Monday, April 5, 2010

Orissa Rawngbawlnaah Pathian Hnathawh Ropui

¢ Laldingliana

B. Lalremtluangi leh mithahnemngaite rawngbawlna Pathianin mal a sawm a, Orissa-a an rawngbawlna hmun hrang hrangah Pathian hnathawh ropui a lang zel, Kristian-ah mi thahnem tak an inpe tawh.

Tun hnai mai khan Orissa khaw pali-ah rawng an bawl a, Balibudha-ah te, Tialdandakia-ah te, Tera dhan shi-ah te rawng hi an bawl hnu-ah Happy valley-ah rawng an bawl leh mek. He hmunah hian Pathian ropuina a lang a, Pian tirh ata mitdel pakhatin damna a chang a, piantirh ata tawngtheilo mi paliin damna an chang. Mi panga, pian tirh atanga engmah hre lo te'n damna an chang bawk.

"Khaw pakhat kan tlawhah chuan mite'n an hlauh leh an tih em em- hel pawl Maoist te'n min lo lawm hle a, min buaipuiin min tanpui a, tin, an tana tawngtai turin min sawm nghe nghe a ni. He khuaah hian khawtlangin min lo lawm a, min hmuak a, parthite min awrh tir a, a ropui tak tak a ni," tiin rawngbawlnaa tel ve pakhat chuan a sawi

"He khuaah hian thil pakhat mak tak kan tawng nghe nghe a, kum 4 chuang ramhnuaia lo khawsa tawh, mi a pakhat Chanobhadi kum 25 mi, palian zet mai hi kan rawngbawlnaah a rawn kal ve a, a tirah tak phei chuan kan tih ang reng khawp mai. A palianin a tawp bawk si, a rimchhiain thawmhnaw inbel mumal a nei bar lo a. Lamtual ang reng kan dahah hian a kal kul zuk zuk reng mai a, mahse rawngbawlna zawh hnu, a in-a a haw chu thawklehkhatah a fingvar thut a, a awm dan leh a incheina chu a duh lo hlein a zak hle a ni tih a chhung te'n min rawn hrilh," a ti bawk.

"Hemi hnu hian an chhungkuain Kristianah an inpe a, mahse boruak dang a awm kan hlauh vangin Baptisma erawh an chang lo, an bialtu Pastor kutah kan hlan a ni," a ti bawk.

He rawngbawlnaah hian pi leh pute atanga Kristian lo ni tawh, Orissa mi, Samantha an tih chu kawng engkima an chhawr leh kaihruaitu a ni.

Rawngbawlnaa kalte hian tun hmaa Kristian an tihduhdahna hmun hrang hrangte an tlawh kual a, pastor chhungkua an thahte ruhro lain Mizoram lamah rawn hawn an tum a ni.

Tunhma deuha sai-in an in leh ram a tihchhiatsakte ho kha hmun khatah an awm khawm a, tun hma lama an chet ang chuan an che ngam tawh lo niin an sawi.

"Kan hotu lam chuan Kristiante tiduhdah leh turin min rawn nawr fo a, mahse, kan duh tawh lo. Chet kan lak apiangin keimahniin kan tuar zel. Tawrhna kan hmachhawn vein tumah tanpuitu kan hmu ve ngai lo, police-in min man a, tuman min chhanchhuak ngai lo. Kristian-ho chu an inhmangaih a, an awmkhawm a, eng pawh an chungah thleng se an intanpui tawn thin. Chuvang chuan kan chet hian sawtna a nei lo," an ti niin thudawn chuan a sawi.

Khaw rethei tak, ei tur leh in tur awm mumal lohna hmunah rawng hi an bawl a, hetia rawngbawla kalte hian ei leh in tur tha an mamawh thu te sawiin, Zoram mipui te'n sum leh pai an thawh- tanpuina chu chawl lova nasa lehzuala thawh turin an ngen a ni.

Tunah hian pastor pakhat ke ruh tha lo tan cycle pakhat an leisak a, midang pakhat leisak leh an tum thu an sawi.

"Helai hmuna Pastor leh hnathawkte hian tanpui an mamawh hle. Chumi piah lamah khaw mipuite tan pawh hnathawh tur a tam hle. Tunah hian tuichhunchhuah siam hna te leh huan thlai siam hna te thawh tur a tam lutuk, an khua hi an tam a ni deuh ber mai. Chuvangin Kristiante'n theihpatawpa tawngtaina leh thilpek hmanga kan tanpui hi a ngai ngawih ngawih a ni. An retheihzia hi sawi mai hian kan sawifiah pha lo ang." thudawn chuan a ti.

Rawngbawlna hmuna mipui kalkhawmte tan ruai an buatsaih thin thu sawiin, "Hmun hla tak tak atangin kan thusawi ngaithla turin mipui sang rual an lo kalkhawm a, eitur nei lo riltam fe fe an tam thin si a, ruai kan buatsaih thin. Tin, public meetiing an neih hian ruai hi an lo siam thin niin a lang, hetiang a nih thin avang hian a hautak duh hle. Zoram mipuite tanpuina kan mamawh lehzual a ni," tiin Zoram mipuite thahnemngaih a tulzia a sawi bawk.

Related Posts :



1 comment: