Thalaite hlutna hrethiam teh hlauh ila

¢ Lalhruaitluanga Chawngte

Mizorama eizawnna pui ber chu loneih a ni a, mahse, kan eizawnna pui ber chu kan hna thawh hreh ber pawh niin a lang.

Loneiha eizawngte chu mi khawngaihthlaka ngaih an ni a, tlanchhiatna tur nei lova ngaih pawh an ni. Dik chiah chuan kan lehkha zir chhan ber pawh hi finna leh thiamna lama kan tuihal vang ai mahin eizawnna nuam leh hahdam kan zawn vang zawk niin a lang a, 'loneiha ei kan zawn loh nan lehkha kan zir tlangpui' ti pawhin a sawi theih hial ang.

Loneih chu a thei apiangin tlansan kan tum a, vawiina loneiha eizawngte pawh tlansan ve thei lo, tang laklawh an ni hial mai thei. Nu leh pa te'n an fate chu lehkha an zirtir tlangpui a, tichuan, an fate chuan lehkha an zir zawhah loneih ni lo, hna remchang apiang an thawk thin.

Thingtlang naupang pawhin lehkha an zir zawh chuan sorkar hna leh hna tha hmu lo mah se mahni khuaa kir-a lo neih ai chuan khawpuiah a rem rem an thawk a, tam tak chuan thingtlanga chhungkaw hung tawk tak ni-a chhungkuaa khawsak ai chuan thla khata Rs 1000 vel hlawha khawpuia mi dawr nghaka eizawn pawh an duh zawk niin a lang.

Chutiang chu a ni a, a thei apiangin loneih chu an tlansan a, loneitu chhungkuaa an fate ngei pawhin lehkha an zir zawh chuan hna dang an thawk zel. Chuvang chuan loneih-a eizawnga hnathawkte chu nu leh pa an ni ta tlangpui a, anni pawh chu mahni hna bansan chak chak em em, bansan dan tur hre si lo an ni tlangpui ang tih a rinawm.

Chuti a nih chuan - Mizorama eizawnna pui ber chu loneih a ni a, mahse, chu eizawnnaa thawkte chu thalaite ni lovin nu le pate an ni tihna a nih chu!

Chu chu thil mak tak a ni a, a mak mai ni lovin a pawi. Mizorama 'work force' lian ber chu thalaite ni lovin nu leh pa zawk an ni mauh mai a, chutiang ni chunga hnam dingchhuak hi khawvelah an awm tawh ang em aw!?

Thalaite chu an awm mai mai a ni lo, eizawnna pui ber - loneih chu tlansan an tum a, hna dang an thawk a ni zawk. Mahse, an hnathawh chu, tu'n kan tawng lo haw lo se, hna ropui tak a ni pha lo a, hna pangngai tia sawi theih pawh a ni hek lo. Lehkha an zir a, an hna hmuh remchan an thawk a ni tawp mai. Labour welfare ngaihthahna ramah hian chu'ng mite chuan hnathawhna hmun hrisel lo takah an thawk a, a neitupa thawh fuh loh tuka ban theih, hlawh an lak mumal loh pawha phun ngam lo an ni.

Thalai tam tak hian ni tinin phur lo fe chungin mahni hnathawhna hmun an pan a, hmabak beiseiawm awm chuan lohna hmunah hna an thawk mek. Chu'ng mite chu an hlim lo a, an lungawi lo. |halai lungawi lo kan ngah khawp ang tih a rinawm.

Chutiang teh nuai chu kan dinhmun a ni a, thalaite hi kan khawngaih ngang lo a nih pawhin, kan 'work force' lian ber chu thalaite an nih loh avang tal pawhin thalaite dinhmun hi siamthat a ngai a ni. Nu leh pa, kum lama upa tawhte hi kan 'work force' lian ber an nih chuan kan hmabak a thim tihna a ni si a!

Thalai an chak ber a, an tha a tho ber a, an mawng a zang ber bawk. Mahse, Mizoram chuan thalaite tha a chhawr lo a, thalaite chu dinhmun lungawi thlak loh takah a dah hial zawk!

Chutiang a nih laia 'chimral kan hlau a nih chuan taimak tur' han tih pung pung mai te hi, 'Exam-naa tihthat duh chuan tui in tam tur' tih ang vel a ni! Dik viau mah se a ril lo!

Related Posts :