World Cup leh Chhass

English Footballer-ho kawppuite chanchin chu kan hre deuh fur tawh mai thei. Tun tum chu anni tel lovin World Cup khel tur player thenkhatte kawppui i'n hrut teh ang.

Footballer-te hian danglamna deuh an nei a, hetia ral atanga kan lo hriat ve celebrity dangte ang lo deuhin an kawppuite chungah hian an rinawm deuh zawk niin a lang. Rinawm lo tawk chu awm ve zeuh zeuh mah se a tlangpuia lak chuan celebrity dangte ai chuan an rinawm zawk nia sawi an ni. 2006 World Cup khan England footballer te kawppui kha an lar hlawm hle a, khami hnu atang phei kha chuan footballer-ho nupui leh ngaihzawngte hian club inkhelh leh major tournament-ah ngaihven an hlawh thar hle. Tun hnai lawk pawh khan England-ah chuan heng ‘mite’ avang hian ngaihdan a phir nasa hle a ni.

Fernando Torres & Olalla

A bialnu hming chu Olalla a ni a, an tleirawl chhuah atanga lo in-date tan daih tawh thin an ni. September 2006 khan inneih an tum zet na a, an inthen leh hnuhnawh. Mahse tunah chuan an inzui ngun leh tawh viau niin an sawi.

Fernando Torres hi Atlético Madrid captain naupang ber lo ni tawh a ni. English Club Liverpool-ah a khel mek. Naupang tê ni chungin UEFA Euro 2004, 2006 FIFA World Cup leh UEFA Euro 2008 ah Spain hmingin a khel tawh a. A hming lemah El Niño (The Kid) an vuah.

Robin van Persie & Bouchra

Dutch club tenau Excelsior atanga bultan a ni a, 2002 khan Feyenoord chuan contract an ziahpui. Chumi hnuah £ mtd 3-in English club Arsenal a zawm a. Tunah Robin van Persie hian nupui Bouchra a nei. Fapa pakhat nei tawhin a hmingah Shaqueel an sa a. Tunah Enfield, North London ah an cheng mek.

Franck Ribery & Wahiba Belhami

German club Bayern Munich a zawm hnua rawn lâr thar em em Frank Ribery hian a nupui Wahiba hi a’n duh mai mai khawp a. Wahiba hi Algerian chhûl chhuak niin Muslim sakhaw vuantu an ni. Wahiba hian 'Ribery chuan min neih a duh chuan Muslim-ah inlet rawh se' a tih vangin Ribery hian neih loh a hlau ngang ni tur a ni, Muslim-ah a inleh phah thak nia maw le!

Rafael van der Vaart & Sylvie Meis

German club, Hamburg-a khel, Dutch International, ram tan vawi 40 chuang khel tawh leh tun tuma Dutch player pawimawh berte zinga sawi ngam Rafael van der Vaart hi kum 25 mi a ni. Kum thum kal ta khan actress leh presenter ni bawk Sylvie nen ‘tiam tlat e’ an ti tawh.

An inneih inkhawm hi Dutch TV channel pakhat chuan live-in a pechhuak. Mi thenkhat chuan an inneih inkhawm live-a an pe chhuak hi an sawisel a, TV lama tichhuaktute chuan 'an inkhel pawh live-in kan pe chhuak a, engvangin nge an inneih inkhawm pawh kan live loh bik ang?' an ti duh chauh.

Rafael van der Vaart hian Dutch club ropui Ajax atanga German club Hamburg a zawm hlim pawh khan a nupui hi chanchinbumiten an bawr nasa thei hle a ni.

Fabio Cannavaro & Daniella Cannavaro

Inhliam vanga Euro khel thei lo Cannavaro te hi tarlang ve tho teh ang. Fabio Cannavaro nupui Daniella Cannavaro hi model a ni ve lem lo a, filmstar pawh a ni bawk lo. Tunlai tawng takin a simple top an tih ang chi hi a ni a, Hmeichhe nu tak, pasal leh fate tana inpe zo tak an tih ang chi hi a ni a.

Fabio Cannavaro nen tleirawl chhuah phat atanga inngaizawng an ni a, tunah hian fanu leh fapa pakhat neiin chhungkaw hlim tak leh nuam tak dinin an hun an hmang mek.

Iker Casillas & Eva Gonzalez

Spanish nula hmeltha tam tak zingah Real Madrid keeper Casilas-a'n ‘nang ber hi’ tia a thlan nalh hi chu a chhe lo ang tih a chiang. Spanish zingah mai ni lo, khawvel nula ten an star em em Iker Casillas hi Spain tan ngaihthatpui tham khawpa goal ven thiam a ni.

Spain leh Real Madrid tana rinawm taka goal a veng thin angin Eva Gonzalez tan pawh a rinawm hle. Eva Gonzalez hi kum 2003 khan Miss Spain a ni a. Spain aiawhin Miss Universe thlanna-ah a tel a. Tunah hian Spanish model hlawh tam ber pawl nia sawi a ni.

David Villa & Patricia

Spanish-in hming lemah El Guaje (The Kid) tia an vuahsak David-a hi Euro 2008-ah hattrick siam hmasa ber a nih bâkah goal thun tam ber a ni bawk. Nupui Patricia nei tawhin fanu pakhat Zaida an nei tawh.

Xabier Alonso & Nagore Aranburu


Tunlaia ball pass thiam ber pawla sawi, Liverpool-in Real Sociedad atanga £ mtd 10.5-a an lei, Xabi Alonso hi Everton-player Mikel Arteta te nen Spain-a an awm lai chuan an inthenawm thin. A nupui Nagore Aranburu nen hian fa pakhat nei tawhin a hmingah Jon Alonso an phuah a ni.

Khalid Boulahrouz & Sabia

Chelsea-ah pawh rawn khel zawk tawh, Moroccan thisen kai, Ajax Academy atanga seilian Khalid hi kum 16 mi a nih laiin a pa-in a thihsan a. A football khelh thiam hmangin a chhungte a chawm chho a. A nupui hi Sabia a ni a. Euro 2008 ah quarter final Russia nen an inkhelh hma lawkin an fa hmasa chu hlamzuihin a thi a an tuar hle.

Gianluigi Buffon & Alena Seredova

Goal keeper man to ber leh tha ber tia sawi hlawh ve thin Italian goal keeper Gianluigi Buffon hi Juventus-a khel lai a ni. Thamna thubuai vanga Juventus club hrem an nih a, an hmingchhiat hle lai pawh khan Buffon chu Juventus tan a rinawm tlat.

Player tha thenkhatten club an chhuahsan lai pawh khan a chhuahsan ve duh lo. Tunah chuan Serie A-ah a kaisang leh tawh a. Ram tan vawi 80+ khel tawhin keeper tha tak a la ni a. Buffon (30) hian Czech Republic nula hmeltha leh leh pian nalh, model, Miss World 98-a Czech Republic aiawha top 5-a tling phak a kawp mek.

Daniele De Rossi & Tamara Pisnoli

2006 World Cup-winning team-a mi kha niin AS Roma tana khel mek a ni. Central midfielder tangkai a ni. De Rossi hian May 18, 2006 khan lam thiam Tamara Pisnoli chu nupui ah neiin tunah hian fa pakhat Gaia an nei.

Related Posts :