World Cup leh Chhass

¢ Hmingsanga

World Cup 2006-ah khan England team player-te sawi ruala sawi tel ngei ngai chu an nupui leh chhass-te kha an ni awm e. Kuminah erawh chutiang em emin thawm an nei lo. Wags (Wives and Girlfriends tihna) te hian player-te an nih tur ang a nihtir lo tih ngaihdan a awm a, England player-te rilru an tibuai tih chu ngaihdan lian tak a ni.

2006-a England chet chhiat chhan pakhatah Wags te puh an ni fo. Kuminah chuan an tel ve phalsak an ni ta lo. 2006 kha chuan German resort nuam tak Baden-Baden-ah an inkulh a nih kha. Kuminah chuan Coach Fabio Capello-a'n an tel a phal ve lo a ni.

Heng wags te hi milar tak tak an ni tlangpui a, chu chuan ‘publicity’ nasa takin a siam nghal thin. An pasal leh bialpate bulah an awm emaw an ngaihzawng te bulah an awm emaw a nih pawhin chanchinthar an siam nghal zel. A chang leh party te'n an chhuak a, chu chuan media a kokhawm a, chutiang boruak-ah chuan player-te'n football an ngaihtuah tak tak thei lo nia ngai an awm.

Football player-te hi an khawngaihthalk ve na lai a awm. Footballer-te hian an club ngaiah an khel ngawt ngawt lo a, a chang chuan ram dangah an insawn a, an chenna an thlak zung zung thin. An nupui leh ngaihzawngte'n an zui zel a rem lohna chen a awm thin. Chu ngaihdan avang chuan 2006 pawh khan England chuan an player-te bula an nupui leh ngaihzawngte awm ve an phal a ni.

Mahse, danglamna awm ta chu mi lar an ni a, an kalna apiangah tu tu emawin an umzui a, chanchinbumiin an zui a, an chet dan apiang mai chu chanchinthar a nih tlat avangin mi pangngai nun an nei thei thin lo.

Footballer chhass te lah an lo ‘over’ ve bawk a, incheina maksak tak tak nen chet an lo ching ve leh zel bawk nen, media lam tan chuan bawh loh chi an ni bik lo.

2006 atang khan footballer chhass-te chungchang hi a ri hluai tiin a sawi theih ang. Kumin World Cup-ah pawh ram thenkhat chuan an nupui te awm ve an phalsak laiin ram thenkhat chuan an phalsak lo. Argentina te chuan an inkhelh hma ni 2 velah te chuan an nupui te an hmuh an phalsak a ni.

Chu chu sex nena inkaihhnawih thil a ni a, mithiamte inhnialna pawh a ni. Sports scientist thenkhat chuan inkhelh hma zana sex hman chu pawi lovah an ngai a, thenkhat chuan player-te tan a tha lo tih ngaihdan an nei.

Kumin hian Sports bungraw siamtu company lian Umbro chuan footballer-te chhass te hmangin an thilsiamte an tilar a, chuti khawp chuan marketing thlengin footballer-te chhass-te hi an pawimawh a ni.

Umbro chuan Abbey Clancey, Peter Crouch bialnu te, Julia Godicke, Marcell Jansen, Germany defender nupui te, Alice Bregoli, Alberto Gilardino, Italy striker chhas te, Zaira Nora, Uruguay striker Diego Forlan nupui te, Charlene Suric, France full back Gael Clichy nupui te, Luli Ferandez, Argentina striker Pablo Mouche chhas bakah Susana Werner, Brazil keeper Julio Cesar nupui te chu an thilsiam faknan an hmang a ni.

Football chhass-te hi model te, sumdawng te, zaithiam te an ni fur. Tam tak phei hi chu anmahni zawna mi hlawhtling tak tak an ni hlawm.

Footballer chhass an nih chiah khan an chhass te lar vangin an lar lehzual ta thin a, chu chu hmeichhe tam tak tan chuan thil chakawm a tling.

Footballer lar chu duhthlang thei an ni; Cristiano Ronaldo ler zia chu khawvelin a hria a, US-a rei lo te a cham chhung pawhin socialite Kim Kardashian nen an inchul nel hle nia sawi hman a ni tho!

England captain nihna a chan phahna chhan chu hmeichhia vang a ni, chu chu John Terry thil tawn a ni. Chu mai a ni lo, a thianpa a chan bawk a, a thianpa nen chuan an inbiak loh phah a, hmeichhia vangin thian a chan tiin a sawi theih ang.

Nupui nei reng chungin John Terry hian England-a a teamate Wayne Bridge-a fa neihna Veronica Perroncel a lo mutpui thin tih hriatchhuah a ni a, chuvang chuan Wayne Bridge chuan Terry nena team khata awm dun pawh duh lovin England tana World Cup khelh a duh loh phah hmak.

Chu mai a ni lo, Coach Fabio Capello ngaihdan a ni lo a, aptain ni tlaka a ngaih loh avangin a captain nihna pawh a chhuhsak hial a ni. Chuti khawp chuan hmeichhe pakhatin Football khawvel a chawk buai thei zu nia!

Related Posts :