Tuesday, June 1, 2010

Chhut thiam chuan Sakawlh nambar chu chhut rawh se

May ni 20 leh ni 21-ah khan Booth Mansion, Aizawl Temple-ah hun hnuhnung zirhona seminar neih a ni a, chhiarpui leh sakawlh chungchangin sawi a hlawh hle. Unique Identification (UID) chu sakawlh chhinchhiahna nena hmehbel an tam hle.

Seminar-ah hian Margo Crossing-i (Australian) leh Dr PC Biaksiama te chu speaker an ni a, Margo-i hian sakawlh lo chhuahna tur leh khawvel pum sorkar pakhat hnuaia awmna tur, 'One-world government' din tura khawvel inbuatsaih dan a sawi a ni. Dr Biaksiama chuan chhiarpui leh sakawlh chungchang sawiin, UID hi sakawlh chhinchhiahna a nih leh nih loh chungchanga zawhnate a chhang.

PC Biaksiama chuan, Thupuan 13-in sakawlh chhinchhiahna chu chalah emaw, kut dinglamah emawa chhut kai theih chi-a thuziak emaw symbol emaw a nih dawn avangin tunlaia sorkar chhiarpui nen hmehbel a rem lo, tiin a sawi.

Sakawlh number hi chhut thiamte chhut chhuah tur a nih laiin, chhut thiam hlei lo, ‘a sen reng reng hlau zel ang che’ tih rilru pu mi tu tute emawin rinthuin an sawi mai mai niin a sawi a, tumah chi-ai lo turin a chah.

Unique Identification (UID), India sorkarin siam chhuah tuma a buatsaih mek chu mimal tinte ID card changkang tak tur a ni mai a, rukru leh terrorist-te man chhuahna remchang leh ram chhung security lam atana thil angkai zawk tur a ni tiin a sawi.

Australian Margo Crossing-i pawhin UID hi an ramah tih an tum umin sakawlh nena hmehbela dodal an awm tih a sawi a, mahse, hun a lo kal a, UID ang chi thil eng eng emaw an hmang leh tho nia sawiin, a tel lovin an awm thei chuang lo niin a sawi a, 'mawl lai thil' tiin Australian henkhatin UID an dodal lai chu fiamthu ti takin a sawi.

"Ngaihtuahna kan la siam lo ang reng, sakawlh hi a rikna a rei tawh a, hman ata tawh Catholic te pawh min dem lek lek thin a nih kha" tiin Bishop Stephen Rotluanga chuan sakawlh chungchanga a ngaihdan Zozam Weekly a hrilh. Rev Dr Vanlalchhuanawma, Aizawl Theological College vice principal chuan, "Sakawlh hi Bible-a a sawiah hian hun khata vawi khata lo kal tur angin a sawi em aw tih hi inhnial theih deuhna a ni" a ti.

"Anti-christ hi sakawlh nen hian a zia a inang hle a. Anti-christ hi amah Lal Isua he leia a awm lai ngei pawha awm tawh a ni. Chuta tan chuan Iskariot-a te kha model pakhat a ni thei," a ti bawk.

Chhiarpui nena inzawmna a neih leh neih loh chungchangah, "Chhut thiam chuan chhut rawh se, tih a ni a, a khawi nambarah pawh hian 666 a pu thei dawnin a lang lo," tia sawiin, "Nero hunlaia tihduhdahna te khatih hunlaia emperor te kha sakawlh-ah an puh a, a dik thei tho," a ti bawk.

"Movement emaw organisation structure emaw a awm changa sakawlha puh tum zel hi a fel em aw ka ti," a ti.

"Krista dodaltu hi a awm reng. 'Kan buante hi tisa leh thisen an ni si lo, lalna te leh thuneihna te leh thim thiltihtheihna a ni zawk e' tih a nih kha" a ti bawk.

Related Posts :



No comments:

Post a Comment