Sorkar sum LAPSE, Zozam-in LEPSE

Mizoram sum, hman lohva tawl ta chungchang chuan ngaihven a hlawh hle a, 'finance' lam hrethiamte phei chuan an ngaihven hle. Hemi chungchangah hian inpuhmawhna a awm thei viau mai; sorkar hnathawk leh ministry lamah pawh insawithiamna tur a awm thei zel.

Thudawn pakhat chuan cheng vaibelchhe 68 chuang 'lapse' chhan kha sawi tur a awm nual thei ang tih sawiin, NLUP vang pawh a ni ve niin a sawi.

"NLUP sem leh sem loh chungchangah thuchiang a awm thei lo a, 2009-2010 chhunga sem hram tum a ni a, chu chu buaipui a nih bakah ngaihchan a ni reng a, a tawpah mi pahnih/pathum vel thuin sem leh loh tura tih a ni a. Hei hian a nghawng viau a ni," thudawn chuan a ti.

Thudawn dang pakhat chuan plan finalization a tlai lutuk khan a nghawng thui viau bawk tih a sawi. August 2009-ah plan finalization hi tihfel chauh a ni.

Interim Budget vawi hnih hman a nih hnu-ah Budget pangngai chu October-ah pass a ni chauh a, 2009 October atanga 2010 March chhungin full budget sum hi hman a ni. "Thla 5 vel chhungin budget sum hman tur a ni a, hnathawhna hun hi a tawi khawp mai. Sorkar hnathawkte pawhin 'hnathawhna hun a tlem dawn' tiin tan an lo la lo ve bawk a, ministry lam atangin 'pressure' a awm lo bawk nen, pawisa lapse chhanah hei hi puh a rem khawp," tiin official pawimawh tak pakhat chuan a sawi.

State Bank of India lamin March ni 31 zan dar 6:30 hnu lamah dawr theih an nih loh tur thu-ah Mizoram sorkarin March ni 15-ah hriattirna a dawng a, March ni 30-ah Mizoram sorkar chuan circular chhuahin department hrang hrang a hrilh ve leh a, department thenkhat chuan hei hi chawpchilh an ti hle. Chutih laiin department thenkhat chuan hemi chungchangah hian hriattirna engmah an dawng lo niin an sawi bawk. Planning deptt. berin hemi chungchangah hian hriattirna an dawng ve lo niin thudawn pakhat chuan a sawi a, "Mizoram sorkar hnuaia department hrang hrangte thawhhona hi a tha lo hle a ni," thudawn chuan a ti nghe nghe.

IAS officer pakhat, Mizoram pawna thawk chuan, "Finance lama hlawhchhamna chauh ni lovin administration lawma hlawhchhamna a ni. Eng level-ah pawh puh tur an awm ang a, tu pawh an insawithiam thung ang. Tin, an insawithiamna chu a dikna lai a awm zel bawkin a rinawm, siamthat tur a tam khawp ang," tiin a sawi.

Sorkar department hrang hrangin finance deptt-ah financial year tawp dawnah chawpchilh takin expenditure sanction proposal an thehlut thin a, hei hi Mizoram tibuaitu pakhat a ni. Hetianga chawpchilh taka an tih chhan hi sawi tur hrang hrang a awm thei ang; a chhan langsar tak pakhat chu thil rintlak tak tak ni lo hman tum vang a ni. "Keini aiin finance lamin pawisa a 'lapse' ang tih an hlau zawk," tih rilru pu ranin department lamin phuahchawp takin expenditure sanction proposal hi an thehlut thin a ni. Entirnan- building sak hnate hi department hian contractor hnena pek aiin departmental work-a tih an duh fo. JE nei department chuan cheng nuai 2 man an thawk thei a, SDO neiin cheng nuai 5 man, EE nei chinin cheng nuai 10 man, chutiang chuan thawh theih chin a awm. Mahse, building sak hna kha cheng nuai 60 man te a lo ni a, chutah chuan 60 chu thenhrangin, hna hrang hrang- cheng nuai 2 man diat diat tiin emaw an phuahchawp ta thin a ni. Chutianga an tih chuan financial year tawp dawnah chawpchilh taka an thehluh a ngai a, 'Keini aiin a lapse ang tih an hlau zawk' tih rilru puin. Tun tumah pawh khan chutiang chu Mizoram sum che vel tibuaitu pakhat a ni.

Department lamin finance-a expenditure sanction proposal leh bill eng engemaw an thehluh zingah fel thlep thlawp lo, buaipui ngai fe a tam thin hle bawk. Entirnan, department pakhat chuan an proposal chu sorkar laipui scheme thawhna tur a nih thu an sawi a, a lo buaipuitute tan 'eng scheme nge? eng tin nge a dan-in a sawi? eng chin nge pawm tur?' tih te haichhuah leh vek a ngai thin. Chutiang chu an han inzawt chiang a, Mizoram sorkar hnuaia department awm zat ngaihtuah la, chutiangin hun a heh dan tur chu a chiang mai awm e. Chu chu March thla tawpa inhnawh chepna thlentu langsar pakhat a ni.

March thla tawpa inhnawh tawtna tur sutkian nan Mizoram sorkar chuan department hrang hrangte tan March ni 15, 2010 thleng proposal reng reng planning board-a thehluh tur tiin lehkha (Office Memorandum) an siam a, finance deptt.-a a luh hunah 22.3.2010 thleng tiin hunbi an tuk bawk. Hei bakah hian Treasury-a bill thehluh ni hnuhnung ber atan ni 30.3,2010 a nih thu hriattir an ni. (No.G.17018/1/2002-FEC Dated 22.February,2010)

State Bank of India pawhin March ni 31,2010 zan dar 6:30 hnu lama sorkar bill an dawn theih tawh loh tur thu Mizoram sorkar an hriattir. Hetiang hian kum dangah pawh an ti fo a, mahse zanlai dar 12 pelh thleng pawhin (SBI) hian bill hi an dawng thin tho thung. Engpawhnise, chutianga inhmakhua tumna chuan awmzia a nei ta lo a, kum dang ang bawkin March thla tawpah an che leh ta suau suau a, March ni 31-ah pawh, zan dar 8 hnu lama bill leh proposal thehlut an tam hle. Tarlan tawh angin, chu'ng bill leh proposal te chu chiangkuang lo leh fel lo a tam hle a, a thlifimtute tan chuan mangan thlak tak tur a ni.

Kum dang ang bawka chutianga Mizoram sorkarin hna a thawh hnu-ah cheng vaibelchhe 70 chuang chu a 'lapse' ta a, eng vang nge ni ta ang?

"RBI-a Mizoram Cash Balance a ruak ang tih hlauhna hi sum 'lapse' chhan bul a ni," tiin Zozam Weekly chuan thu a dawng.

A awmzia chu- Treasury Officer-in ni khata bill a siam theih zat hi cheng vaibelchhe 5 a ni a, sawi tawh angin March thla tawpah department hrang hrang an inhnawh tawt a, finance-in department hrang hrangte thehluh an thlitfim hnu-ah treasury-ah an thawn a, treasury a paltlang hnu-ah SBI-ah thawn leh tur. Mahse, treasury atanga bill siam theih zat khan a daih ta lo. Sum leh pai khawihtu mi thenkhat thahnemngaiin March ni 31 chhun dar 11:30 velah khan chu chu thiatin, treasury atanga bill siam theih zat bituk chu tihtawp a ni ta a, chu chuan engemaw zat a su kaw ta. Chuti ni hlauh lo phei se kha aia tam kha lapse tur a lo ni.

Tarlan tawh angin, a hun tawpa che tam mah se finance leh treasury thlengin 'clear' theih chu 'clear' a ni hlawm a, treasury atanga a chhuak turah a buai ta a ni. Treasury atanga bill siam theih zat bituk tihtawp a nih hnu-ah bank lam a'n thleng phei leh a, mahse, a tlai tawh lutuk a, bank-in an zo tawh lo. Zan dar 12 hmaa an peih hman tawh dawn chuan loh avangin anni pawhin an kawng an khar ta ringawt mai niin thudawn chuan a sawi a, SBI main branch-in an dawn hnuhnun ber chu zan dar 9:30 nia hriat a ni. Hemi hnu-ah hian la dawng zel pawh ni se an tlin tawh dawn lo nia hriat a ni. Nutrition leina tur bik pawh, department hotute'n an ngen chiam avangin SBI lam hian tlai tawh takah an lo pawmsak a, mahse, bill an han thehluh dawn khan bank-in a pawm theih tawh loh department dang khan 'anni pawh in dawnsak theih chuan' tiin an bawr ta huk a, bank chuan an vaiin an pawm tak loh phah niin thu dawn a ni.

March ni 31 chhun dar 11:30 velah treasury atanga bill siam theih zat bituk thiah a ni chauh kha, chu aia hmaa thiah a ni lo kha a chhan bul, a kaikuang chu a ni ta a, engatinge a hmaa an lo thiah mai loh tih chu zawhna a ni leh ta a ni.

"RBI-a Mizoram cash balance a ruak ang tih a hlauhawm vang," tih chu Zozam Weekly-in thu a dawn dan a ni.

Pawisa kum tawp ni-a Mizoram account-a sum awm zat hi cheng vaibelchhe 31.5 chauh a ni a, ADB loan lak bang leh public account-a sum la awm leh thil dang (contingecy fund, etc.,) nena chhut phei chuan a khawp mai. Treasury-in bill tam tak an pass a nih chuan Mizoram account hi a tlem tial tial dawn a, sum lapse zat- cheng valbelchhe 70.52 pass fel ni phei se chu Mizoram sorkarin sum a nei lo mai ni lovin cheng vaibelchhe 38.63 lai a ba dawn tihna a ni. Pawisa kum tharah Mizoram sorkar chu a overdraft nghal dawn tihna a ni a, "March thla a tawp ang a, sorkar hnathawk April thla hlawhte thuneitute tan chuan a ngaihtuah loh theih loh a, chutiang vang chuan treasury bill pass theih zat kha tihsan an ngam lo a ni thei," thudawn chuan a ti. Chutiang chu thleng ta se treasury khar hial a thleng thei.

################################

Rinna antam chi tiat

Mizoram pawisa 'lapse' hmuh let leh dan turah beiseina kawng khat a awm a, mahse, a huphurhawm hle thung tih thu dawn a ni.

"Mizoram sorkar thuneitute'n Planning Commission an biak thiam viau chuan, chutah pawh Planning Commission lamin mak tak maia rem an lo tih hlauh chuan kumin financial year-a BCR-ah (Balance from Current Revenue) a then hi chu a khung leh theih ang," thudawn chuan a ti.

"Kan state-in chhiah kan lak ve atanga sum kan hmuh te, finance commission grant kan hmuh te, kan non-plan fund zawng zawng hi kan expenditure-in a khum a, chuta a khumna chu Annual Plan-ah tlem tlem siamremin Planning Commission hian an rawn cover theih chuan sum lapse thenkhat hi a hmuh let theih ang tihna a ni," tiin a sawi zawm a, mahse, chu chu 'beiseina'-a ngaihtuah niin a sawi thung.

'Revalidate' theih loh, un-earmarked bikah hriat theih chinah tun-a sum 'lapse' ni-a sawi-ah cheng vaibelchhe 30 vel a awm ni-a thu dawn a ni a, chu chu BCR-a khung theih tur-a beisei theih chin chu a ni. Chuti a nih chuan, Mizoram sorkar hruaitute leh Planning Commission hotute inbiak dan a zirin cheng vaibelchhe 30 vel chu hmuh leh theih turah a beisei theih tihna a ni. Amaherawhchu, sawi tawh angin hei hi beiseina ringawt a ni thung.

Heti zawng hian Mizoram sorkar chuan hma an la a, "Approved Scheme of Financing pawh hemi atan hian Planning Commission re-approve tura revise leh mek a ni. Kumin Annual Plan Total Outlay cheng vaibelchhhe 1500 pawh cheng vaibelchhe 1530 a nih a ngai ang," thudawn chuan a ti.

Hetih lai hian April ni 8-ah Mizoram sorkar chuan thuchhuah siamin sorkar kuta sum awm hman tak loh dinhmun an sawifiah a, "Department thenkhatin sum an lak (draw) hman lohte hi department tan channa a ni a, state tan erawh cheng khat pawh channa a awm lo," an ti.

Related Posts :