Monday, April 12, 2010

Sorkar Chiahpuam a puam ta lo!

Financial year liam ta- 2009-2010 chhunga Mizoram budget sum cheng vaibelchhe 68 chuang chu hman lohvin a riral der mai!

Budget Session (March ni 18-April ni 5) liam ta-ah khan chief minister Lal Thanhawla chuan hemi chungchang hi vawi hnih vawi thum a sawichhuak a, thinrim thlak a tih thu hial a sawi a nih kha.

April ni 5, Budget Session tawp ni-ah sum riral chungchang hi sawiho a ni a, Hachhek bialtu Lalrinmawia Ralte-in motion a putluh hnu-ah member te'n an sawiho zui a ni.

Lalrinmawia Ralte chuan he thil hi sorkar tan mualphona a ni thei tih sawiin, chuti chunga hetia House-a sawiho remtih a ni hi sorkar hruaitute thahnemngaihna a ni tiin sorkar hruaitute a fak a, mipuite pawhin sorkar thahnemngaihna hi lo chhinchhiah se a duh thu a sawi.

Financial year liam taa Mizoram sorkar sum cheng vaibelchhe 68 chuang hman lohva a awm chu mipuite tan a lungchhiat thlak tiin a sawi a, "Sum heti zat luanliamtir hi kan tlin lo a ni," tia sawiin, "Sim tur a awm em? System thar introduce tur a awm em?" tih te ngaihtuah tul a tih thu a sawi a, "Kan sum enkawl dan hrim hrim pawh hi ennawn a ngai em aw ka ti a," a ti.

Chief minister, finance changtu Lal Thanhawla chuan, "Finance minister leh planning minister hi mawhphurtu chu a ni mai a," tiin hman lohva cheng vaibelchhe 68 chuang riral taah mawh a inbel a, plan finalization a tlai vangin sum hman hman loh a awm tia sawiin, February thla chhunga an plan te peihfel hman turin department-te an ti a, mahse, an peih fel hman lo niin a sawi.

"A tlangpuiin department lam atangin khawtlai a awm a, finance leh planning lam atangin tihkhawtlai a awm bawk a," tiin a chhan a sawi a, "Tunah chuan puhmawh tur zawng lova a siamthat dan ka zawn a tulin ka hria," a ti bawk.

Mizoram sorkar sum enkawl danah siamthat ngai siamthat a nih tur thu sawiin, "Engemaw tia action lak a tul a nih pawhin, siamthatna tur a nih phawt chuan hma kan la ang," a ti.

Hemi chungchang sawihona hi 'short duration discussion' a ni a, darkar 2 chhung sawiho tur a ni. Speaker hian a duh apiang sawm lovin eptu lam atangin legislature party pahnih aiawhin Lalduhoma leh Dr R Lalthangliana te hemi chungchang sawi tur hian a sawm a ni.

Lalduhoma, UDA aiawha sawitu chuan, "Hetiang kher kher hi chu, ka hre sual a nih loh chuan ka hriat vawi khatna a ni," tiin hetianga sum hman hman loh tam tham tak a awm chu pawi a tih thu a sawi a, tun hnu-ah hetiang thil a thlen tawh loh nan a siamthat dan tur zawn ngai a tih thu a sawi.

Democratic principle-ah chuan pawisa hman hman loh awmna department changtu minister-te leh finance minister chu bang ngam se thil awm tak nia a hriat thu a sawi a ni.

State Bank of India lamin March ni 31 zan dar 6:30 hnu-ah hna an thawh theih loh tur thu Mizoram sorkar a hriattir chunga Mizoram sorkarin chumi nang hman tura hma a la lo chu demawm a tih thu a sawi a, "Bank hian an ti tha ka ti," tiin bank a fak a, Mizoram sorkar a dem thung.

A hma chiaha ding, chief minister khan State Bank of India a dem a, 'State Bank of India ringawt hi kan hmang a, tianga an indaih lo dawn a nih chuan Punjab and Sind Bank te pawh an lo lut tawh a. An monopolise avanga min tihsak thei lo leh min tihsak seng lo a nih chuan bank dang te pawh kan hmang mai dawn em ni ang...' ti ang zawngin a sawi a ni.

Aizawl North Treasury North leh South te pawisa khawih chet theih zat chungchang sawiin Duhoma chuan, "He mite'n ni khata an pawisa khawih theih zat kan tipung har lutuk te hi sorkar mawh a ni," a ti.

A siamthat dan tur sawiin Duhoma chuan, department secretary leh commissioner te'n finance leh planning deptt thu kher lova 'sanction' an tih ve theih a ngai a tih thu leh planning leh finance-ah estimate siam thiam awm se tha a tih thu a sawi.

MNF Legislature Party aiawha thusawitu Dr R Lalthangliana chuan, "Heti zat kan chan hi a lungchhiat thlak a, a pawi tak zet a ni," a ti a, "A sum bawm lama kan hotupa ber hian a 'monitor' bik lo a ni ang," tiin finance changtu hian midang kian se tha a tih thu a sawi.

Mizoram sorkarin State Planning Board ropui takin a din tia sawiin, finance deptt nena an inkarah boruak tha lo a awm emaw tih theih a nih thu a sawi bawk.

House leader, finance changtu Lal Thanhawla chu khaikhawm turin speaker-in a sawm a, inpuh vakna tur a awm lo nia sawiin house leader chuan, "Mipui vantlang leh house member zahawm takte pawh manganna leh chi-aina tur chi niin a lang lo," a ti.

"Thla hnih thla thum chhungin supplementary demand sawi tura season koh leh a ngai dawn a, khami hunah khan lapse zawng zawng a thun leh theih vek a ni," tiin cheng vaibelchhe 68 chuang bo chu bo hlen ta vang vang a ni lo niin a sawi.


Chiahpuam lapse zat

1. Rural Development Deptt. Rs 215006988
2. Social Welfare Deptt. Rs 99367466
3. Tourism Deptt. Rs 292000
4. School Education Deptt. Rs 1912000
5. SCERT Rs 7142400
6. Health Services Deptt. Rs 72171302
7. Hospital & Medical Education Deptt. Rs 24107259
(1-7 hi Aizawl North Treasury-a mi a ni)
8. Law & Judicial Deptt. Rs 1964750
9. UD&PA Deptt. Rs 88958364
10. Industries Deptt. Rs 10401255
11. Science & Technology Rs 339000
12. Mining Rs 10614623
13. Transport Rs 5814104
14. GAD (Aviation) Rs 3994188
15. Protocol Rs 1999400
16. SAD Rs 22969
17. Trade & Commerce Deptt. Rs 12000000
18. AH & Vety Deptt. Rs 21689713
19. Police Rs 110046770
20. Supply Deptt. Rs 1690613
21. Rural Development (Secretariat) Rs 26305

Related Posts :



No comments:

Post a Comment