Wednesday, August 3, 2011

Jeje-a zet zawng

UAE nena Delhi-a an inkhelh \um khan a mitah hliam a tuar a, tunhnai khan doctor-in enfiahsakin Delhi-ah a inenkawl mek. He Hnahthial tlangval Jeje Lapekhlua hian football-ah hming a chher mek a, a chanchin hian India rama football fans te ngaihven a hlawh hle.
Football academy a\anga inzirchhuak a ni lo a, talent leh theihna a neih erawh tumahin an hmuh hmaih thei lo. India mipui nuai tel hian a hming an lo hre ta.
Tunlai Indian football-a footballer pek 'hlu' ber ni mek hian Hnahthial a\angin bul a \an a, Mizoram kal pelin, India ram leh India ram pawn thlengin Indian football-in a mamawhna hmun apiangah AIFF leh club 'kohna' chu a chhang \hin a ni.
Tunhnaia khelh zawh tak 2014 World Cup qualifying round UAE nen an khelh \um pawhin home leh away-ah India tan player pawimawh a ni.
Mizo footballer zingah World Cup rim nama goal thun hmasa ber a ni. Age level-ah chuan Mizo footballer India aiawha khel thei an awm nual tawh. Senior team-a India aiawh phak erawh an awm lohna a rei ta.
World Cup qualifer-ah khan India chuan September ni 8, 2004 khan Salt Lake stadium-ah mipui 90,000 zet hmaah Japan a mikhual a. Hemi \um hian Jerry Zirsanga, khatih laia Mohun Bagan player chu India senior team-ah hian a tel ve a. Khatih lai khan player naupang pawl a nih avangin Jerry hian a khelh phak lo deuh bakah senior level-ah tawnhriat an la nei lo a, first XI-ah hmun a chang lo. Hemi \um hian Japan chuan India chu 7-0 ngawtin an sawp a nih kha.
Mizo tlangvalte zinga India aiawha
khel hmasa ber chu K Kawla a ni a, 1977 khan India aiawhin Kabul Football tournament-ah a khel. Hemi hnu hian K Kawla hian India aiawh bawkin 1978-ah khan Aga Khan Cup, Bangladesh-a khelhah India aiawhin a khel leh. 1986-ah Zomuanthanga chuan Asian School Games 86, Brunei-a khelah ah India aiawha khelin jersey no 10 ha pha ngat tiin Mizo mipuiin an chhuang hle a nih kha. Tunah India senior team-ah Jeje Lapekhlua chuan jersey no 10 a ha ve leh ta.
India U-19 team captain ni \hin Jeje Lalpekhlua hi F Liankima leh Hnunpuii te fapa a ni a, Hnahthial Model Veng-a cheng an ni. Unau pathum niin tunah hian I-League club Pune FC-ah a khel.
2007 a\ang khan India team-ah age level hrang hrangah a tel \an a, tunah hian senior team-ah a inpet kai ta. India footballer zingah Bhaichung Bhutia a ngaisang ber a, India ram pawnah chuan Cristiano.Ronaldo a ngaisang ber.
India striker zingah chuan hmabak nei eng ber pawl a ni phak. Pune FC a zawm hma hian Mizoram aiawhin Mizoram XI hmingin Sikkim-ah te , Mizoram U -19 team hmingin Noagong (Assam), Mizoram XI hmingin (Kailasahar), North East Sport Festival(Sikkim), Mizoram U-21(Guwahati), Santosh Trophy 2008 (J&K), Santosh Trophy 2009 (Tirchy) ah te a lo khel tawh. State pawna a kal hmain FC Kulikawn leh Dinthar FC-ah te a lo khel tawh bawk.
India aiawhin (AFC U-19 2007& 2009) ah te a khel tawh. India tan vawi ruk khel tawhin goal 3 a thun tawh. Khawvel hmun hrang hrangah India aiawhin a fehchhuak fo tawh. Jeje hi SAFF Cup, nikum December thlaa India-in U-23 team a tirhah khan telin a champion pui. 2010 Asian Games-ah te India aiawhin a kal bawk. Olympic qualifying round khelh mekah India team-ah a tel bawk.
Jeje Lalpekhlua chuan tiang hian Zozam Weekly a hrilh a:
India senior team atan an thlang che tih i hriat khan eng nge i rilruah lo lang hmasa ber?
Jeje: A hmasa berah chuan Pathian vanga he dinhmuna ding thei hi ka ni a. Pathian hnenah lawmthu ka sawi nghal a. Ka thawhrim vena te Pathianin mal a sawm a, tun dinhmun hi ka thleng ta ni-ah ka ngai.
India ram tan age level-ah vawi tam tak i khel tawh a, senior level danglam dan?
Jeje: Age level-ah te vawi tam lo khel ve tawh mah ila, senior team-ah ka tel dawn tih ka hriat tirah ka lawm dan kha ka sawifiah thiam lo. Proffesonal football ka khelh tirh a\ang leh India camp-a ka awm tirh a\anga senior team-ah hian tel ve theih hlan ka nghakhlel \hin a, ka ngaihtuahna leh suangtuahnaah pawha awm ve \hin a ni a. Tunah a taka a lo thleng ta mai hi ka lawm khawp mai. Lawm tak ka ni, ka sawi thiam lo.
Mizo footballer-te hmabak i hmuh dan ?
Jeje: Kan hmabak chu a eng khawp mai. Tunah Indian football-ah Mizote min hmelhriat chho zel a, mahse tih tak takna leh tumruhna, insumtheihna hi kan neih a pawimawh hlein ka hria. Hengte hi kan neih loh chuan eng anga player \ha pawh ni se chance a awm lo ang.
Mizote tan football hi khelh zel tlakah i ngai em ?
Jeje: Ngai tehreng mai. Kei aia player \ha hi Mizo zingah an la tam a, kei tak ngial pawh hetiang dinhmun hi ka thleng thei a. Ka thlen aia thleng thui thei hi Mizo footballer zingah an awm \euh ka ring. Mahse ka sawi tawh ang khan tumruhna leh tih tak zetna nen lo chuan thlen thui a har tawh a. Inkhel zel se, \hahnemngaih takin thuawihna India ram football hi nakin lawkah chuan kan thuhnuaiah a awm theih ka ring tlat a ni.
India senior team-a tel leh age level a tel engnge danglam deuh ber nia i hriat?
Jeje: Age level-ah pressure awm ve tho bawk mah se a nep deuh a, senior chu pressure a awm nasa a. Mawhphurhna a sang hle a. Age level ka dah hniam tihna a ni lovin ni dang zawng zawng aiin \an a ngai nasa zualin ka hria.
India player-te hi fit lo deuh bik nia sawi \hin an ni a, international-ah hian hei hi a dik em?
Jeje: Ka tel ve hma chu ka hre lo a. International match kan khelh ve phak chinah chuan an fitness a hniam bikna ka hre lo.
Mizo hlang khelhna club hian I-League khel se eng ang beiseina nge i neih?
Jeje: A \an tirhah chuan a chet \hat a har deuh mai thei, hun a duh deuh ka ring a. Mahse an awm theih phawt chuan a che chhe pawlah chuan an \an ka ring miah lo. Mizoram hian player a nei \ha tawh em a.
Pune FC-ah hian engvanga let leh nge i nih?
Jeje: India Arrows kha AIFF hruaitu lamte ngenna avangin Pune FC a\ang khan zawm min phalsak a, Pune FC-ah khan contract ka ziak tawh laklawh bawk si a. Indian Arrows-ah khan loan player angin ka chhuak a, season a lo thar hian AIFF lam chuan Indian Arrows-a khel chhunzawm leh turin min duh viau nachungin Pune FC-ah ka contract hman zawh a ngai si a, ka let leh dawn a. Mahse tunah hian AIFF lam chuan Pune FC leh Arrows-a player dangte pawh an khelh chhunzawm leh theihna turin hma an la leh ta tho a. Khawiah pawh khel ila a pawi ka ti hran chuang lo.
Mizo footballer-te hian eng nge an tlakchham ber nia i hriat?
Jeje: Skill chu a \ha reng mai a. Kan tlakchham ber nia ka hriat, kei pawhin ka mamawh ve tho chu tih tak takna leh tih tak zetna niin ka hria.
Foreign coach leh Indian coach danglamna nia i hriat pawimawh deuh deuh eng nge?
Jeje: Foreign coach leh Indian coach-te hi senior level-ah chuan an danglamna em em ka hre lo. A bik takin tuna national coach Armando Colaco leh Pune FC coach Derrick Pareirra te hi chu an \ha ka ti khawp mai. Chutih rual chuan age level angah chuan Indian coach-te hi chuan foreign coach te chu an tluk lo deuhin ka hria. Foreign coach-te hi chuan tih tur leh tih loh tur te fel takin an duang sa thlap a, an tum an chiang deuh zawkin ka hria. Indian coach pawh chutiangin an chhia ka ti chuang lo.
Indian Arrows-a i khelhpui leh ram aiawha vawi tam tak i lo khelh pui tawh \hin Didika \hatna lai ber nia i hriat?
Jeje: Didika hi chu ball a thiam em a, ball pet a thiam a, a ball pek hi lak a nuam khawp mai. A duhna hmunah hian a dah thei. A \ha ka ti khawp mai.
Mizo players \hat bikna sawi tur nge nge i neih?
Jeje: Mizo footballer chu a tlangpuiin an huaisen a, team tan an inpe em em a, hei hi hnam dang, a bikin India player dangte tlakchham niin ka hre ve \hin. Kan skill hi a tlangpuiin a \ha thawkhatin ka hre bawk.

Related Posts :



1 comment: