Monday, July 5, 2010

In Inhmangaih Meuh Maw?

I bialnu/ bialpa khan a hmangaih che tih i hriat duh chuan heng te hi tehna atan lo hmang ve chhin teh. I chhass nen khaw hmun khatah in awm lo a ni emaw, in awmna veng a inkar hlat deuh te a nih phei chuan he tehfung hi a dik thawkhat viau mai thei.

Hunawl a pe ngai che em?
A hna a vangin a tul viau pawh a ni thei. Thildang vangte pawhin a tul hle a ni thei e. Mahse, mihringte hian kan mamawhte tan chuan hunawl hi kan nei thei ziah! I bialnu/ bialpa khan a hmangaih tak tak lo che a nih chuan i tan hunawl a nei tam lo ang tih hria ang che. Mi thahnem takin an lo tawn hriat tawh atanga he thu hi rawn chhawpchhuah a nih avangin dik turah ngai ang che. Mahse, a hnuaia kan la sawi zel turteah hian sawisel bo a nih erawh chuan hunawl a pek theih loh chhan che kha a lo serious riau thei bawk (Hmangaih loh vang che ni lovin hunawl leh remchang hrim hrim a neih loh vangin).

A be zing che em?
Mihringte hi kan pianphung leh kan rilru ngaihtuahna a inang lo ang hian kan duhzawng leh ngaimawh zawngte a danglam thin a. Thenkhat chuan Hmangaihna hi an lo la nep viau thei a, thenkhatin an lo la na viau thei bawk. Mi thenkhat chuan an bialnu/ bialpa te be lova awm harsa an ti ang. Thenkhatte erawh chuan an harsat vak lo ang. Mahse, a tlangpui thuin mihringte chuan kan mi ngainatte chu kan be zing thin. I bialnu/ bialpa khan a be zing lo hle che a, a khat tawka a be zeuh zeuh thin che a nih chuan (inbiak reng theihna hmun leh huna in awm chuan) amah kha ringhlel ang che. Nangmah aia duhzawk a nei emaw, a zawng mek emaw a ni thei. Mizote hi ngaihzawng neih chungchangah hian kan rinawm lo khawp mai. A nei deuhvin an kawp tam a, a nei lo deuhvin kawp tur an hmu lova! Mi pakhat tana thinlung hlana insawi tawh chuan midang va kawp awm loh tak, mahse, tunah hian ngaihzawng nei kawp lo chu vang tak an ni. An kawp loh pawhin biak that zual pahnih khat tal mipa / hmeichhia hi chuan an nei deuh zel!

I beiseite a tih hlawhtlin sak ngai che em?
Mihringte hian kan mi ngainatte hnen atanga dawn beisei hi kan nei deuh tlangpui a. Chutiang va ngaihven lem lo te pawh awm theih a ni. Mahse, bialnu/ bialpa kan neih chuan an hnen atanga thil hlu lem lo, tawngkam mai pawha tih hlawhtlin theih te, sms hmanga tih hlawhtlin theih ang chi te a awm. Mahse, chutianga mi dangte beisei hre reng chunga tih hlawhtlin sak duh lo mihring pawh chu awm theih a ni. Engpawhnise, bialnu/ bialpa kan neih chuan an tana thil tha tih kha kan duh a nih chuan, an beiseinate chu sual lama tlukna a nih loh bawk chuan tih hlawhtlin sak kan tum thin tur a ni dawn lawm ni?

Mihringte hian dawn kan inbeisei em em dawng lova kan awm reng chuan chung kan beiseina thamral mai tur chu uiin, kan bialnu/ bialpa te kan ngen lawm lawm thin a. Mahse, min tih hlawhtlin sak duh tlat loh chuan keini aia tha zawk leh fel zawk nia hriat an nei tihna a ni. Midang hnenah an lo ti hlawhtling thin pawh a ni mahna! I bialnu/ bialpa khan a hmangaih che chuan i hlimna tur chuan sual lam kawng tel lo - tha lam kawnga i beiseina te chu tih hlawtlin sak che a huam zak ang!

Related Posts :



1 comment:

  1. Khi Post- ah khian a ziaktu hi ka hming a lang miah lova. Engvang nge ni aw? He Blog atanga hmun danga thil ka lakchhuah chuan a Source ka dah zel a ni si a. - http://www.hmingteasailo.blogspot.com

    ReplyDelete