hian mipuiten ka lakah rinna an nghat a ni tih leh min ngaidam a ni tih a tilangin ka hria," a ti.
Nupui neiin fa panga a nei tawh a, ama hun tawn chanchin lehkhabu a ziak tawh bawk. Lung in a tan laia a identity card a la kawl tha reng a, a hun kal tawh hriat rengna atan a hmanng thin. "Ka thil lo tih tawh te kha thupbo ka tum ngai reng reng lo," a ti bawk.

Related Posts :