Tuesday, June 1, 2010

Ringtu kan ni a, kan tel lo phawt mai ang: Lalzawna

Pathian Kohhran hotupa Lalzawna chuan chhiarpui hi sakawlh lo lanna tur a nih ringin, tel ve a tum lo a, "Ringtu kan ni a,keini chu kan tel lo phawt mai ang," tiin a sawi. Chutiang chuan Champhai DC pawh a hrilh.

Pathian Kohhran te hi Champhai bul Tlangsam khuaah an awmkhawm a, hmun danga awm pawh an awm tho na a, Tlangsam hi an hmunpui a ni. Chhiarpui-ah an hotupain tel a tum loh avang hian May ni 17-ah khan Champhai DC nen pawh an inkawm a, Lalzawna chuan tel a tum loh chhan leh a ngaihdan a hrilh a ni.

"Ka tel dawn lo tih hi DC pawh ka hrilh tawh a, kan sakhuana nen a inrem loh avangin ka tel dawn lo tih ka hrilh a ni. DC pawh a fel khawp mai, tha takin min chhang," tiin Lalzawna chuan Zozam Weekly a hrilh.

"Mimal zalenna thil a ni a, intihluih theih a ni lo tih kan DC hian tha takin min hrilh a, a fel khawp mai," a ti a, "Mahni zalenna a nih avangin midang pawh tel lo turin kan inti reng reng lo," a ti bawk.

Pathian Kohhran te hi 1984 atangin Champhai bul Tlangsam-ah hian an pem a, an inchhiar ngai loh avangin tunah eng zat chiah nge an nih tih erawh an hotupa ber pawhin a sawi thei lo. "Kan khawsa ve diah diah a, kan zat chiah hi ka hre mai lo. Amaherawhchu, kan pawl hi chhiarpui-a tel lo turin kan inti lo. Mimal zalenna a nih ang ngeiin a duh chu kan tel ang a, a duh chu kan tel lo mai ang, tumah tel lo turin ka ti lo," a ti a, tunah pawh a then chu an tel nia a hriat thu sawiin, a tel leh tel lo a thliar lo niin a sawi. Amaherawhchu, amah ber a tel loh avangin a pawlte zingah tel duh lo an tam erawh a ring. "Min en ve hlawm chuan ka hria a," a ti.

"Sorkar atanga hamthatna kan dawn theih loh phah tur thil te pawh min hrilh a, mahse, chan ka huam," tiin DC nena an inbiakna chungchang hi a sawi zawm.

Thupuan 13:17- "Chhinchhiahna- sakawlh hming emaw a hming nambar emaw- neite chauh lo chuan tuman engmah an lei leh an hralh theih loh nan," tih chu a tanchhan a ni a, UID (Unique Identification Card) nei lote'n engmah an lei-a an hralh theih loh a ring a, chu chu sakawlh chhinchhiahnaah a ngai a ni.

"India-ah hian kan hel reng reng lo. Amaherawhchu, UID neih loh hi thil lei leh hralh khapna a nih chuan kan tel thei ta lo mai a ni. Chu chu sakawlh chhinchhiahna a ni ang tih kan ring," Lalzawna chuan a ti.

"Amaherawhchu, chutiang a lo nih loh chuan kan tel leh mai ang. A nih leh nih loh chu nakkum lawkah a chiang mai dawn a, sakawlh a lo nih loh chuan kan dil leh ang a, kan tel mai ang," a ti thung. Chutiang chuan Champhai DC pawh a hrilh niin a sawi nghe nghe.

Chhiarpui-ah an tel thin tih a sawi a, "Tun tum hi chuan ken tel a nei tlat a, sakawlh lo lanna tur a ni theiin a lang," tiin tun tum chhiarpui chu a danglam bik niin a sawi a, "Kan han thlir kan han thlir a, lei leh hralh khapna a nih si chuan... sakawlh lo lanna tur a ni theiin a lang ta tlat a..." a ti.

Unique Identification Card a neih loh avangin sorkar atangin hamthatna a dawng thei dawn lo a nih pawhin tawrh a huam a, "Sual ngaihdamna min petu Pathian tan chuan a tul a nih phawt chuan kan tuar tur alawm; Pathian thu avang chuan kan chan mai tur a ni," a ti.

"Hamthatna kan dawng thei dawn lo niin an sawi a, bank account te pawh UID tel lo chuan a neih theih dawn loh a ni awm e. Tunah hian job card te kan nei a, ration card te kan nei a, sorkar atangin thil hrang hrang kan nei a, chu'ng chu UID tel lovin a neih theih dawn loh a nih pawhin Pathian vang chuan kan tuar mai ang," tiin a sawi zawm a ni.

Chhiarpui hi sakawlh lo lanna turah an ngai nghet bur a ni lo tih sawiin, "A lo nih hlauh chuan kan chesual dawn a, a lo nih loh leh tel ve kan dil leh mai ang chu," a ti.

"Sakawlh chhinchhiahna a lo nih chuan a hlauhawm dawn a, chuti a nih chuan chhiarpui-a tel chu sakawlh thawhpuina ang a ni," a ti a, "Kan han thlir kan han thlir a, lei leh hralh khapna a nih si chuan, sakawlh chu a ni mai awm mange, kan ti," a ti bawk.

Pathian Kohhran te hi 'Lalzawna Pawl' tia hriat lar an ni zawk mah a, khawchhak lunglum hlauva Tlangsam-a pemkhawm tia sawi thin an ni. Amaherawhchu, Lalzawna chuan hei hi a pha a, "Thu hriatsual palh a ni," a ti.

Related Posts :



No comments:

Post a Comment