LEHKHATHAWN

Ruth-i chuan a lehkhathawn bawm a envelope pakhat lo awm chu a la a, a han en chiang a. Stamp a inbel lo a, post office seal a inchhu bawk lo a, a hming leh address chiang taka inziah chauh a lo awm a. Makti ang reng takin a han hawng a, ti hian a lo inziak a:

Duhtak Ruth,
Inrinni chawhnu hian i thenawmah khan ka lo kal dawn a, rawn tlawh che ka tum ang.

Nangmah hmangaih rengtu
Isua

Makti tak leh kut khur dar dar chungin lehkhathawn chu dawhkanah a dah a. A rilru chuan, "Enga tan nge Lalpa chuan min rawn tlawh dawn le aw? Engmah ka ni bawk si lo a. Engmah pek tur pawh ka nei si lo a" tiin a ngaihtuah zui nauh nauh a.

A choka a ei tur dahna te chu a ngaihtuahna chuan a dap kual a, a ruak vek tih a hrechhuak a. "A lo kal huna lo hlui tur engmah pawh ka nei hleinem le. Zanriah lo kilpui a ngai dawn si a, dawrah kal a ngai a nih hi," a ti sap a. A ipte chu a han phawrh a, a pawisa neih chu a an chhiar a, Cheng 50 leh pawisa nawi tlem te chauh a lo awm tawh a. "Chhangthawp leh thil dang tlema zawng chu a lei theih dawn hi," a ti rilru a. A insiam nghal a, thil lei tur chuan a chhuak ta a.

Chhangthawp man tlawm chi bakah arsa hrang khat, sarep tlem te, bawnghnute leh ei tur tlema zawng a lei a. Thawhtana a mamawh leina tur tlem a dah bang a. Phur takin in lam panin a kal ta a.

Phur taka Isua tana zanriah a siam tur chu a ngaihtuah avang chuan amah tawk zawnga mi pahnih lo kal pawh chu a lo hmu miah lo a. Mipa leh hmeichhia an ni a, an thawmhnaw hak chu a hluiin a pawr chhe tawh hle nghe nghe. Inthlahrung takin mipa zawk chuan a rawn bia a, "Ka pi, min hmuh ang hian hnathawh tur ka hmu lo a, ti hian ka nupui nen hian khawlai velah hian kan khawsa tawp mai a. Khua a vawtin kan ril a tam bawk si a, khawngaiha min tanpui theih chuan kan lawm khawp ang".

Ruth-i chuan chumi te nupa chu a han en chiang a. An bal dun hle a, an rim chhe viau lehnghal a, hna zawng tak tak ni se an thawh tur tawk chu an hmu ngei ngei ang tih pawh a hrechiang a. "Ka pu, puih che u chu ka duh khawp mai, mahse hmeithai rethei tak mai ka ni a. Sarep tlem te leh chhangthawp chauh ka nei a, mikhual pawimawh tak mai, zanriah kilpui tur ka nei dawn bawk si a", tiin a chhang a.

Chu pa chuan a nupui chu a kuah a, "A nih tak chu maw le. A pawi lo e," tih pahin an inher a, an kal ta a.

Chutia an kal liam tur chu a thlir mek lai chuan Ruth-i thinlung chu a na zawk mai a. "Ka pu, lo ding teh u!" tiin a au nghal a. An nupa chuan an ding a, an bulah chuan a va tlan phei a. "Heng hi lo ei phawt teh u. Ka mikhual ei tur chu ka ngaihtuah leh mai ang," tih pahin chu pa hnenah chuan a bag chu a pe a, a thil lei zawng zawng chu a pe ta vek mai a.

An nupa chuan an inen a, Ruth-i hnenah chuan, "Ka pi kan lawm lutuk e. Kan lawm lutuk!" an ti ta chul a. Ruth-i chuan nu zawk chu a han en chiang a, vawt tiin a lo khur bauh bauh mai a. Chutah, "Ekhai, vawt i ti a nih kha. Kha ka coat hi ha rawh, inah a dang ka la nei tho alawm," tih pahin a phelh a, a haktir nghal a. Nui var var chungin chumi te nupa chu a kalsan ta a. Ruak ta huaiin a inhria a...mikhual tan chuan zanriah siamsak tur a nei ta lo a, coat hak tur pawh a nei ta lo bawk a, mahse engemaw ti tak hian veng ta hawkin a inhre thung.

"Ka pi kan lawm e! Kan lawm lutuk!" tih ri chu a bengah a cham reng a.

In a thleng a, kawngka a hawn dawn chuan a ngui hle mai a. Lalpa'n a rawn tlawh dawn a, ei tur engmah lo hlui tur a nei ta si lo.

Chabi a phawrh a, kawngka a hawn dawn chuan lehkhathawn bawm a envelope dang pakhat lo awm chu a va hmu a. "A mak hle mai. Ni khatah dakpu vawi hnih a lo kal ngai si lo a," a phun sap a. Envelope chu a la chhuak a, a han hawng a. Ti hian a lo inziak a:

Duhtak Ruth,
Kan inhmu leh a ka lawm kher mai. Zanriah tui tak min pe a ka lawm hle mai. Coat mawi tak min pe bawk a, ka lawm tak zet a ni.

Nangmah hmangaih rengtu
Isua

Tlai khaw vawt tak hnuaiah chuan coat pawh ha lo mahse Ruth-i chuan khaw vawt reng reng a hre chang tawh lo. A rilru chu hlimna nasa takin a khat a ni.

('The Letter' tih lehlin a ni. Lalthlamuana Ralte)

Related Posts :