Kawng siamna tura sum hman zat sawi dan a inang lo

Mizoram-a national highway siamna atana Public Works Department-in an sum hman nia an sawi chu inmil lo a awm nual niin Mizoram Road Transport Union chuan an sawi.

Hna thawh dan leh sum dinhmun thlirin hmun hrang hranga kawng siam mek leh siamthat ngai te chu tun maia siamthat a beisei awm loh niin an sawi bawk.
Mizoram Road Transport Union (MRTU) chuan Right to Information Act hmanga zawhna an zawh leh, PWD official te hnen atanga thu an lak thenkhat inmil lo te, kawng siam meka contractor te hnathawh dan a hmuna an enfiah chungchang te thuthar thehdarhtute hnenah hemi chungchang hi September ni 21-ah an sawi a ni.
RTI hmanga zawhnaah, finance department (budget) in Central Road Fund (CRF) atanga PWD hman tur budget a dah chu Rs. 929.46 lakhs tih a nih laiin, finance department control (EC) lamin kum 2010-2011 chhunga PWD hnena CRF a\anga pawisa a sanction zat chu Rs. 558.08 lakhs a ni, an ti.
NH-150 (NH Division II Seling to Zero Point to Darlawn Road) atana sum hman tarlanah pawh inang lo a awm niin MRTU chuan an sawi bawk.
2010-2011 chhunga Ministry of Transport & Highway atanga PWD-in kawng enkawlna tura sum a hmuh Rs. 5493 lakhs a\angin Rs. 601.50 lakhs hman nia chanchinbu pakhata tarlan a nih laiin, RTI hmanga zawhnaah chuan Rs. 829.93 lakhs hman anga chhan a nih thu an sawi.
Rs. 498.79 lakhs hmanralna nia department lam sawi NH-150 Darlawn Sub-Division chhungah alkatra luan (periodical renew) tih ala ni lo a, pawisa erawh contractor, Sunshine Overseas Ltd. hnenah advance-a pek a ni tih MRTU chuan sawiin, tun \hal chhung hian siam hman an tum tih a hmuna an tlawhnaah hrilh an nih thu an sawi. "Ordinary repair leh flood damage hi departmental work-a thawh nia NH Division II EE-in a sawi laiin, Darlawn Sub-Division PWD SDO chuan nikum June atang khan an division huamchhungah hnathawh engmah an nei lo niin min hrilh," MRTU secretary Lianlunga chuan a ti.
NH-150 Sub-Division-IV huamchhungah chuan Sunshine Overseas ten nikum chhung khan alkatra luana kawng siam hna thawkin, ordinary repair leh flood damage chu PWD ten departmental work-in an thawk a, a vaiin Rs. 331.41 lakhs hmanral a ni, MRTU chuan an ti.
NH-54 Lunglei, Lawngtlai leh Zero Point kawng siamtu Bengal Prakalpa Nirman Pvt. Ltd, Kolkata chuan hna an ngaihthah hle, tiin MRTU chuan, Mizo mipuite hmuhsitnaah an ngaih thu an sawi. "Oct. 22, 2009 khan work order an hmu tawh a. Alkatra an luan chhun Lunglei AOC atanga Khamhar quarry thleng pawh khawk chhia a tam leh tawh a. Tun \hal chhunga kawng siam tura an inpuahchahna hmuh tur a awm lo bawk," MRTU secretary chuan a ti.
Hetihlai hian NH-54 Lunglei, Hnahthial leh Serchhip inkar kawng siamtu Sunshine Overseas chu an thawk tha thawkhata an hriat thu MRTU hruaitu hian a sawi a. Tuirial - Serchhip inkar erawh contractor thlan fel ala nih loh avangin kumin chhungin hna an thawk hman dawn lo nia a lan thu a sawi.
World Bank kawng, Aizawl-Lunglei via Thenzawl chu lirthei tana kal harsa khawpa chhia a tam leh tawh hle a ni, tiin MRTU chuan, PWD ten chak takin a thuamthat hna thawk se an duh tih an sawi. Hei bakah hian, Lunglei leh Tlabung inkar te, Tlabung leh Chawngte inkar kawng chhia te chu, sum dinhmun ngaihtuahin tun maia siamthat a beisei awm loh niin an sawi.
Kawng chhiat avanga MST bus service tihtawp lailawkna, West Phaileng - Marpara kawng chu NABARD sum atanga siam turin contractor thlan fel a nih tawh thu leh, sum sanction hi finance deptt. atanga nghah mek nia an hriat thu MRTU chuan an sawi bawk.
MRTU president R. Lalhmunmawia chuan, kawng tha kan neih loh avangin mipui ten harsatna an tawh tam phah hle tih sawiin, sawrkar thuneitute chu plan leh estimate an siam thiam ang chiahin kawng siam tha thiam tur leh, Mizoram tana theihtawp chhuah tura an phut thu a sawi a ni.

Related Posts :