Monday, April 5, 2010

Hnam zia, nunphung leh hmasawnna

¢ Lalthlamuana Ralte

Hnam tin hian pi pute atanga inrochun chhawn ze nghet kan nei theuh a, chutiang hnam zia leh nunphung avang chuan hnam hrang hrangte hi thliarhran theih kan nih phah a ni.

Hnam zia (culture) chu khawsakhona atanga lo chhuak, hnam pum ze nghet a nih rualin rei lo te chhunga bo duak thei pawh a ni. Hnam chak zawkte'n a chak lo zawkte beihnan ralthuam tha ber ber an hmang a, chumi hnu-a nghet taka an awpbeh theihna hmanraw tha ber chu an hnam zia tihdalsak a ni thin.

Historian-te chuan 1492-a Christopher Columbus-a'n America khawmualpui a hmuhchhuah atang Khawvel hi a sawng te tan niin an sawi thin. Chumi hnu lamah chuan khawthlang lamah thil a inthlak danglam nasa hle a, loneih lama hmasawnna leh thil siamchhuahna lama hmasawnna runpui a lo thleng a. Mihring finna leh thiamna nasa takin a lo pung, sorkar inrelbawlna a mumal tial tial bawk a. Heng zawng zawng infinkhawm hian sumdawnna lamah hmasawnna namen lo hring chhuak ta a ni.

Sipai chakna leh hmanraw thar hma chhuanin khawthlang ramte chuan khawmualpui hrang hrang an daidar a, awpbeh theih apiang an awpbet zel a. An thlen chin apiangah an hnam zia an pawlhdal sak zel a, chuta tang chuan khawthlang ram ngaihsanna a lo piang a, chu chuan tunlai hun thlengin a awh ta a nih hi.

Sipai chakna leh culture hmanga khawthlanghoin ram hrang hrang hneh taka hun rei tak chhung an awpbeh hnuah Indopui vawi hnih lai a lo chhuak a. Tichuan kum zabi 20-na laihawl vel atangin khawthlang ramten an awp ram an chhuahsan ta a, mahnia inrelbawl sorkar thar a lo piang ta sup sup a. Mahse, hun rei tak chhung khawvel awptu hnam ropui zawk khawthlang rama chengte zia chuan vawiin thlengin khawvel a la chiah zui ta zel a ni.

Hnam dang awpbehna hnuaiah pawh hnam bil zia leh nunphung engemaw chen chu vawnnun reng theih a ni a, sakhuana nena inzawm hnam zia phei chu pawlhdal a har bik ni pawhin a lang. Mahse, tunlai khawvel hmasawnna 'globalization' ti-a an vuah hian khawvel hi a hrut na lutuk a, sumdawnna nen a inzawm tlat bawk avangin hnam tenau deuh leh chak lo deuh tan chuan inven him a harsa tial tial ta niin a lang.

Mithiam zingah hmasawnna leh hnam zia hi intawksir zel-a ngai an awm a, hmasawnna a nasat poh leh hnam zia leh nuphung (culture) a tlahniam tial tial dawn niin a ngai. Thenkhat chuan hmasawnna leh hnam zia hi suihfin theih niin an ngai a; culture vawnhim a, tihchangtlun zel hian hmasawnna a tichak zawk niin an ring thung. Social theorist thenkhat Karl Marx te, Daniel Bell teho khan ram hmasawnna (economic development) hian hnam zia a tipherh chhe zel ni-a an ngaih laiin sociologist ropui Max Weber te, Samuel Huntington te thung kha chuan hnam nunphung bik hi chu vawnhim reng theih niin an ngai thung.

Inkalpawhna leh inbiakpawhna a changtlung tial tial a, sumdawnna lamah inelna a sang tial tial bawk a, he'ng avang hian khawvel hmun hrang hranga chengte hi kan inpawlhsawp nasa tawh hle a ni. Chu chu globalization an tih chu a ni.

Globalization thlipui tleh mek hian hnam tin a hrut a, a hrut na tial tial ni pawhin a lang. Chutianga hnam hrang hrangte kawng tinrenga kan inpawlhsawp deuh deuh zel avang chuan ngaihdan thar a lo piang a. Chu ngaihdan chuan hausakna leh hmasawnna ringawt tuipuitute thlawp a hlawh hle lehnghal.

Globalization avanga inhaivur duhtute chuan hnam bil inhungbingna thiah vek a, zalen taka inpawlhsawp an hnial lo mai a ni lo a, an fak mawi zawk thin. Hnam hrang hrang culture luan khawmtir thlengin an sawimawi a, sumdawnna hmanga hmasawnna leh inhaivur an thlakhlelh avangin inpawlhsawp nunzia 'cultural pluralism' an tuipui hle a ni. Chutiang khawvelah chuan kan chen tawh avangin hnam tenau leh chak lo te te tan chuan inhumhim thiam a tul tial tial dawn a ni.

Hnam zia hloh thak a changkanna um hian hnam ralna a thlen ngei ngei dawn a, hnam himna ngaihtuah lek lo a hmasawnna hmingpu apiang lo dawnsawn tumna pawh hi hnam hralhna chi khat a ni bawk. Chutiang zawnga ngaihtuahna kan sen loh chuan keini ang hnam tlem tan hi rei lo te chhunga boralna a thleng thei.

Mi thiam tam tak chuan hnam zia (culture) leh tunlai hmasawnna hi inhne rem taka kalkawptir theih niin an ngai a. UNESCO pawhin hmasawna thlitleh kara hnam tenau zawkte culture vawnhim hi an ngaipawimawh a, kum 1991 daih tawh khan chumi buaipui tur chuan Network of Networks for Research and Co-operation in Cultural Development a lo din tawh a ni.

Sapho tih dan a ni emaw vaiho tih dan a ni emaw kan hnam tih dan aia tha zawk a ngaih fo thin te, hnam dang zia leh nunphung ngaihsan vanga mahni hnam zia hnualsuat ngawt mai te hi hnam hralhna a ni tih hriat fo a tha a. Pi pu atanga kan hnam ze mawi tak takte hi hnam ropui ber bera kan ngaihte zia tho hi a ni a, hmanlaia an ngaihsan thin chu mi huaisen, rinawm leh tlawmngai te an ni a, 'Pasaltha' tia vuah an ni. Chutiang ang mihring tho chu hnam ropui zawka kan ngaihte pawh hian an ngaihsangin, an chawimawi thin.

Mahni hnamzia ngaihhlutna hian hnam tana thahnemngaihna a hring thei a, chu chuan hmasawnna kawng dikah hnam a hruai thei a ni. Mahni hnam thil - incheina, thiamhnang, kutthemthiamna chi hrang hrang bakah ro thil chi hrang hrang ngaihhlut nachang kan hriat phawt chuan hmasawnna kawng dik kan zawh ngei ang.

Tunlai hian thing leh mau hmanga damdawi leh bawlhlo siam chhuahna lama hmasawnna a chak hle a. Ram hmul damdawi leh tualchhuak damdawi chi hrang hrang hran tangkai tumin damdawi lama sumdawngte an intlansiak mek a. Chutihlaiin, Mizoram leh India hmarchhakah hian chutianga damdawi siam theihna hnim leh thlai chi hrang hrang tam tak a awm tih hriatchhuah a ni tawh a. Kan pi pute atanga rochun thing leh hnim chi hrang hrang damdawite hi kan la tangkaipui viau thei a ni.

Kan hnamzia pholanna langsar pipute incheina chi hrang hrangte pawh kan hlut thar leh tan ta niin a lang. Heng kan hnam incheina mawi tak takte hi kan ngaihhlut thiam phawt chuan kan hnam himna hmanraw tha takah a chang thei dawn a ni. Mahni hnam thil ngaisang apiang an zahawm a, chimral an har thin. Chutiang zelin kan hnam lam chi hrang hrangte, kan ei leh in te, pipute thiam thil chi hrang hrangte hi ngaihhlut thiam a tul khawp mai.

Chutihllaia thil pawimawh tak mai chu sumdawnna khawvelah kan cheng mek a, engki mai hi sumdawnna nena inkaihhnawihtir vek tum pawl an tam hle. Chuvangin kan hnam thil - thiamhnang leh puan chi hrang hrangte, hnam lam te, leh pipu atanga kan rochun thil dangte hi a neitu dik tak kan nih zia dan hmanga kan tihngheh a ngai. Chu chu sorkar leh pawl hminga hmalakna tur chi a ni a, Intellectual Property Right (IPR) hmangin a neitu nihna kan neih thuai loh chuan kan chan mai ang tih pawh hlauhawm tak a ni. Kan thenawm Naga-ho chuan an Naga Shawl hi IPR hmangin a neitu nihna an dil mek a, Assamese-ho pawhin Gamosa an dil bawk. Chutiang ngaihtuahna chu kan sen a hun hle tawh.

Culture vawnhim hi hnam lian zawkte tih theih chauhah kan ngai palh mai ang tih a hlauhawm. Kan ngaihsan em em English-ho khu hnam tam tak an ni ngai lo, India ram an awp lai a 'Ram nitla seng lo a roreltu' an tih thin lai pawh khan Bihar a cheng vaiho pawh an zat lo a, an ram England pawhin Uttar Pradesh a tiat lo. Chuti chung chuan an hnam culture an chawilar a, khawmualpui hrang hrangah an vawrhlar thei. Israel-hote pawh kum sang hnih chhung tlem te te a ram hrang hranga an dawrh vek lai khan an hnam zia an vawngnung a, hnam chak pui puite nena an inpawlhsawp lai pawhin an sakhua an vawnghim thei.

Chutiang rilru chu thangtharten kan put a, kan hnam zia vawnhim tumna rilru kan put phawt chuan inpawlhsawpna khawvel globalization thlitleh mek karah hian Mizo hnam hi a dingchhuak ang a, chak takin hma a sawn ngei ang.

Related Posts :



No comments:

Post a Comment