Hruaitu tha

Saphovin min chhuahsan dawn lai khan hruaitu thain min ho lo a, mahni tal talin kan tal niin a lang. A thenin Crown Colony-a awm an duh a, a thenin independent-a awm. India hnuaia awm duh an awm bawk. Khatia kawng pengthuama kan awm lai khan mipui rilru hmin duak thei hruaitu, zui tur kan nei lo niin a lang.

India hnuaiah kan awm ta a, kan lungrual ta lo reng a!

Hman ni lawk thlengin a mipui nawlpuiin India mi nih kan thei lo a, inkhelah pawh India kan tan ngai lo. Vawiinah India mi nih nuam ti an tam ta hle a, mahse, a duh lo pawh an la awm tho. Chutianga ngaihdan inkawkalha kan awm lai pawh chuan hruaitu tha leh rintlak, mipui rilru hmin duak thei leh kaihruai thei kan nei lo niin a lang.

Chu lam chu thuhran ni se, hetia kan khawsakhona leh kan inrelbawlnaah pawh hian hruaitu tha kan nei lohzia hi a chiang khawp mai. Hruaitu dinhmuna ding chu kan nei reng a, politics-ah a ni emaw, Kohhranah a ni emaw, tlawmngai pawlah emaw, hruaitu dinhmuna ding chu kan nei reng a, mahse, mipuite min hruaitu tak taktu, mipuiin lungmuang taka kan zui hi chu kan nei lo niin a lang.

Khawtlang nun leh kan inrelbawlna chungchanga kan inhnialna hrang hrangte hi thlir ila, hruaitu kan mamawhzia chu a lang. Zu chungchangah kan inhnial ila, kan tawngtaw inhnial chiam chiam a, pi leh pute hunlaia lal leh khawnbawlte leh valupa chan changa thu lai la tur an awm lo. NLUP chungchang sawi ila kan inhnial leh a, thu lai latu an awm lo. Thu lai lak chu sawi loh, kan hruaitute hi a inhnialna chawkchhuaktu zawkah an tang deuh zel zawk emaw a ni a, chi-ai taka kawng peng thuama kan awm laia min kaihhruai chu a hla thin khawp mai. Hei hian mipuite hian kan hruaitute kan zui lohzia a tarlang awm e.

Dik chiah chuan, politics-a kan hruaitute phei hi chu ram hruaitu ni lovin milian an ni ve tawp a ni ber a, mipui rilru an hmin e tia sawi tur pawh a awm ngai lo ti hial ila kan sawi sual awm lo e. Mipuite hian kan zui lo tihna a ni ngei ang.

Hruaitu tha kan neih loh hi kan harsatna, kan kawng tithuanawptu a ni a, hruaitu tha, an thu leh hla kan ngaihchan, kan rin em em nei ila tun ai hian kan kang ngei ang.

Baktawng Tlangnuam-a 'Lalpa Kohhran Thar, Lalram kawngpui zawhtute' hi chuti zawnga ngaihtuah chuan an vannei khawp mai. An hruaitu hi a that leh that loh chu thuhran ni se, mipui hian an zui chiang a ni. Chutiang taka zui ngam hruaitu an neih hi an ni tin khawsakah pawh a lang a, inlungrual leh inngeih dial diala an awm theih chhan te pawh chu chu a ni ngei ang. Rinna lama an thu lak dan kan pawm leh pawm loh te chu thuhran ni se, an inkaihhruaina leh an inrelbawl dan te hi chu a hmuhnawmin a ngaihnawm a, zui ngam hruaitu an nei hi an awhawm bawk ti hialin a sawi theih ang.

Chutiang hruaitu, mipuite'n an zui ngam chu Mizoram hian nei teh hlauh ila nuam kan ti ang chu aw!

Related Posts :