Monday, April 5, 2010

Sap tawng a tawk, Zo tawng a ngai lo

Mizorama dan hman lai- Act leh Rules te hi Assembly House chuan Mizo tawnga dah vek tur nge tur loh tih an ngaihtuah a, dah vek turin thu an titlu ta lo.

Budget Session neih mekah, March ni 26-ah khan Aizawl West I bialtu Lalduhoma private resolution- "Kan dan hman lai (Act) leh Rules zawng zawngte hi Mizo tawnga dah ve vek ni rawh se" tih chu hnawl a ni.

Resolution puluttuin minute 10 hun a hman hnu-ah pass pui turin House a dil a, member te'n an sawiho zui nghal a ni. Member 17-in an sawiho a, opposition member lamin tha an tih thu leh pass ngei an duh thu an sawi laiin rulling member-te erawhin pass chi nia an hriat loh thu an sawi thung.

Aizawl North II bialtu, minister H Liansailova chuan Mizo tawng chu Mizo hnahthlak zawng zawngte phuarkhawmtu tia sawiin, a pawimawh telh telh a rin thu a sawi. Kan dan hman lai zawng zawng Mizo tawnga dah chu dan hriatna lamah a that a rin thu a sawi a, chutih rual chuan, "Mahse kan tham zau lutuk," a ti thung.

"Lehlin hna kan thawh fe a ngai ang a, lehlamah chuan mipui- ka target-a te tan khan chuti teh luaa pawimawh ni si lo, kan ni tin nun khawihtu ni si lo te a lo ni ang a," tiin huphurhawm a tih thu a sawi a, a vaia lehlin ti lovin a theih chin chin lehlin ni ta se hautak lo zawka kalpui theih a nih a rin thu a sawi.

"'Zawng zawng' a rawn hmang hian a tham zau deuh lutuk," H Liansailova chuan a ti a, "Pawimawh ti hle mah ila, kan tana pawimawh leh tul chinah, chhiarawm tur laite dapchhuak turin resolution hi siamthat ni se," a ti bawk.

Minister PC Lalthanliana, Lunglei North bialtu chuan, "Thil tha tak, mahse a tak ram chan tura keini a pass-tu-ate pawhin kan tlin loh tur a ni," tiin he resolution chungchang hi a sawi.

Mizote hi dan hriatna lamah kan hniam hle tiin a sawi a, amaherawhchu, "Zo tawnga a awm loh vanga hre lo aiin ngaihsak loh vanga hre lo kan tamin ka hria," a ti thung.

"Dan leh hrai tawngkam tam tak hi Zo tawngin kan dah thiam tawk lo ang a, kan buai phah zawk ang tih ka hlau deuh a," tiin huphurhawm a tih thu a sawi bawk.

Rulling member, Champhai North bialtu TT Zothansanga chuan ukil hna a thawh laiin legal awarness campaign-ah a lo fehchhuah ve thin tawh thu sawiin, dan leh hrai thil hi Mizo tawnga dah a har a tih thu a sawi a, resolution hian huam zau deuhva a hriat thu a sawi bawk.

Oposition member, Palak bialtu PP Thawla chuan, "Mahni tawng ngaih pawimawhna hi kan thangtharteah hian a lian telh telh dawn," tiin dan leh hrai kan hman lai Mizo tawnga lehlin vek chu tha a tih thu leh he resolution hi pass ngei tha a tih thu a sawi.

Rulling member lamin huphurhawm an tih thu an sawi chu chhangin PP Thawlla chuan, vawi leh khata lehlin zawh nghal vek tur tihna a ni lo tiin a sawi a, "Kan tlin dan tawk zela hmalak chhunzawm zel a ni mai ang a," a ti.

Aizawl South I bialtu K Liantlinga (ZNP) chuan Mizo tawng dah pawimawh tul a tih thu sawiin, BA/MA thlengin Mizo tawnga pass theih ni se a duh thu a sawi a, chutih rual chuan "sap tawng pawhin kan pass bawk ang" a ti thung.

"Hnam dang tawng atanga kan tawnga leh kan hreh" tiin rulling member te a chhang a, huphurhawm an tihna pawh "kum tin crore khat pawh dah ila eng nge a pawina?" tiin a chhang.

Sap tawng thiam ve lote'n dan leh hrai hriatna lamah hma an sawn theih nan Mizorama dan hman laite Mizo tawnga lehlin tul a tih thu sawiin, MLTP Act pawh hi miin hre vek se chu harsatna a tlem sawt a rin thu a sawi.

Thorang bialtu, minister Zodintluanga chuan, "Mizo mipui nawlpuiin ni tina kan mamawh tur ang chi hi Mizo tawng dah ni rawh se ti zawk ila a that ka ring," a ti a, 'regionalism' zawng ringawt kal tha a tih loh thu a sawi bawk.

Aizawl South III bialtu, parliamentary secretary KS Thanga chuan he resolution hian thatna a neih laiin a huphurhawm a tih thu a sawi a, "Mizo tawnga lehlin vek kan tum chuan hun leh tha, sum leh pai tam tak a ngai dawn a ni," a ti.

"Hre tura kan duhte hi han lehsak pawh ni ila mamawhna an nei vak tlat lo a ni. A mamawhate chuan an hrethiam sa si a," a ti bawk.

Lawngtlai West bialtu C Ramhluna (MNF) chuan Mizoram Assembly House-in Mizo tawng chu official language atan a lo pass tawh tih sawiin, chuti a nih chuan dan leh hrai kan hman mekte Mizo tawnga lehlin chu tih tur ngawih ngawiha a ngaih thu a sawi. Dan hriatna lama hmasawnna a thlen a rin thu a sawi bawk.

Law minister Lalsawta chuan, "Tha tih chin kan nei vek a, mahse, he ram rorelna sang tak hi tih theih chin leh tih theih loh chin hrethiamte thukhawm kan ni," tiin resolution hi pass ni ta se tihhlawhtlin huphurhawm a tih thu a sawi.

A tawpah reolution puluttu Lalduhoma chu khaikhawm turin session kaihruaitu deputy speaker-in a sawm a, "|ha ti lo pakhat bak kan awmin ka hre lo," tiin member-te thusawi a hmuh dan a sawi.

"Resolution kan pass reng rengin hun bi tiamin kan ti ngai lo," tiin huphurhawm titute thusawi a chhang a, "Rei lo te chhunga tih buan buan tur tihna a ni lo," a ti bawk.

Rulling member-te thusawi chhangin, "India Constitution hi Act a ni lo a, rules a ni hek lo," a ti a, IPC leh CrPC te pawh Act leh Rules a nih loh thu a sawi bawk.

Rulling member-te hian huphurhawm an tih thu sawi nan, 'Kan dan hman lai zawng zawng lehlin a ngai dawn a, India Constitution pawh lehlin a ngai ang a, IPC leh CrPC te a ngai ang a...' ti hawi zawngin an sawi nual a, a then phei chuan guidelines leh notification thlengin an sawi lang. Member pakhat chuan USA dan te pawh a sawi lang a, 'US VISA dil dawn ila, USA dan kan hman a ngai dawn a, kan dan hman lai zawng zawng Mizo tawnga dah kan tum a nih chuan dan hman lai a tam lutuk,' ti hawi zawngin a sawi. He'ng hi chhangin Lalduhoma chuan, "Kan thliarhrang thiam lo kha pawi ka ti, guidelines te hi ka sawi lo," a ti a ni. USA VISA dilnaa hman tur US dan pawh Mizoram Act a nih loh thu a sawi bawk.

Act leh rules zawng zawng lehlin huphurh vanga mipui nawlpui tana a pawimawh zual thlanchhuah rawttu an tam tih sawiin, "Modify pawh ka remti em em a ni," a ti.

Harsatna engemaw avanga lehkha zir sang lo leh sap tawng hrethiam ve lote'n dan leh hrai an hriatthiam theih nana he resolution hi pulut a nih thu sawiin, a resolution pawm leh pawm lo an awm chuan "tute nge kan VIP-te tih hi a hrilhfiah dawn a ni mai," a ti. He thu a sawi lai hian rulling lam chuan thuthmun atangin an lo hnial deuh laih a.

Resolution puluttuin a khaikhawm zawhah 'voice vote' hmangin he resolution hi hnawl a ni ta a ni.

Related Posts :



No comments:

Post a Comment