Pathian 3 hnena hlan lei

Tuivawl lei (bridge), cheng nuai 487.35 senga siam chu Pathian pathum hnenah hlan a ni.


He lei hi April ni 26-ah chief minister Lal Thanhawla'n a hawng a, chief minister-in a hawn zawhah sakhaw pathumin an Pathian hnenah theuh an hlan ta a ni.

"He lei hi urhsun taka hawnna neih a ni a, sakhaw hrang hrang helai hmuna awm remchang thei Mizo Kristian, Sikh leh Hindu sakhuate'n an Pathian hnen theuhah an hlan a ni," sorkar thuchhuah chuan a ti.

Chief minister chuan India ram hi sakhaw chi hrang hrang zalenna ram a ni a, kan inzah tawnsak vek hi mitin tih tur a ni, a ti. Hetia Pathian hnena hlan a ni hi Mizoram tan malsawmna a nih ngei a beisei thu a sawi.

"Tuivawl Lei hi ropui tehchiam lo mah se a pawimawhna thukzia hi kan hriat tlan a tul a," a ti a, Zoram chhuah lam tan hmasawnna tam zawk a thlen ngei a beisei thu a sawi.

Mizoram leh BRO thawhhona a tha nia sawiin chief minister chuan, "Mizoram khawtlang leh economic hmasawnna atana thil tha tam tak an lo thawh tawh thin bawk avangin ‘Pushpak leh Mizoram hi khuanu rel a lo ni’ kan ti thin reng a ni," a ti.

Tuivawl lei chu Mizoram tana rahbi pawimawh tak nia sawiin, he lei an siam avangin BRO te chungah chief minister chuan lawmthu a sawi.

He lei hi Border Roads Organisation (BRO) hnuaia Project Pushpak te'n Permanent Pre-stressed Concrete (PSC)-a an siam a ni a, metre 70-a thui, metre 12-a zau a ni.

Seling leh Champhai kawnga mi a ni a, May ni 18, 2007-a thawh tan niin, March ni 30, 2009 khan zawhfel a ni. "Eng motor pawh, sipai army tank tiamin kal thei tur leh dawl zo thei tura siam a ni," sorkar thuchhuah chuan a ti.

BRO te hian Seling leh Champhai inkar kawng Km 150-a thui hi 1970 vel atang khan an siam tawh a, he kawngah hian RCC-a siam lei panga dah tur niin, pali chu zawhfel a ni tawh. La zawh loh, pakhat hi 2011-a peih hman beisei a ni.

BRO te hian Mizoram chhungah Km 2500 vela thui motor kawng an siam tawh a, Km 1150 chu Mizoram PWD hnenah an hlan tawh. Project Pushpak hian Mizoram chhim leh chhak hmun kilkhawrah kawngpui thar paruk siam mek an nei bawk.

Related Posts :