Cheng Vaibelchhe 70 Chuang ‘LAPSE’ Hi

¢ M Lalmanzuala

Kum tina Annual Plan pawisa kan hmuh hi a hmingin a hrilhfiah ang hian a kum chhung ngeia hman tur a ni a. Hemi atan hian Planning Commission leh State sorkar chuan a hman dan tur pawh chiang takin ‘order’ a chhuah thin a ni.

Chutiang order zulzui chuan a pum puia kum khat chhunga pawisa hman tur ruahman bakah “Quarter” (thla thum dan zel) tina pawisa hman tur zat pawh bithliah thlap zel a ni a, Quarter tawp veleh pawisa hman tura ruahmante chu a hmanna tur takah hman a nih leh nih loh endik turin Development Commissioner/Principal Secretary ho-in Quarterly Progress Review Meeting an nei thin a, a hmanna tura pawisa hmang tha tawk lo department an awm chuan ‘Warning’ te pawh pek hial thin a ni.

Hetiang hi thil kalphung pangngai a nih laiin a hun taka pawisa hmang thlap thlap hi an awm ngai mang lo a, an khawlkhawm a, kum tawp dawn chawlhkar hnih khat emaw velah an hel nuai ta chiam mai thin a ni.

Mizoram sorkar ‘history’-ah hian Plan pawisa a nih dan tur taka hman tum khat chiah a la awm a; chu chu he thuziaktu Development Commissioner a nih laia a ruahmanna leh a kaihhruainaa 1987-88-a awm a ni.

Khami kum khan ruahman lawk angin July chawlhkar hnihna-ah 1st Quarterly Progress Review Meeting neih a ni a. Chu meeting, ONE WINDOW CLEARANCE tih hming puttirah chuan Development Commissioner chairman a ni a; finance secretary leh planning department aiawh planning deptt. under secretary te chu member an ni. A mal te te-in department tin meeting an neihpui a. Pawisa sanction nana harsatna an neih apiangte chu finance department leh planning department aiawhte nena sawihovin a chinfel theih nghal deuh zel a. Harsa zual deuhte chu inchinfelna hun bik pe-in chawlhkar khat chhung emaw vel chuan sanction pek an ni deuh vek thin.

Chutianga ti thei lote chu an pawisa hman ban apiang, a thawk tha department hnena ‘transfer’ sak tura tihthaih te an ni a; an rawn inchingfel nge nge thin a ni.

1988 February thla vel kha chuan pawisa sanction tur a lawi a awm tawh lo a; finance department leh treasury lam pawh an awlthawng hle a ni.
Khatianga kan thil tihin MARCH FINAL a thaibo tur kha lo hrethiam lawk an awm lo ni awm tak a ni! A kum lehah erawh chuan an hrethiam chauh pawh ni lovin khatiang thil kha a thlen leh tawh ngai reng reng lohna turin beihpui an thlak nghal a. Meeting ni-ah director emaw planning officer emaw-in chhuanlam eng eng emaw siamin a lo kal lo a. Kan han vau deuh lahin minister-in director chu a zinna lama hruai a tul thu te emaw, khami ni-a meeting pawimawh dang a neihpui thu te emaw sawiin a rawn chhan zel si. A tawi zawngin sawi ila, a hun taka dik taka pawisa sanction chu an duh lo chauh pawh ni lovin an hlau a ni. Chuvang chuan 1987-88-a kan tih ang chuan kan ti ti zui thei ta lo a ni.

MARCH FINAL hun a lo thlen chuan pawisa sanction nana thil tul tam takte chu haider leh namnulin ‘pawisa a ‘lapse’ loh nan’ tih chhuanlama siamin an pass ta ur ur mai thin a. Hetianga tihna lamah hian department hotute hian finance department leh treasury-a thawkte hi lawmman an siamsak thin a ni tih pawh he thuziaktu hian chief secretary a nih laia department tin pawisa hmanna chipchiar taka auditor rual hmanga a lepse tum khan a hmu a. “March Final Finance Department Duty – Rs. 4,000; March Final Treasury Duty – Rs. 3,000,” tih lehkha them ziak hmuh tur department tin khan an nei deuh vek a ni.

Chuvangin a chhan ni awma an sawi chu eng pawh ni se chhuanlam a ni mai a. A hun taka dik taka pawisa sanction chuan pawisa eiruk tur a awm thei lo tluk a ni a. Chu chu kan duh lo a, eirukna remchang zawngin leh nghakin kum tawp atan kan dahkhawm chiam zel a ni ber mai. Engkim mai hi a taka chantir tum lovin eiruk tura enin kan en deuh vek mai a ni ber e.

Chuti a nih loh chuan engtin nge he'ng zawhnate hi kan chhan ang?

Budget-a pawisa awm reng si, naupangte hrisel zawk nana NI TINA an eitur lei nana pawisa ruahman kum tawp dawn ni hnih emaw leka kan buaipui chuan eng nge awmzia a neih? Hetiang atana pawisa ruahman cheng nuaih 400 dawn laite kha sanction ni se, naupangte ei tur chu eng huna pek nge kan tum? A ‘lapse’ tak si-ah hian naupangte hnena ngaihdam dil te hi kan tum em? Thla thara hlawh la nghal zat zat thinte’n OLD AGE PENSION te leh zel, rualbanlote chanai te nen lam, kan han ti tangkhang a, kan han ‘lapse’ tir te hi engtia sawifiah chi nge? Vawk, bawng, ar chaw leina tur kum tawpa kan buaipui hian eng nge awmzia a neih? Hetiang rante hi kan vulh tak tak a nih chuan ei tur neih loh avangin an thi fai vek tawh dawn lo’m ni? Nge, vulh loh ran chaw tur te hi fanghma no ei atan kan lo ruahman chiam thin em ni zawk?

Tractor/Power Tiller te September/October thla te-a kan pek hian a hun taka leilet siam nan nge kan tiha politics khelhna remchangah? Tute emaw ni hnih khat kawng kan laihtir a, cheng sang hnih khat kan pe a. Km 1 lai-in kan ‘show’ a, March final-ah cheng nuaih 10 zet kan rut mai em ni?

Pawisa 'lapse' chhan dik tak ni awm chu i han sawi hram teh ang. Kum dangah kha chuan tlaivar thakin an che thin a. Kuminah erawh chuan Reserve Bank of India-in hunbi khauh takin a rawn tuk avangin an hun neihin a daih ta ngang lo a ni ang. Sawi zel dawn chuan hetiang deuh vek hi an ni tho dawn a, i duh tawk mai ang. March Final-a pawisa sanction te hi chu a taka hmanna awm mang lo, a thei falte’n an insem thin mai deuh vek a nih avangin, a han ‘lapse’ pawh hi ram leh hnam tan chuan a uihawm lo. Heti zat pawisa holam mai maia hman leh tur ‘an’ chan ta hi mi dangte tan chuan malsawmna te pawh a ni zawk mai thei asin!!!

Kan corrupt dan hi a turu em a, phoro tumtu meuh pawhin tihrem theih a nih lohzia thupui-ah a neih leh daih tawh a nih hi! Kan rama pawisa kal vel hi pawisa thianghlim a lawi a awm lo a, eiruk pawisa deuh vek a ni. March Final, pawisa eiruk runpui-a chanvo nei leh thupek pe thei zingah hian Kohhran upa, Pulpit kai thei, biak in te chu ‘ka in’ ti thei khawpa inti neitu leh tlawh zing te an kat nuk mai a. Chuvang chuan alawm, kan biak in ropui tak tak sakna te, missionary kan tirhchhuahna te, kan Kohhran hruaitute changkang tak taka an khawsak theihna te pawh, eiruk pawisa thawhlawm tling khawm deuh vek a ni e, kan tih thinna chhan chu.

Hetiang pawisa bawlhhlawh te haidera farisai taka biak ina auchhuahpuia han ‘Haleluia’ khum thin hi chu Pathian huat zawng tak a nih kan rin thu kan sawi thinna chhan pawh hei hi a ni. Heng kan thil tawnte hi kan Kohhran hruaitute hian, anmahni inlamletin, an pawisa dawn thinna hnar enfiah lehzual nan hmang se a duhawm khawp ang.

Ram leh hnam tana tangkaina nei lo, hnam dangte chuan mi hmuhsit leh nuihzabura an hmanna leh nghal, engemaw kawnga a BER nih duh vang hrim hrima cheng nuaih 50 zet senga Cheraw kan-a world record siamtute hian a ber nihna hauh belh zel te an duh a nih chuan, pawisa seng lem lo pawhin MARCH FINAL-A PAWISA CHHEPRELH HNEM THEI BER nihna pawh an hauh thei leh mai ang a!

Amaherawhchu hetiang hi an ti leh dawn te a nih hlauh chuan, “People of Mizoram” hminga ti tawh lovin “Govt. of Mizoram”-in emaw ti tawh zawk se a tha ang. Sorkar zahawmna humhalh thei dinhmuna ding ve lote pawh hian Mizoram zahawmna humhalh hi kan duhin kan ngai pawimawh hle a ni tih min hriatpui se a tha ang e.

Related Posts :